Cima ci Akoma?

1. Ci “Akoma” sanay a tilid o misakaniway o mitonganganay sanay ko tatodong. Ora “Satan” hananay o misa’adaay anoca o misaferitay o sanay. O Fangcalay Cudad tanoniniyan a tilid a pangangan konini a ta’angayay a ’ada no Kawas. Sa’ayaw, ci Akoma o malfotay a ikakarayan a sikawdan. Karacafayay to Kawas itini i kakarayan. Kawraan, ikor iraay komi sa’akawakawangay a harateng ningra, orato ciharatengay cingra tora sakahcadaw o Kawas a madoko.—Matay 4:8-10.

2. Oniniya ikakarayan a sikawdan ci Satan kara sakadadmakay to ccay a ’oner a pasowal ci Ifaan. Sakaniwan ningra ci Ifa, mikayhidan ci Ifa papisafelit to Kawas. Mihaenay ci Satan a misa fafolawan to ’akawangay a mikowan no Kawas, misaka fafokilan to iraay ko fadangalan no Kawas i ’akawangay sa’aro’an. Iraay ko sasa ni Satan too matatodongay hokira konoka pikowan no Kawas, anoca pairaay hokira to sakanga’ay no tamdaw. Oromasa pa’ihkalay ci Satan, iraay ko sasa ningra waira ko tamdaw toha mamadimadi i Kawas. Ora nanodmak ni Satan pala’adaay no Kawas to niyahto. Pakayni toniniya lalangiyan, hato o Akoma Satan hananay ito cingra.—Satapangan 3:1-5; Yopu 1:8-11; Pa’arawan 12:9.

3. Ci Satan misa’icelay sapitapi’aw to tamdaw, honga’ mita’ong cingraanan sanay. (2 Korinto 11:3,14) Ora saka ccay a pakayraan ningra kara sakadadmakan ningra ko makaniway a pidoyongan. Ora pidoyongan ano mihadak to pakangodoway to Kawas a makaniway a kimad i, o kara sakadadmakan ni Satan kora. (Yohani 8:44) Mihaklongay to makaniway a pidoyongan a tamdaw alatek misaso’linay ko harateng o so’linay a Kawas ko midokoan no mako sanay. Kawraan o so’linay ci Satan kora mihaklongan nangra. Ci Satan o “kawas noniya hkal”.—2 Korinto 4:4.

4. Ci Satan pairaay toha sapifalodaw ningra to tamdaw oroma a pakayraan kara sakadadmakay to maanga’ngay, alatek oroma a tamdaw mitahidangay to kaloykoy toha sapidipotaw to niyah, anoca mipalak to roma a tamdaw, oromasa oha mamisamaan noikor ato nanay ira ko masakafahkaan a dmak sanay. Ci Satan ono hatiniyay a harateng a ilalikoray a ’icel. Ano hapapaka hmek to Kawas, falahen koniya hatiniyay kihcod a maanga’ngay nga’.—Limo’ot 18:10-12; Dmak 19:18,19.

5. Oroma a sakadadmak ni Satan o masakakinihay a harateng to airangan ato midoko to likakawa no mirikecay a miolat to tamdaw. O harateng no roma a tamdaw o niyah a kitakit anoca a tamdaw ko ’akawangay sanay, kawraan o hatiniyay a harateng awaay ko lalangiyan. (Dmak 10:34,35) Oroma a tamdaw mitadi’ecay to likakawa no mirikecay toha mamisaysay to masaknaknaay a pasangal. Ano mihaenay mifalahan nangra ko Hongti Kitakit. O so’linay, wa onini a Hongti Kitakit ko mamisaysay to pasangal ita.—Taniil 2:44.

6. Oroma a kara sakadadmakan ni Satan a miolat to tamdaw ociraraway a coos ko sapikayhid to tamdaw. Ci Yihofa mafana’ay to masaknaknaay a iraay ko raraw a waywayan pakayni i tamdaw iraay ko sakatati’ih, mansa o sowal ningra kitaanan liyasen ko hatiniyay a dmak sanay. (Kalatiya 6:7,8) Alatek o roma a tamdaw papihaklongay cangraanan a mihaen to dmak. Kawraan oha haratengen, ci Satan kora papihaenay to dmak tisowanan a mari’angay.—1 Korinto 6:9,10; 15:33.

7. Ci Satan alatek kara sakadadmakan ningra ko sapalak anoca sapacori toha sapi liyasaw iso ci Yihofaan. Oroma a salawina pakayraay ino pickiw iso to Fangcalay Cudad ta’akayay ko ngolaw, oroma a tamdaw oha mamalikaf tisowanan. Kawraan, ora ’orip iso o nima aki? Pairaan ni Satan kohatalaw iso, toha sakapihawadaw iso a mihatatanam mafana’ ci Yihofaan. Aka’a papicelcelen ci Satan. (Matay 10:34-39; 1 Pitiro 5:8,9) Ano misa’icel kiso micoker ci Satangan, oha sakahmek ni Yihofa, oromasa o pa’ihkalay to midamaay kiso to ’akawangay noka pikowan no Kawas.—Taneng 27:11.

Copyright © 2006 Watch Tower Bible and Tract Society of Pennsylvania. All rights reserved.