Ker pa Lubanga Obedo Gin Ango?

1. I kare ma en tye i wi lobo, Yecu opwonyo jo ma lube me lega pi Ker pa Lubanga. Ker obedo gamente ma rwot aye telo. Ker pa Lubanga obedo gamente ma kite dok pat. Kityeko cakone i polo ma dong biloyo lobo-ni. Obilonyo, nyo miyo nying Lubanga bedo leng. Bimiyo miti pa Lubanga tine i wi lobo kit macalo gitiyo i polo.—Matayo 6:9, 10.

2. Lubanga ocikke ni Yecu bibedo Rwot me Ker Mere. (Luka 1:30-33) I kare ma Yecu tye i wi lobo, En onyuto ni ebibedo Laloc ma paro pi dano, ma ngolo kop atir, ki ma pe ki bal. I kare ma en odok i polo, pe gikete i wi komker calo Rwot me Ker pa Lubanga cut-cut. (Jo Ibru 10:12, 13) I mwaka 1914, Jehovah omiyo Yecu twero ma En ociko pire bote-ni. Cakke i kare meno, Yecu obedo ka loc i polo calo Rwot ma Jehovah ocimo.—Daniel 7:13, 14.

3. Jehovah bene oyero mon ki co mogo ma lugen ki i wi lobo me cito i polo. Gibiloc kacel ki Yecu calo rwodi, lungolkop, ki ajwaggi pi dano. (Luka 22:28-30; Niyabo 5:9, 10) Yecu olwongo luloc luwote me Kerre-ni ni “romi manok.” Welgi tye 144,000.—Luka 12:32; Niyabo 14:1-3.

4. Cut-cut ma Yecu odoko Rwot, en obayo Catan ki lumalaikane maraco-ni woko ki i polo me bino i kin piny i wi lobo. Meno aye omiyo jami dong oballe marac i wi lobo kany cakke i mwaka 1914. (Niyabo 12:9, 12) Lweny, kec, two gemo, turo cik ma tye ka medde—magi ducu obedo but ‘lanyut’ ma cimo ni Yecu tye ka loc ki bene ni yub me lobo-ni tye i karene me agikki.—Matayo 24:3, 7, 8, 12; Luka 21:10, 11; 2 Temceo 3:1-5.

5. Cokcokki Yecu obingolo kop i wi dano, pokogi calo lakwat poko romi ki i kom dyegi. “Romi” aye jo ma nongo dong gunyuto ni gin jo-ma i te loc-ce ma winye. Gin binongo kwo ma pe tum i wi lobo. “Dyegi” aye jo ma nongo dong gukwero Ker pa Lubanga. (Matayo 25:31-34, 46) I kare ma cok i anyim, Yecu obityeko jo ducu macalo dyegi. (2 Jo Tecalonika 1:6-9) Ka imito bedo ngat acel i kin “romi” pa Yecu, omyero iwiny lok kom Ker man ki itim gin ma ipwonyo.—Matayo 24:14.

I te loc pa Yecu, mone nyo adega dega pe dok bibedo tye

6. Kombeddi lobo-ni kipoko odoko lobe mapol. Gin ki acel acel tye ki gamente-ne. Lobe magi pol kare lwenyo i kin-gi keken-gi. Ento Ker pa Lubanga bileyo ka gamente pa dano ducu. Biloc calo gamente acel keken i wi lobo duc. (Daniel 2:44) Ci dong lweny mo bibedo pe, turo cik, ki tim gero bibedo pe. Dano duc bikwo kacel i kuc ki ribbe.—Mika 4:3, 4.

7. I kare me loc pa Yecu pi Mwaka Alip Acel, dano ma lugen bidoko jo ma balgi pe, ki wi lobo ducu bidoko Paradic. I kare ma mwaka alip acel dong tum, Yecu nongo dong otyeko timmo jami duc ma Lubanga openye ni otim. Ci dong en bimiyo Ker meno dok cen i cing Wonne. (1 Jo Korint 15:24) Pingo pe itit bot luremi ki jo ma imaro lok i kom jami ma Ker pa Lubanga bitimone?

Copyright © 2006 Watch Tower Bible and Tract Society of Pennsylvania. All rights reserved.