Aka chiqax Jehová Diosan Qhanañchirinakapankiwa

Jehová Diosan Qhanañchirinakapa—¿khitinakasa ukat kunsa yatichapxi?

Kuns yatichapxi

ALAXPACHANSA aka Uraqinsa taqi kunas Jehová Diosan luratawa, ukat Jupaw taqi ch'amani sasaw Jehová Diosan Qhanañchirinakapax sapxi. Taqi kunas wali suma lurt'atawa, ukhamasti ukanak luririx wali yatiñani ukat wali ch'amani ukhamäñapawa. Ukat kunjamatix luratanakasax kunjam jaqïktantï uk uñacht'ayixa, ukhamarakiw Diosan luratanakapax kunjam Diosäkitï uk uñacht'ayistu. Ukatxa “Diosan jan uñjkay yänakapax jupan luratanakap tuqiw uñacht'ayasi. Qhanpachawa uñacht'ayasi kunapachatix aka uraqix luratäkäns ukürutpacha jupax Diosätapa, ch'amapax jan tukuskirirakïtapa” sasaw Bibliax qhanañcharaki. Alaxpachax janis arunïkchixa ‘Diosan jach'akankañapwa’ yatiyistu (Romanos 1:20; Salmo 19:1-4).

URAQI: Jehová Diosan lurata, jaqinakan wiñayataki suma uñjata

Amuyt'añäni: jaqix janiw ñiq'i phuksa televisionsa jan ukax computadorsa jan amtanix lurkiti, jan ukasti mä amtanipuniw luri. Ukat sipansa, animalanakasa, kunayman quqanakasa wali muspharkañ lurt'atawa. Ukat cuerposax walja millón celulanakampix kunjamas unxti, lixwisax kunjamsa amuyunak apnaqi ukanaksa janiw sum yatktanti. Ukhamasti niyakixay jaqinakax kuna jisk'anaksa mä amtampi luraschixa, ¿janit Jehová Diosax juk'amp wali aski amtampi taqi kuns lurkpacha? “Taqi kunsa [Jehová] Tatituw luri mä amtampi” sasaw Proverbios 16:4 jisk'a t'aqax qhanañchi.

Jehová Diosax mä suma amtampiw aka Uraqxa luräna, ukatwa nayrïri chacha warmirux akham säna: “Jichhax wali mirantapxam, aka uraqirusti phuqhantapxarakim, apnaqapxarakim taqi challwanakarusa, jamach'inakarusa apnaqapxam, ukhamaraki uraqinjam qatatnaqtir animalanakarusa” sasa (Génesis 1: 28). Diosar jan ist'asax jucharar wawanakanikïxapxänwa, ukhamasti janiw khiti aski jaqis aka Uraqi uñjañatakix utjxänti. Ukampis Jehová Diosax janiw amtapxa armaskiti. Ukatwa walja maranak qhipatxa akham qillqayatayna: “Khititix aka uraqi lurki sayt'aykaraki” ukaxa janiw inamay lurkiti, “jan ukasti, [jaqinïñapatakiw luri]” sasa. Ukatxa “uraqix janipuniw mayjt'kiti”, mä arunxa, janipuniw t'unjatäkaniti sasaw qillqayarakitayna (Isaías 45:18; Eclesiastés 1:4). Diosan amtapax aka Uraqitakix phuqasipuniniwa, “amtanakaxax phuqhasipuniniwa, taqi kuntix amtkta ukanakxa lurapuniwa” sasaw Arupanxa qhanañchistu (Isaías 46: 10).

