Jehová Diosan Qhanañchirinakapa—¿khitinakasa ukat kunsa yatichapxi?

Kunaymanitwa Diosan arunakapat yatiyapxi

Hawai

Venezuela

Yugoslavia

CRISTIANONAKAX taqi markankir jaqinakaruw Jesusan ‘arkiripar tukuyapxañapa’, ukampis janiw munkir jan munkir tukuyapxañapäkiti. Jesusax “suma yatiyäwinak [yatiyiriw jutäna]”, “llakitanakaru chuymachañataki” (Mateo 28:19, MT ; Isaías 61:1, 2; Lucas 4:18, 19). Jehová Diosan Qhanañchirinakapax niya ukhamarakiw Bibliat suma yatiyäwinakampix yaqhanakar chuymachapxaraki. Ezequiel sat nayra profetjamarakiw “jan wali [luräwinak] layku wali llakt'atäsipki ukanakaru” thaqhapxi (Ezequiel 9:4).

Jan walinak uñjasin wali llakt'atäpki ukanakar jikxatañatakixa utat utwa sarapxi. Ukhamatwa taqi jaqinakar purt'añataki ch'amachasipxi, Jesusax aka Uraqinkkäna ukhaxa “jach'a markanakana, ukhamarak jisk'a markanakanwa sarnaqäna Diosan arunakap yatichasa, ukhamarak Diosan reinopat parlasa”. Nayrïr arkirinakapax ukhamarakiw lurapxirïna (Lucas 8:1; 9: 1-6; 10:1-9). Jichhürunakanxa, Jehová Diosan Qhanañchirinakapax niya ukhamarakiw taqi utanakar purt'añataki ch'amachasipxi, ukhamata jaqinakampi kuna llakinakatsa jan ukax Uraqpachan kunanakas pasaski ukanakat mä juk'a parlt'añataki. Ukat maranxa walja kutiw kutt'añjamächi ukhaxa kutt'apxi. Qalltanxa Bibliatwa mä pä chiqa jaqinakataki liyt'arapipxi, ukat kunapachatï maynix juk'amp yatxatañ munirjamäki ukhaxa, mayampi kutt'añatakiw amtapxi, ukhamata juk'ampi parlt'asiñataki. Ukatxa Biblianaka jan ukax Bibliat apst'at kunayman qillqatanak jaytasaw sarapxaraki, ukat inakiw Bibliat jaqinakar utanakapan yatichapxaraki. Jichhakamax walja millón jaqinakaruw jan ukax familianakaruw Bibliat jan qullqi mayisa yatichasiski.

Ukatxa Tantachasiñ Utanakanwa Diosan Apnaqäwipat ‘suma yatiyäwinakax’ sapa semanan juk'ampi yatichasiraki. Mä tantachäwinxa taqinitakiw mä arst'äwix utji, ukanxa kunanakas jichhax pasaski, ukat kun lurañas wakisi uka tuqinakatwa sum qhanañchasi, ukxarusti Bibliat jan ukax mä profeciat juk'amp sum amuyt'añatakiw Yatiyañataki sat revistampi yatiqasiraki. Ukatxa Bibliat yatxatt'añataki sat mä wakichäwimpiw yaqha tantachäwix qalltaraki, ukatsti khitinakatix suma yatiyäwinak apapki ukanakar wakichañatakiw sum yatichasiraki, uka tantachäwi tukuyañatakix kunjamsa uka chiqan qamasir jaqinakarux Bibliat yatichapxaspa uka tuqinakatwa sum amuyt'apxaraki.

Uka tantachäwinakarux khitis saraskakispawa. Taqinitakis wali askiwa, ukat janiw khitirus qullqix mayiskiti. Bibliax akham siwa: “Thaqhañasaw maynit maynikam kunjäman yanapt'asiñasataki munasiñanïñasataki, ukhamarak suma luräwinak uñacht'ayasa. Janirakiw tantachäwinakar janix sarañasäkiti kunjämtix yaqhipanakax jan sarapkiti ukhama, jan ukasti maynit mayniruw waytt'asiñasa, Tatitun jutäwipa jak'ankxatapa yatisinsti juk'ampïñapawa” sasa. Chiqpachansa sapakix utan Bibliat yatxatasksnawa ukampis tantachäwir sarañax wali askiwa, ukwa Bibliax akham qhanañchi: “Kunjamtix hierroxa yaqha hierrompi liq'jasa ariptayataxa, ukhamarakiw jaqix jaqi masipampi suma amuyt'ayataraki” sasa, uka arunakax jaqi pura ch'amañchasiña sañ muni (Hebreos 10:24, 25; Proverbios 27:17).

