Miˇ Yehˇ miˇ tsaˇ-ahˇ, aˇ joˆ-ehˇ bi pyeuˆ laˇ mawˆ ta?

1. Jeˇ Hoˇ Baˇ Miˇ Yehˇ miˇ tsaˇ heu beh eu-aˇ tsawˇ haˇ zaˇ nui saˇ za-eu laˆ k’oeˇ mˇ maˆ maˇ bya zaˇ ziˇ bi jawˇ-eu lehˇ beh-euˇ meh. Aˇ yawˆ-aˇ, yaw tsaˇ yaw dawˇ tsawˇ haˇ zaˇ-ahˇ, mˇ maˆ maˇ bya zaˇ ziˇ bi jawˇ mawˆ-eu meh. (Ja ceuˇ 115:16; Iˇ saˇ yaˇ 45:18) Miˇ tsaˇ heu la cawˆ-eu g’aˇ duˇ, aˇ yawˆ beh-euˇ maˇ ngeuˇ-a, Mˇ maˆ maˇ bya zaˇ ziˇ yiˆ ni beh taˇ-euˇ meh.–Ja ceuˇ 104:5; Dawˇ tsoˆ 1:4.

2. Miˇ Yehˇ-aˇ, tsawˇ haˇ zaˇ-ahˇ maˇ beh mi na-ehˇ, tsaˇ dui dui-eu miˇ tsaˇ tiˇ cahˇ tseˇ -awˇ muiˇ dui jaˇ dui dui-eu yaˇ kmˇ bi pyeuˆ laˇ-euˇ meh. Yaˇ kmˇ heu kmˇ-aˇ, Eˇ Deˇ yaˇ kmˇ lehˇ, myahˇ nehˇ-eu meh. Jawˇ duˇ heu cahˇ k’aˇ dzeˇ zaˇ hawˇ-eu zaˇ miˇ zaˇ, Aˇ daˇ hawˇ-eu Eˇ baˆ bi jawˇ-euˇ meh. Miˇ yehˇ-eu nui noeˇ aˇ buˇ a li g’awˇ mya ni bi jawˇ le-awˇ miˇ tsaˇ heu-ahˇ bi byah laˇ-eu lehˇ noeˇ taˇ-eu meh. A lawˆ lawˆ-ehˇ, ngeuˇ naˇ, miˇ tsaˇ heu dawˇ tawˆ luˆ (Baˇ Laˇ Diˇ Suˆ) bi pyeuˆ laˇ-eu meh.–Aˇ dahˇ beh-eu 1:28; 2:8-15.

Baˇ Laˇ Diˇ Suˆ byoˆ-iˇ eu

3. Aˇ daˇ hawˇ-eu, Eˇ baˆ-aˇ, Miˇ Yehˇ-eu zahˇ dawˇ k’oˆ dawˇ-ahˇ shiˇ nya taˇ-eu k’awˆ, iˆ baˇ paˇ mˇ-euˇ meh, Teu baˇ da neh (Jeˇ Hoˇ Baˇ) Miˇ yehˇ aˇ yawˆ nyaˆ-ahˇ (Eˇ deˇ yaˇ kmˇ) ahˇ neh teh doˆ-euˇ meh. Teu baˇ da neh, aˇ yawˆ nyaˆ muiˇ dui dzaˇ dui dui-eu yaˇ kmˇ smˇ-iˇ euˇ meh. (Aˇ dahˇ beh 3:1-6, 23) Teu loˆ ehˇ pyeuˆ laˇ-euˇ k’awˆ, jeˇ Hoˇ Baˇ Miˇ Yehˇ, aˇ dahˇ beh ngeh pyeuˆ laˇ-euˇ loˆ ehˇ bi pyeuˆ k’oˆ laˇ-eu g’aˇ duˇ maˇ ngehˇ-a, Miˇ tsaˇ heu muiˇ dui jaˇ dui dui-eu yaˇ kmˇ paˇ bi pyeuˆ k’oˆ laˇ-awˇ tsawˇ haˇ zaˇ-ahˇ Mˇ maˆ maˇ bya zaˇ ziˇ bi jawˇ tehˆ-a. Aˇ yawˆ a joˆ-ehˇ paˇ bi pyeuˆ laˇ ta?–Ja ceuˇ 37:29.

