¿Kunsa Bibliax chiqpachapuni yatichi?

PERIÓDICO liyisasa, televisión uñch’ukisasa jan ukax radio isch’ukisasa, ¿kuna yatiyäwinakakis utjaski? ¡Ñanqha luräwinakakiw utjaski ukhamaraki ch’axwäwinakasa jaqi jiwthapiyirinakasa anchapuniwa! Llakinakamat jichhax amuyt’arakma. Mä familiaramasa jan ukax munat masimasa usutächi jan ukax chhaqtawayxchi, inas ukanakat wal llakisisksta. Inas Job chachjama jikxatasta, uka suma jaqisti akham sänwa: “Q’alpunwa llakimp” aynacht’ta sasa (Job 10:15).

Inas akham jiskt’asta:

• ¿Nätakis jan ukax taqi jaqinakatakisa Diosax akhamäñapti munpachäna?
• ¿Jan walt’äwinakat mistsuñataki kawkinsa yanapt’a jikxatirista?
• ¿Sumankañax Uraqin utjaspati?

Ukanakxa Bibliaw sum qhanañchi.

URAQINXA AKANAKWA DIOSAX SUMAPTAYANI SASAW BIBLIAX YATICHI.

“Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa” (Apocalipsis 21:4).

“Suchunakasti taruja qallunakjamaw sink’usipxani” (Isaías 35:6).

“Juykhunakax uñjapxani[wa]” (Isaías 35:5).

“Taqi jiwatanakasti [...] jaktapxaniwa” (Juan 5:28, 29).

“Janiw khitis sis[xani]ti: ‘Usutätwa’ sasaxa” (Isaías 33:24).

Jutïrinakan “trigox [jan ukax manq’añax] yapunakan jilarkir utjpan” siwa (Salmo 72:16).

BIBLIAN YATICHÄWINAKAPA SUM YATIQÄTA

Samkakïpachaw sas janiw mäki amuyätati. Diosax ukhamäniw siwa, ukat Bibliax qhanañcharakiwa kunjamsa ukanakxa phuqani.

Janiw ukakïkiti. Bibliax yaticharakistuwa kunjamsa jichhasa k’uchiki sum jakassna. Jan walt’äwinakamatsa llakinakamatsa amuykipt’arakma. Inas qullqitächi, familia tuqitächisa jan ukax mä familiaramas usuntchi jan ukax jiwchi. Ukhamaxa, Bibliax uka jan walt’äwinakaru saykatañwa yanapistu, chuymacharakistuwa aka jiskt’anakaru sum qhanañchasa:

• ¿Kunatsa t’aqhistanxa?
• ¿Kunjamsa llakinakaru saykatsna?
• ¿Kunsa kamachsna familiasampi k’uchiki sum jakasiñasatakixa?
• Jiwatatxa, ¿jakañax utjaskakpachati?
• ¿Jiwat familiaranakasampix wasitat uñjasiñäniti?
• ¿Kunatsa Diosax arsutanakapxa phuqapuniniw sasax sisna?

Aka qillqatanak liyisinxa, uñacht’aytawa Biblian yatichäwinakapa yatxatañ munatama. Aka librowa yatxatañ yanapt’ätamxa. Sapa janan tukuyaparuxa sapa t’aqatakiw jiskt’anakax utji. Millón millón jaqinakawa Jehová Diosan Qhanañchirinakapan akhama jiskt’anakampi jaysanakapampi Biblia uñakipañaruxa khusapuniw sapxixa, jumatakix ukhamarakïspa ukwa munapxta. Kunsa chiqpachapuni Bibliax yatichi uka suma yatiqäwimanxa Diosaw yanapt’ätamxa.

BIBLIA UÑT’AÑÄNI

Bibliaxa 66 libronakani cartanakaniwa, jank’aki jikxatañatakixa jaljanakampiru (capítulos) jisk’a t’aqanakampiru (versículos) jalanuqt’atawa. Kunapachatï aka libron Bibliat thaqtañataki utjkani ukhaxa, sutxaru uñstiri nayrir jakhuxa, sañ muniwa libron jaljapa jan ukax cartan jaljapa, ukxarüki uka jakhuxa sañ munarakiwa jisk’a t’aqapa. Amuyañataki, “2 Timoteo 3:16” sañ muniwa: Timoteor payïr qillqat carta, 3 jalja, 16 jisk’a t’aqa.

Aka libronkiri Bibliat apst’atanak thaqhätaxa, jank’akiw Biblia sum uñt’äta. ¿Janit sapüru Biblia liyiñaru uchaskasma? Sapürutï kimsa jan ukax phisqa jaljanaka liyïtaxa, mä maranwa Biblia liyiñxa tukuyäta.