Yo Ango ma Itwero Nongo Kwede Dini me Ada?

1. Yecu ocako dini pa Lukricitayo acel me ada. Pi meno i kare-ni omyero obed tye dul acel keken, nyo lwak mo, pa luwor Lubanga Jehovah. (Jon 4:23, 24; Jo Epeco 4:4, 5) Baibul pwonyo ni jo mo manok keken aye gitye i yo mading ma tero dano i kwo.—Matayo 7:13, 14.

2. Baibul oloko con ni i nge to pa lukwena, pwony goba ki tic ma pe pa Lukricitayo bidonyo motmot i kacokke pa Lukricitayo. Jo mogo biywayo jo muye woko me lubogi ma ka Kricito. (Matayo 7:15, 21-23; Tic pa Lukwena 20:29, 30) Meno aye omiyo waneno dini mapol ata mapatpat giwacci gibedo Lukricitayo-ni. Watwero ngeyo Lukricitayo me ada nining?

3. Lanyut madit maloyo duc pa Lukricitayo me ada aye ni gitye ki mar kikome i kin-gi. (Jon 13:34, 35) Pe kipwonyogi me tam ni gin dok gibeco giloyo jo me rok nyo rangi del kom mukene-ni. Pe bene kipwonyogi me dago jo ma a i lobe mukene-ni. (Tic pa Lukwena 10:34, 35) Pi meno pe gidonyo i lweny. Lukricitayo me ada tero luwotgi calo omego ki lumego.—1 Jon 4:20, 21.

Lukricitayo me ada gimare i kin-gi keken-gi, giworo Baibul, dok gipwonyo pi Ker pa Lubanga

4. Lanyut mukene pa dini me ada en aye ni jo-ne gitye ki woro matut i kom Baibul. Giye ni obedo Lok pa Lubanga dok giye ngo ma Baibul waco. (Jon 17:17; 2 Temceo 3:16, 17) Gitero Lok pa Lubanga calo gin ma pire tek loyo tam pa dano nyo cik kwaro. (Matayo 15:1-3, 7-9) Gitemme me kwo i kit me Baibul i kwo-gi me nino duc. Pi meno pe gipwonyo gin acel ka dok gitimo mukene.—Tito 1:15, 16.

5. En dini me ada-ni omyero bene owor nying Lubanga. (Matayo 6:9) Yecu oweko nying Lubanga, Jehovah, onge-ne bot jo mukene. Lukricitayo me ada myero gutim marom aroma. (Jon 17:6, 26; Jo Roma 10:13, 14) Ngagi ma i nget kabedo-ni ma tito nying Lubanga bot dano?

6. Lukricitayo me ada omyero gupwony pi Ker pa Lubanga. Yecu otimo kumeno. Kare ducu en obedo ka lok pi Ker meno. (Luka 8:1) Ociko lupwonyene me pwonnyo en lok acelli i lobo ducu. (Matayo 24:14; 28:19, 20) Lukricitayo me ada ye ni Ker pa Lubanga keken aye bikello kuc kikome ki piny mukwe i lobo-ni.—Jabuli 146:3-5.

7. Lupwonye pa Yecu myero pe gubed jo me lobo man me bal-li. (Jon 17:16) Gin pe gidonyo i laro loc me lobo ki apokapoka ma ngweko kin dano. Gin gwokke ki i kit marac, tic maraco, ki cwiny maraco ma dwong i lobo-ni. (Yakobo 1:27; 4:4) Itwero nongo dul dini ma i kabedo-ni ma tye ki lanyut pa Lukicitayo me ada magi-ni?

Copyright © 2006 Watch Tower Bible and Tract Society of Pennsylvania. All rights reserved.