?Wan yɛle Ɲanmiɛn Kpli? - Zoova i Lalofuɛ mun: Watchtower Society i Ɛntɛnɛti su adresi

Zoova i Lalofuɛ’m be Ɛntɛnɛti lika’n

Beliefs

Future

?Ngue like yɛ Ɲanmiɛn Kpli kunndɛ kɛ e yo ɔ?

Like suanlɛ 2

?Wan yɛle Ɲanmiɛn Kpli?
	?Wan yɛ ɔ ti Ɲanmiɛn Kpli’n niɔn, be flɛ i sɛ? (1, 2)
	?I wunnɛn liɛ’n ti sɛ? (3)
	?I wafa nga be ti abonuan’n yɛle mennin? (4)
	?Fafuɛ’m be falɛ Ɲanmiɛn sulɛ nun’n ti like kpa? (5)
	An bo like nɲɔn nga be uka e Ɲanmiɛn Kpli i silɛ nun’n (6)

1. Sran’m be sɔ ninnge kpanngban. Sanngɛ Biblu’n se e kɛ Ɲanmiɛn KPLI’N ti kunngba cɛ. Ninnge kwlaa nga be o ɲanmiɛn su lɔ nin asiɛ’n su wa’n, be ti i sa nuan like. Kɛ m’ɔ ti e nguan manfuɛ’n ti’n, ɔ fata kɛ i kunngba cɛ yɛ e su i ɔ.—1 Korɛntfuɛ Mun 8:5, 6; Sa Nglo Yilɛ 4:11.

2. Ɲanmiɛn Kpli i manmanlɛ wafa’n sɔnnin, sanngɛ i dunman kpafuɛ’n ti kunngba cɛ. Ɔ suan ZOOVA. Biblu kaka nun’n, be fɛli i manmanlɛ wafa wie kɛ MIN annzɛ ƝANMIƐN annzɛ ANANNGANMAN sa, be sieli i dunman bɔbɔ ba’n i osu’n nun. Sanngɛ i nun mɔ bé klɛ́ Biblu’n, Zoova i dunman’n o nun kpɛ ko ju 7.000!—Ezipt Lɔ Tulɛ 3:15, NW; Jue Mun 83:18, NW.

3. Zoova le wunnɛn, sanngɛ ɔ timan kɛ e liɛ’n sa. Biblu’n se kɛ ‘Ɲanmiɛn Kpli ti aolia nun sran.’ (Zan 4:24.) Aolia nun sran’n le ɲrun tra e. Sran fi nin a wunman Ɲanmiɛn Kpli le. Zoova tran ɲanmiɛn su lɔ, sanngɛ ɔ kwla wun like kwlaa (Jue Mun 11:4, 5; Zan 1:18). ?Ngue yɛle Ɲanmiɛn i wawɛ’n? Ɲanmiɛn i wawɛ’n timan sran kɛ Ɲanmiɛn Kpli bɔbɔ sa, sanngɛ ɔ ti Ɲanmiɛn Kpli i wunmiɛn m’ɔ fa di junman ɔn.—Jue Mun 104:30.

4. Sran i wafa nga Zoova ti’n, Biblu’n yiyi nun kle e. Ɔ kle e kɛ i wafa nga be ti abonuan’n yɛle sran klolɛ, sa nuan su sɛsɛsɛ yolɛ, ngwlɛlɛ nin kwlalɛ (Mmla’n 32:4; Zɔb 12:13; Ezai 40:26; 1 Zan 4:8). Biblu’n se ekun kɛ ɔ ti aunnvuɛ sifuɛ nin kpa yofuɛ, ɔ yaci sa cɛ, i sa’n timan tankaan, ɔ trɛ i awlɛn. I sɔ ti’n, kɛ ba mɔ be ti aɲinyiɛfuɛ mun sa’n, ɔ fata kɛ e sɔnnzɔn i.—Efɛzfuɛ Mun 5:1, 2.

Like nga Ɲanmiɛn Kpli yili’n, ɔ nin Biblu’n be kle e i silɛ.

5. ?Ɔ nin i fata kɛ e koto fafuɛ nin waka sran’m be bo e manman be? Cɛcɛ! (Ezipt Lɔ Tulɛ 20:4, 5). Zoova se kɛ i kunngba cɛ yɛ ɔ fata kɛ e koto i bo e mɛnmɛn i ɔ. Ɔ su faman i ɲrun m’ɔ le i’n ɔ manman sran fi annzɛ like wie fi. Amuɛn’m be kwlá ukaman e.—Jue Mun 115:4-8; Ezai 42:8.

6. ?É yó sɛ naan y’a si Ɲanmiɛn Kpli kpa? I su ajalɛ klikli’n yɛ ɔ o yɛ: E bo e ɲin ase e nian ninnge nga ɔ yili be’n, naan e bu like nga be kle e’n i sin kpa. Ɲanmiɛn Kpli sa nuan like’n kle e kɛ i bɔbɔ i fanngan’n nin i ngwlɛlɛ’n cɛnnin. Kɛ e nian ninnge kwlaa nga ɔ yoli be’n, e wun kɛ ɔ ti sran klofuɛ (Jue Mun 19:1-6; Rɔmfuɛ Mun 1:20). Like nga e ko yo i ekun naan y’a si Ɲanmiɛn Kpli kpa’n yɛle Biblu’n nun ninnge suanlɛ’n. Biblu’n nun’n, Ɲanmiɛn kle e sran’n i wafa nga ɔ ti’n. Ɔ kle e like nga ɔ o i klun kɛ ɔ́ yó’n, ɔ nin like nga ɔ kunndɛ kɛ e yo’n.—Amɔs 3:7; 2 Timote 3:16, 17.

Be yili i Afuɛ 2000 nun
Copyright © 2006 Watch Tower Bible and Tract Society of Pennsylvania. All rights reserved.