4. Miˇ tsaˇ heu, Baˇ laˇ diˇ suˆ maˇ pyeuˆ laˇ mi na-ehˇ maˇ muiˇ maˇ jaˇ-eu tsawˇ haˇ-ahˇ jeˇ hu la cawˆ jiˇ tehˆ-a, (Ja ceuˇ 37:38) Miˇ Yehˇ-eu Guiˇ guiˇ ma, (aˇ maˇ geˇ donˇ) tiˇ nah pyeuˆ laˇ-awˇ, haˇ-iˇ-eu tsawˇ haˇ deuˇ ya shiˇ jiˇ tehˆ-a. K’oeˇ naˇ saˇ daˇ-ahˇ 1,000 k’oˆ ka lahˇ taˇ tehˆ-a. Miˇ tsaˇ heu-ahˇ la cawˆ-eu, haˇ-iˇ-eu tsawˇ haˇ tiˇ g’aˇ-lˇ, maˇ paˇ jawˇ meh. Miˇ Yehˇ-euˇ zaˇ deuˇ tehˆ-ehˇ, jeˇ laˇ-awˇ k’oeˇ gaˇ ya jawˇ theˇ-a.–Pah mehˇ 16:14-16; 20:1-3.

5. K’oeˇ naˇ yeˇ suˇ ka li sahˇ paˇ pyeuˆ laˇ-awˇ miˇ tsaˇ heu-ahˇ 1,000 k’o uˆ lahˇ tehˆ-a. (Pah mehˇ 20:6) Aˇ yawˆ-aˇ, A lawˆ lawˆ-ehˇ aˇ dui-euˇ iˆ baˇ dawˇ tswˆ luˆ-ahˇ tsiˇ buˇ tsiˇ sawˇ jiˇ-awˇ, Aˇ daˇ hawˇ-eu, Eˇ baˆ pyeuˇ haw-euˇ loˆ-ehˇ byah dui dui-eu tsawˇ haˇ paˇ pyeuˆ k’oˆ laˇ tehˆ-a, K’oeˇ naˇ mawˇ iˇ-eu, shiˇ-eu, naˇ-eu, je maˇ paˇ jaˆ-aˇ, Naˇ-eu tsawˇ haˇ deuˇ la taˇ jiˇ-awˇ tsawˇ mawˇ deuˇ zaˇ guˇ loˆ-ehˇ, pyeuˆ k’oˆ laˇ tehˆ-a.–Yawˇ baˆ 33:25; Iˇ saˇ yaˇ 33:24; Pah mehˇ 21:3-4.

6. Yeˇ suˇ heu miˇ tsaˇ-ahˇ tiˇ heˇ k’oˆ uˆ lahˇ le ngeh, yaw tsaˇ yaw dawˇ tsawˇ haˇ deuˇ muiˇ dui jaˇ dui dui-eu (Baˇ Laˇ Diˇ Suˆ) yaˇ kmˇ pyeuˆ laˇ ni jahˇ tehˆ-a. (Luˇ kaˇ 23: 43) K’oeˇ sawˇ miˇ tsa shiˇ-eu tsawˇ haˇ deuˇ, aˇ lam, aˇ lam-ahˇ neh, g’oˆ dehˆ laˇ tehˆ-a. (G’aˇ k’ehˇ 24:15) K’oeˇ naˇ, aˇ yawˆ maˆ Miˇ Yehˇ-eu ehˇ dawˇ naˇ haˇ-awˇ Miˇ Yehˇ-eu nui noeˇ tsaˇ ni mˇ naˇ, Mˇ maˆ maˆ bya zaˇ ziˇ ya jawˇ tehˆ-a. Ehˇ k’awˆ aˇ yawˆ maˆ Miˇ Yehˇ-euˇ ehˇ dawˇ maˇ naˇ haˇ naˇ, Mˇ maˆ maˇ bya zaˇ ziˇ ya shiˇ tehˆ-a.–Yoˇ haˇ 5:28-29; Pah mehˇ 20:11-15.

7. Teu loˇ-ehˇ jahˇ-eu baˇ da neh, aˇ dahˇ beh ngeh neh, Miˇ Yehˇ noeˇ taˇ-eu jeˇ byah laˇ-eu meh. Nawˇ k’awˆ k’oeˇ gaˇ tiˇ kawˆ loˇ-ehˇ maˇ jawˇ mawˆ nya lo? Jawˇ mawˆ naˇ Miˇ Yehˇ-euˇ jaˇ liˆ-ahˇ jaw geuˆ-awˇ, Miˇ Yehˇ euˇ dawˇ naˇ haˇ awˇ, Nawˇ jawˇ-eu dawˇ peh, Jaˇ Hoˇ Baˇ Miˇ Yehˇ saˇ kiˇ kamˇ-eu aˇ muˇ bawˇ dzaˇ ngeh,-iˇ awˇ, nawˇ g’aˇ za laˇ dui dui tehˆ-a.–Iˇ saˇ yaˇ 11:9; Heˇ byehˇ 10:24-25.

Aˇ Maˇ Geˇ Doˇ jiˇ naˇ miˇ tsaˇ heu Baˇ Laˇ Diˇ Suˆ paˇ bi pyeuˆ laˇ tehˆa

Copyright © 2009 Watch Tower Bible and Tract Society of Pennsylvania. All rights reserved.