Ukhamasti, aka Uraqix janiw tukuskaniti, jan ukasti mä paraisor tukuyatäniwa, ukanwa jaqinakas ukat jaktanirinakas Diosan amtanakaparjam sarnaqasax jakasipxani sasaw Jehová Diosan Qhanañchirinakapax sapxi. Ukampis jichhax taqiniw Adanan Evan wawanakapjamax juchanïtanxa (Romanos 5:12). Kunjamtï Bibliax siskixa: “Juchan waxt'asiñapasti jiwañawa”, ukat “khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti”. Ukat akham sarakiwa: “Kawkïritix jucha lurkani ukasti jiwarakiniwa” sasa (Romanos 6:23; Eclesiastés 9:5; Ezequiel 18:4, 20). Ukhamasti, ¿kunjamatsa jiwatanakax uka aski churäwinak katuqañatakix kuttanipxaspa? Jesusan jakäwip luqtasitap laykuw jiwatanakax mayampi jaktanipxani, Jesusax akham sänwa: “Nayätwa jaktañasa jakañasa. Khititix nayaru iyawsarakitu ukaxa jiwatäkanisa, jakaniwa”. “Taqi jiwatanakasti [aruj] ist'apxaniwa. Ukatsti uka jiwatanakax jaktapxaniwa” sasa (Juan 11:25; 5:28, 29; Mateo 20:28).

¿Kunjamatsa uka arunakax phuqasini? Jesusax Diosan Apnaqäwipatwa suma yatiyäwinak aka Uraqin yatiyäna, ukanwa kunjamsa phuqasini uk uñacht'ayäna (Mateo 4:17-23). Jichhürunakanxa niya ukhamarakiw Jehová Diosan Qhanañchirinakapax wali suma yatiyäwinak yatiyasipki.

