Kunjam utt'ayatäpxisa ukat kunjamsa Uraqpachan yatiyasipki
NIYA pä patak kimsa tunka jila markanakanwa Diosan arunakapxa yatiyasipki, ukatxa walja sucursalanakaw utjaraki. Ukat kunjamas taqi chiqanakan yatiyasiski ukxa Uraqpachan Jilïr Irpirinakaw p'iqiñchapxaraki, jupanakax Brooklyn, (New York) markankapxiwa. Jupanakan khitataw mä qhawqha jilatanakax sucursalanakan uñjir jilatanakampi tantacht'asirix sarapxi, sapa maraw uk lurapxi. Ukat sapa sucursalanwa kimsat paqallqkam jilatanakax uñjapxaraki, kawkintix jupanakar uñjañax wakt'ki ukwa sum uñjapxaraki. Ukampis yaqhip sucursalanakanxa libronak lurañ wali jach'a maquinanakaw utjaraki. Jichhax yaqha tuqit amtarakiñäni, mä jach'a markanxa walja tamanakaw utji, ukat niya pä tunka tamanakxarux mä jilataw uñji, tamanak tumpt'ir satawa, uka jilatax sapa maraw pä kutix uka tamanakar tumpt'irix sari, ukhamata jilat kullakanakar yanapt'añataki, Diosan arunakapat sum yatiyapxañapataki. Ukatxa maran pä kutirakiw uka tamanakax pä jach'a tantachäwinak lurapxi. Ukampis uka tamanak tumpt'ir jilatanakxarux yaqha jilatarakiw utji, tamanak tumpt'irinakan uñjiripa satawa. Uka jilatanakax kawkinsa uñjapxañapäki uka chiqanwa tamanak tumpt'ir jilatanakar uñjasipkaraki, ukat uka tamanakar uñjapxaraki.
Taqi chiqansa mä Tantachasiñ Utanpunwa Jehová Diosan Qhanañchirinakapax tantachasipxi, ukanwa Diosan arunakapat yatiyir sarañatakix wakichasipxi. Ukat jilat kullakanakax kawkhantï yatiyapxañapäki ukaxa wali suma jalanuqt'atawa, ukhamata Diosan arunakapax taqi jaqinakar purt'añapataki. Tamanakax may mayäpxarakiwa, yaqhipansti juk'anikiw tantachasipxi, ukat yaqhipansti waljaniw tantachasipxi, niya pä patakanjamaw tantachasipxi, ukat sapa tamanwa mä qhawqha irpir chuymaninakax utji, jupanakaw kun lurañsa wakichapxi. Ukhamasti, khitinakatix Uraqpachan uñjasipki ukanakasa, yanapirinakapasa ukat sucursalanakan uñjirinakasa, tamankirinakasa mä amtanikïpxiwa. Mä arunxa, Jehová Diosan taqi Qhanañchirinakapaw Diosan Apnaqäwipat suma yatiyäwinakxa taqinir yatiyapxi, ukaw jupanakatakix taqi kunat sipansa nayranki.
Ukxarusti, kunjamas taqi chiqanakansa yatiyasiski uka tuqinakat yatiyäwinakwa Uraqpachan uñjirinakax katuqapxaraki, uka yatiyäwinakampiw sapa maratxa Anuario sat mä libro apsupxi, ukansti kunjamsa Jehová Diosatsa, Jesusar katuyat Apnaqäwipatsa Uraqpachan yatiyasipki ukanakaw sum qhanañchasi, ukat qhawqhanïpxisa ukas yatiyasirakiwa. Aka qhipa maranakanxa niya tunka paqallquni millón jaqinakaw Jesusan jiwäwip amtañatakix sarapxatayna. Ukatxa sapa marawa mä waranqa millón horanakax yatiyir sarapxatayna, ukatsti sapa mararakiw niya kimsa millón jaqinakax bautisasipxatayna. Libronakasa qillqatanakasa ukham lakintatarakiwa.
|