Jehová Diosan Qhanañchirinakapaxa kun lurkasas jan ukax kawk sarkasas Diosan arunakapatxa yatiyapxapuniwa. Uta jak'ankirinakampisa, autot sarkasinsa jan ukax avionat sarkasinsa mä juk'sa parlt'apxapuniwa, ukat awisax wali jaypacharakiw irnaqir masinakampis jan ukax amigonakampis wali sum parlt'apxi. Jesusax ukhamwa jaqinakarux yatiyarakïna: quta lakan sarnaqkasasa, qullu parkin qunt'atäkasasa, jayanak sarkasas jan ukax botet sarkasas, kawkir sarkasasa wali sumwa yatichirïna. Ukat sinagoganakan jan ukax templon yatichañsa janirakiw armaskänti. Mä arunxa, jan inakt'asaw taqi chiqanakan Diosan arunakapatxa yatichirïna. Jehová Diosan Qhanañchirinakapax niya ukham lurañatakirakiw wal ch'amachasipxi (1 Pedro 2:21).

SUM SARNAQASAW YATICHAPXARAKI

Jehová Diosan Qhanañchirinakapaxa taqinimpiw sum apasiñ munapxi, kunjamtï yatichapki ukhama

Ukhamaw kunayman tuqit Diosan arunakapat yatichapxi, ukampis jan walinak lurapxaspa ukhaxa, inamayaw yatichapxaspa. Janiw walïkit sasin jan walinak luraskaraksna ukhaxa janiwa walïkaspati. Chiqansa, ukhamatwa walja jaqinakax Bibliat jan kunsa yatiñ munapkiti. Ukampis Bibliax janiw kuna juchanïkisa. Amtapxañäni, khä urunakanxa fariseonakas ley yatichirinakas Hebreo Aruta Qullan Qillqatanakxa yatipxänwa, ukampis jan walinak lurapxäna, ukatwa Jesusax jupanakar k'ari chuyman jaqinaka sänxa. Moisesax katuqkäna uka Leyinakat yatichapxäna, ukampis Jesusax akham sasaw arkirinakapar amuyt'ayäna: “Jumanakax jupanakarux jaysapxamaya, lurapxarakim kuntix sapktam taqi ukanaka. Ukampis jan jupanakjamax lurapxamti, jupanakasti may arsupxi ukatsti yaqrak lurapxi” sasa (Mateo 23:3). Walja arunakamp yatichañat sipansa cristianjama sum sarnaqañaw juk'amp askixa. Ukatpï Diosar jan yupaychir chachan warminakarux akham amtayasixa: “Inas kawkïri chachas jan Tatitur iyawskchi ukax jumanakan sarnaqäwinakam tuqi Tatitutaki jikxatatäñapataki jan kuna arumpisa, jan ukasti jumanakan suma sarnaqatam uñjasaki” sasa (1 Pedro 3:1, 2).

Ukhamasti Jehová Diosan Qhanañchirinakapax kuntï yatichapki ukanak lurasarakiw jaqinakarux Diosan arunakapatxa yatiyañ munapxi. Ukatxa, kunjam ‘uñjatäñtï munapki ukhamarakiw taqinirus uñjapxaraki’ (Mateo 7:12). Ukat janiw cristiano masinakaparuki ukham sum uñjapkiti, jan ukasti familiaranakarusa, uta jak'an qamirinakarusa, munat masinakarus wali sum uñjapxaraki. Chiqansa, jupanakax pantjasirïpxarakiwa, ukampis taqi chuymaw yaqhanakan askipa thaqapxi. Ukhamasti janiw suma yatiyäwinakaki yatiyapkiti, jan ukasti yanapt'irjamächi ukhaxa wali sum yanapt'apxi (Santiago 2:14-17).