JEHOVÁ DIOSAN QHANAÑCHIRINAKAPAN YATICHÄWINAKAPA

Yatichäwi	Bibliax kamsisa
Bibliax Diosan chiqa arupawa	2 Tim. 3:16, 17; 2 Ped. 1: 20, 21; Juan 17:17
Bibliax jaqin arunakapat sipansa chiqapawa	Mat. 15:3; Col. 2:8
Diosax Jehová satawa	Sal. 83:18; Isa. 26:4; 42: 8; Éx. 6:3, NM
Jesusax Jehová Diosan Yuqapawa, janiw Diosäkiti	Mat. 3:17; Juan 8:42; 14:28; 20:17; 1 Cor. 11:3; 15:28
Jesucristoxa Jehová Diosan nayrïri Yuqapawa	Col. 1:15; Apo. 3:14
Jesusax janiw cruzan jiwkänti, jan ukasti mä lawar ch'akkatataw jiwäna	Hech. 5:30, MT; Gál. 3:13
Jaysasiri jaqinak laykuw Jesusax jakäwip luqtasiwayi	1 Ped. 2:24, MT; Mat. 20:28; 1 Tim. 2:5, 6
Jesusax mä kutikiw jiwas layku jiwawayi	Rom. 6:10; Heb. 9:25-28
Jesusax jiwatat jaktasinxa jichhax jan jiwir ajayüxiwa	1 Ped. 3:18; Rom. 6:9; Apo. 1:17, 18
Jesusax jan uñjkañaw kutt'anini	Juan 14:19; Mat. 24:3; 2 Cor. 5:16; Sal. 110:1, 2
Qhip ‘qhipa urunakankxtanwa’	Mat. 24:3-14; 2 Tim. 3:1-5; Luc. 17:26-30
Jesusax Diosan Apnaqäwipanxa chiqakankañampiw aka Uraqi apnaqani	Isa. 9:6, 7; 11:1-5; Dan. 7:13, 14; Mat. 6:10
Diosan reinopax wali askinakwa aka Uraqitakix utjayani	Sal. 72:1-4; Apo. 7:9, 10, 13-17; 21:3, 4
Aka Uraqix janipuniw t'unjatäkaniti, janirakiw jan jaqinis uñjaskaniti	Ecl. 1:4; Isa. 45:18; Sal. 78:69
Niyaw Jehová Diosax Armagedonan akapachar tukjani	Apo. 16:14, 16; Sof. 3:8; Dan. 2:44; Isa. 34:2; 55:10, 11
Ñanqha jaqinakax jan mayampitakiw tukjatäpxani	Mat. 25:41-46; 2 Tes. 1:6-9
Diosatakjam sarnaqir jaqinakax wiñay jakañ katuqapxani	Juan 3:16; 10:27, 28; 17:3; Mar. 10:29, 30
Mä thakikiw wiñay jakañarux api	Mat. 7:13, 14; Efe. 4:4, 5
Adanan juchap laykuw jaqinakax jiwtanxa	Rom. 5:12; 6:23
Kunapachatï maynix jiwxi ukhaxa, janiw almax jakxiti	Ecle. 9:5, 10; Sal. 6:5; 146:4; Juan 11:11-14
Infiernox jaqinakan sepulturapäkaspas ukhamakiwa	Job 14:13, Apo. 20:13, 14
Jiwatanakax wasitat jaktanipxani	1 Cor. 15:20-22; Juan 5:28, 29; 11:25, 26
Adanan juchap layku jiwañax tukusxaniwa	1 Cor. 15:26, 54; Apo. 21:4; Isa. 25:8
144.000 ukhanikiw Jesusamp chika apnaqirix alaxpachar sarapxani	Luc. 12:32; Apo. 14:1, 3; 1 Cor. 15:40-53; Apo. 5:9, 10
144.000 ajllit jilat kullakanakax Diosan wawapjamaw mayampi yuripxi	1 Ped. 1:23; Juan 3:3; Apo. 7:3, 4
Jehová Diosax alaxpachar saririnakampiw mä arust'äwir purïna	Jer. 31:31; Heb. 8:10-13
Criston tamapaxa jupxar utt'ayatawa	Efe. 2:20; Isa. 28:16; Mat. 21:42
Jehová Dios saparukiw Jesusan sutipxar mayisiñasa	Juan 14:6, 13, 14; 1 Tim. 2:5
Janipuniw "santonakxa” apnaqañasäkiti	Éx. 20:4, 5; Lev. 26:1; 1 Cor. 10:14; Sal. 115:4-8
Ch'amakaninakaru, layqanakaru ukat yatirinakar sarañax janipuniw walïkiti	Deu. 18:10-12; Gal. 5:19-21; Lev. 19:31
Supayaw akapach apnaqirixa	1 Juan 5:19; 2 Cor. 4:4; Juan 12:31
Chiqpach cristianox janiw akapach luräwinakarux mitisiñapäkiti	2 Cor. 6:14-17; 11:13-15; Gál. 5:9; Deu.7:1-5
Chiqpach cristianox aka pachan luräwinakat jithiqtiwa	Sant. 4:4; 1 Juan 2:15; Juan 15:19; 17:16
Marka kamachinakax jan Diosan kamachinakap conträki ukhaxa ist'añasawa	Mat. 22:20, 21; 1 Ped. 2:12; 4:15
Wila manq'añasa ukat uskuyasiñas Dios nayraqatanxa janiw walïkiti	Gén. 9:3, 4; Lev. 17:14; Hech. 15:28, 29, MT
Yaqhanakampi sum apasiñ tuqitxa Biblian kamachinakapar ist'añasawa	1 Cor. 6:9, 10; Heb. 13:4; 1 Tim. 3:2; Prov. 5:1-23
Israelitanakakiw sábado urun samarapxañapäna, ukampis Moisesan katuqat Leyinakamp chikaw tukuyxäna	Deu. 5:15; Éxo. 31:13; Rom. 10:4; Gál. 4:9, 10; Col. 2:16, 17
Jesusan arkirinakapax janiw jach'a jach'a tukupxañapäkiti, ni wali mintat sutinaksa uchasipxañapäkiti	Mat. 23:8-12; 20:25-27
Jaqix Diosan luratätanwa, janiw monot jutktanti	Isa. 45:12; Gé. 1:27; Mat. 19:4
Jesusat yatiqasisa Jehová Diosar yupaychañasawa	1 Ped. 2:21; Heb. 10:7; Juan 4:34; 6:38
Uman bautisasisax Jehová Diosar katuyasitaswa uñacht'aytanxa	Mar. 1:9, 10; Juan 3:23; Hech. 19:4, 5
Chiqa cristianonakax taqi chuymaw Diosan chiqa yatichäwinakapxa taqinir yatiyapxi	Rom. 10:10; Heb. 13:15; Isa. 43:10-12

2009 maran lurata