Dëshmitarët e Jehovait—Kush janë? Çfarë besojnë?

Vlera praktike e lajmit të mirë për shoqërinë ku jetoni

NË BOTËN e sotme dëgjojmë shpesh të shprehet mendimi: «Parimet e krishterimit nuk janë praktike. Ato nuk japin rezultat në shoqërinë e sotme komplekse.» Megjithatë, në një bashkëbisedim të raportuar, midis udhëheqësit hinduist Mohandas K. Gandi dhe ish-guvernatorit britanik të Indisë, lordit Iruin, u shpreh një mendim krejt i ndryshëm. Thuhet që lordi Iruin e pyeti Gandin se çfarë do të duhej, sipas tij, për t’i zgjidhur problemet midis Britanisë së Madhe dhe Indisë. Gandi mori një Bibël, e hapi atë në kapitullin e pestë të Mateut dhe tha: «Kur vendi yt dhe imi të kuptohen së bashku në bazë të mësimeve që dha Krishti në Predikimin e tij në Mal, ne do të zgjidhim jo vetëm problemet midis vendeve tona, por edhe ato të botës mbarë.»

Ai predikim na këshillon të kërkojmë cilësitë frymore dhe të jemi zemërbutë, paqësorë, të mëshirshëm, dashurues të drejtësisë. Dënon jo vetëm vrasjen, por edhe zemërimin me të tjerët, jo vetëm kurvërinë, por edhe mendimet epshore. Flet kundër veprimeve të papërgjegjshme për divorc, që ndajnë familjet dhe i bëjnë fëmijët viktima. Ai na thotë: ‘Duajini, madje edhe ata që nuk ju pëlqejnë, jepini nevojtarit, mos i gjykoni të tjerët në mënyrë të pamëshirshme, trajtojini të tjerët ashtu si do t’ju pëlqente të trajtoheshit edhe ju.’ Gjithë këto këshilla, nëse zbatohen, do të sjellin dobi të pamasë. Sa më shumë njerëz t’i praktikojnë ato në zonën tuaj, aq më e mirë do të bëhet ajo!

Dëshmitarët e Jehovait luajnë një rol në këtë drejtim. Bibla i mëson që të respektojnë martesën. Fëmijët e tyre edukohen sipas parimeve të drejta. Ata i vënë theksin rëndësisë që ka familja. Familjet e bashkuara janë një bekim për zonën tuaj, madje, për kombin tuaj. Historia është e mbushur me shembuj të fuqive botërore të cilat janë bërë pluhur e hi kur janë dobësuar lidhjet familjare dhe është rritur imoraliteti. Sa më shumë individë dhe familje ndikohen nga Dëshmitarët e Jehovait për të jetuar sipas parimeve të krishtere, aq më pak keqbërje, imoralitet dhe krime do të ketë në shoqëri.

Një ndër problemet më të mëdha që pllakosin shoqëritë dhe kombet është paragjykimi racor. Në dallim me këtë, apostulli Pjetër tha: «E kuptoj pa pikë dyshimi se Perëndia nuk është i anshëm, por në çdo komb njeriu që i frikësohet atij dhe praktikon drejtësinë është për të i pranueshëm.» Dhe Pavli shkroi: «Nuk ka as jude, as grek, nuk ka as skllav, as të lirë, nuk ka as mashkull, as femër; sepse ju jeni të gjithë një person në unitet me Krishtin Jezu.» (Veprat 10:34, 35; Galatasve 3:28) Dëshmitarët e Jehovait janë dakord me këtë. Në selinë e tyre botërore, nëpër degë dhe në kongregacionet e tyre, të gjitha racat dhe ngjyrat jetojnë dhe punojnë së bashku.

Në Afrikë disa fise nuk mund të takohen së bashku pa u ndeshur me njëri-tjetrin. Megjithatë, në asambletë e Dëshmitarëve të Jehovait, njerëz nga shumë fise të ndryshme hanë, flenë dhe adhurojnë së bashku në një harmoni të plotë dhe shoqëri të ngrohtë. Zyrtarët e shtetit çuditen kur shohin këtë gjë. Një shembull i ndikimit bashkues që ka krishterimi i vërtetë u komentua nga gazeta e Nju-Jorkut, Amsterdam News, më 2 gusht 1958. Komenti u frymëzua nga vëzhgimi që iu bë asamblesë ndërkombëtare të përmendur më parë, ku më se një çerek milion Dëshmitarë ishin mbledhur në qytetin e Nju-Jorkut.

«Kudo, zezakë, të bardhë dhe orientalë, nga të gjitha shtresat e shoqërisë dhe nga të gjitha pjesët e botës, ishin përzier në mënyrë të gëzuar e të lirshme. . . Dëshmitarët adhurues, nga 120 vende, kanë jetuar dhe adhuruar së bashku në paqe, duke u treguar amerikanëve se sa me lehtësi mund të bëhet kjo gjë. . . . Asambleja është një shembull i shkëlqyer se si njerëzit mund të punojnë dhe të jetojnë së bashku.»

Shumë mund të thonë se parimet e krishterimit nuk janë praktike për këtë botë moderne. Megjithatë, ç’gjë tjetër ka dhënë ose mund të japë rezultate? Parimet e krishtere mund të kenë një vlerë reale tani, nëse zbatohen në zonën tuaj, dhe do të jenë baza për bashkimin e të gjitha ‘kombeve, fiseve dhe popujve’ kudo në botë, nën sundimin e Mbretërisë së Perëndisë mbi njerëzimin.—Zbulesa 7:9, 10.

Copyright © 2006 Watch Tower Bible and Tract Society of Pennsylvania. All rights reserved.