 |
Beliefs | Future | Medical | Topics | Contact Us | Publications | Languages |
| ?Ngue like yɛ Ɲanmiɛn Kpli kunndɛ kɛ e yo ɔ? | Like suanlɛ 5  |
Like nga Ɲanmiɛn wan ɔ́ yó i asiɛ’n su’n |
|
 |
?Ngue ti yɛ Zoova yili asiɛ’n niɔn? (1, 2) |
|
?Ngue ti yɛ andɛ asiɛ’n timan mɛn klanman’n niɔn? (3) |
|
?Ngue like yɛ ɔ́ wá ɲán klunwifuɛ mun ɔn? (4) |
|
?Ngue like yɛ cɛn wie lele Zezi wá yó mán tukpacifuɛ nin sran kpɛnngbɛn, nin be nga be wuli’n mun ɔn? (5, 6) |
|
?Sɛ amun kunndɛ kɛ amún ɲán be ɲrun lɔ like ɲɛnmɛn nga ɔ́ wá bá’n, ngue yɛ ɔ fata kɛ amun yo ɔ? (7) |
1. Zoova yili asiɛ’n kɛ sran’m be tran su naan be ɲan su ye tititi. Ɔ klo kɛ sran nga be klo ndɛnman’n nin aklunye’n be tran asiɛ’n su tititi (Jue Mun 115:16; Ezai 45:18). Asiɛ’n su nunnunman le, ɔ́ ká lɛ tititi.—Jue Mun 104:5; Akunndanfuɛ’n 1:4. 2. I nun m’ɔ nin a yiman klɔ sran’n, Ɲanmiɛn Kpli fali asiɛ’n i bue kaan kun fa yoli mɛn klanman kpa kun. Ɔ flɛli lika sɔ’n i Edɛn fie. Lɛ yɛ ɔ sieli klɔ sran klikli Adam nin Ɛvu kɛ be tran ɔn. Ɲanmiɛn klo kɛ be wu ba naan be yi asiɛ wunmuan’n, naan blɛblɛblɛ be yo asiɛ’n naan ɔ kaci mɛn klanman.—Bo Bolɛ 1:28; 2:8, 15.
3. Adam nin Ɛvu be sa tɛ nga be yoli’n, yɛle kɛ be ɲinfu b’a nantiman Ɲanmiɛn Kpli i mmla’n su. I sɔ’n ti Zoova fuannin be mɛn klanman’n nun lɔ. Lɛ yɛ Mɛn klanman’n mlinnin be sa nun ɔn (Bo Bolɛ 3:1-6, 23). Sanngɛ Zoova i wla’n w’a fiman i angunndan kliklifuɛ’n su. Ɔ seli kɛ cɛn wie lele’n, asiɛ’n wá káci mɛn klanman mɔ klɔ sran’m bé trán nun tititi ɔ. ?Wafa sɛ yɛ Ɲanmiɛn wá yó i sɔ ɔ?—Jue Mun 37:29. 4. Ɔ fata kɛ klunwifuɛ’m be wie nunnun ka, naan asiɛ’n w’a kaci mɛn klanman (Jue Mun 37:38). Armagedɔn, alɛ nga Zoova wá fá núnnún klunwi’n, i blɛ nun yɛ ɔ́ yó sɔ ɔ. I sin’n, Satan wá kɔ́ bisua afuɛ lele 1.000. Ɔ maan klunwifuɛ’m be su tranman lɛ kun naan b’a yo asiɛ’n i abɔlɛ. Ɲanmiɛn Kpli i sufuɛ’m be ngunmin cɛ, yɛ bé ɲán nguan ɔn.—Sa Nglo Yilɛ 16:14, 16; 20:1-3. 5. I sin’n, Zezi Klist wá dí Famiɛn asiɛ’n su afuɛ lele 1.000 (Sa Nglo Yilɛ 20:6). Ɔ́ yí fɔ nga ɔ o e angunndan nin e kplo nun’n, blɛblɛblɛ. É káci kɛ i nun mɔ Adam nin Ɛvu be nin a yoman sa tɛ’n sa, fɔ su tranman e nun. I blɛ sɔ nun’n, tukpaciɛ, kpɛnngbɛn yolɛ, wie’n, be wie fi sa su tranman lɛ kun. Tukpacifuɛ’m bé yó juejue, sran kpɛnngbɛn’m bé káci gbaflɛn ekun.—Zɔb 33:25; Ezai 33:24; Sa Nglo Yilɛ 21:3, 4. 6. Afuɛ akpi nga Zezi i Sielɛ Blɛ’n wá dí nun’n, klɔ sran ndɛnmanfuɛ’m bé dí asiɛ’n su junman naan i wunmuan’n kaci mɛn klanman (Lik 23:43). Kpɔkun, ɔ́ cɛ́n sran kpanngban nga be wuli’n, naan be tran asiɛ’n su wa ekun (Sa Nga Be Yoli’n 24:15). Sɛ be yo Ɲanmiɛn i klun sa’n, bé ɲán anannganman nguan asiɛ’n su. Ɔ timɛn i ti’n, bé wíe núnnún mlɔnmlɔn.—Zan 5:28, 29; Sa Nglo Yilɛ 20:11-15. 7. Ɲanmiɛn Kpli i like klikli nga ɔ sunnzunnin kɛ ɔ́ yó i asiɛ’n su’n, ɔ́ wá kpɛ́n su siɛn’n. ?Amun klo kɛ amún dí fɛ’n nga bé wá bá lɛ’n, be wie? Sɛ ɔ ti amun klun su’n, nn nán amun sa sin glɔglɔ amun Zoova i silɛ’n ɔ nin i ɲin yilɛ’n nun. Sɛ amun kɔ Zoova i Lalofuɛ’m be aɲia’m be bo be Ɲanmiɛn Sielɛ Blɛ sua nga ɔ mantan amun wun koko lɔ’n, i nun’n, bé kwlá úka amun i sɔ yolɛ’n nun.—Ezai 11:9; Ebre Mun 10:24, 25.
|
Be yili i Afuɛ 2000 nun |
 |
Copyright © 2006 Watch Tower Bible and Tract Society of Pennsylvania. All rights reserved. |
|
