Lubanga En Nga? - Lucaden pa Jehovah: Internet Site pa Watchtower Socaiti ma Kingeyo

Lucaden pa Jehovah: Internet Site pa Watchtower Socaiti ma Kingeyo

Beliefs

Future

Ngo ma Lubanga Mito ki Botwa?

Pwony me 2

Lubanga En Nga?
	Lubanga mene aye me ada, ki dok nyinge nga? (1, 2)
	En tye ki kit kom ango? (3)
	En tye ki kite ango ma pirgi tego? (4)
	Myero mono wati ki cal apaya nyo lanyut i worowa bote? (5)
	Yo aryo mene ma watwero ngeyo kwede lok i kom Lubanga? (6)

1. Dano woro jami mapol. Ento Baibul tittiwa ni Lubanga me ADA tye acel keken. En ocweyo jami ducu ma i polo ki ma i wi lobo. Pien en omiyowa kwo, en Acel kene aye myero wawore.—1 Jo Korint 8:5, 6; Niyabo 4:11.

2. Lubanga tye ki nying dog-tic mapol ento tye ki nyinge acel keken. Nying meno aye JEHOVAH. I pol pa Baibul, nying Lubanga kikwanyo woko ka dok kileyo kakare ki nying dog-tic ni RWOT nyo LUBANGA. Ento i kare ma gicoyo Baibul, nying me Jehovah-ni okatti i iye tyen maromo 7,000 kulu!— Nia 3:15; Jabuli 83:18.

3. Jehovah tye ki kom, ento pe obedo calo mewa-ni. Baibul waco ni “Lubanga en cwiny.” (Jon 4:24) Cwiny obedo kit kwo mo ma dok malo loyo mewa-ni. Pe tye dano mo ma yam oneno Lubanga. Jehovah bedo i polo, ento twero neno jami ducu. (Jabuli 11:4, 5; Jon 1:18) Cwiny maleng, kono dong, obedo gin ango? Pe obedo ngat mo calo Lubanga. Ento, obedo teko pa Lubanga aye.—Jabuli 104:30.

4. Baibul tuco ki wan kit pa Jehovah. Nyuto ni kite ma ocung makato ducu aye mar, ngolo kop atir, ryeko, ki teko. (Nwoyo Cik 32:4; Yubu 12:13; Icaya 40:26; 1 Jon 4:8) Baibul tittiwa ni en bene lakica, paro pi dano, lawek bal, ngat ma cinge yot, ki diyo cwinye. Wan, calo litino ma luwiny, myero watemme me lubo kite.—Jo Epeco 5:1, 2.

Wangeyo jami ma dok i kom Lubanga ki i cwec ki dok i Baibul

5. Omyero mono waryebbe piny nyo waleg bot cal apaya, cal agoya, nyo lanyut i worowa? Pe! (Nia 20:4, 5) Jehovah waco ni myero wawor en keken. En pe bipoko deyone bot ngat mo nyo gin mo mukene. Gin apaya pe tye ki teko me konnyo wan.—Jabuli 115:4-8; Icaya 42:8.

6. Wan waromo ngeyo Lubanga nining i yo maber ma kato? Yo acel en aye me neno maber jami ma en ocweyo ki dong tamo matut i kom gin ma gitittiwa. Cwec pa Lubanga nyutiwa ni en tye ki twon teko ki ryeko madwong. Waneno mar-re i jami weng ma en oyubo. (Jabuli 19:1-6; Jo Roma 1:20) Yo mukene ma watwero ngeyo kwede lok i kom Lubanga aye me kwano Baibul. I iye en tittiwa jami mapol ma dok i kom en Lubanga. En bene tittiwa pi yub ma mege ki ngo ma en mito ni wan watim.—Amoc 3:7; 2 Temceo 3:16, 17.

Kigoyo i Mwaka 1996
Copyright © 2006 Watch Tower Bible and Tract Society of Pennsylvania. All rights reserved.