Jehová Diosan Qhanañchirinakapa—¿khitinakasa ukat kunsa yatichapxi?

CHIQANSA Jehová Diosax t'aqhisiñanaksa jan walinaksa janiw tukjkiti, ukatxa waljanirakiw jan walinak lurapxaraki. Ch'axwanaka utjayasinxa jan juchani wawanakaruw jiwthapiyapxi, ukat uraqsa q'al tukjapxaraki, ukatwa mach'anakas utjaraki. Maysa tuqitsti, walja jaqinakaw cigarrompi pulmón q'añuchasisax cáncer usu apantasipxi, ukat chachatsa warmitsa q'añu luräwinakan sarnaqasaw jan wali usunak aptasipxi, ukat alcohol wal umasasti cirrosis sat usumpiw usuntapxi. Jïsa, yaqha jan walinakat parlaskaksnawa. Ukampis jaqinakax janiw uka jan wali luräwinakat jark'atäñ munapkiti, jan ukasti jan walinak lurasin llakinakar puripkixa, uka llakinakan chhaqtañapakwa munapxi. Kunjamtï yatktanxa, jan walinakan uñjasisakiw akham jiskt'asipxi: “Kunatsa ukax nayar paspachïtu” sasa, ukat Diosaruw juch jaqupxi. Kunjamtï Proverbios 19:3 jisk'a t'aqax siskixa, “Jaqix jan amuyt'asirïtap laykuxa suma sarnaqañapxa chhaqhayiwa, ukatsti jaqix Tatiturukiw juchañchi”. Ukat Diosax uka jan wali luräwinakat jark'aspa ukhaxa, janiw kusisit jakasiñas munkiti sasaw parlapxarakispa.

Maysa tuqit amuyt'arakiñäni, Supayaw Jehová Diosat k'arinak parlatayna, ukatxa janiw khiti jaqis yant'atax Diosar taqi chuyma luqtkaniti sasaw sarakitayna, ukhamasti uka k'arinak qhanstayañatakiw Diosax jan walinakxa janïr tukjkiti (Job 1: 6- 12; 2: 1-10, NM). Uka amtaniw Diosax Supayarus janïr tukjkarakiti (Éxodo 9: 16). Ukatwa Supayax jichhakamas jaqinakarux jan walinak luraskaki, Dios contra sayt'apxañapataki (Apocalipsis 12:12). Ukampis chiqpach cristianonakax Diosat jan jithiqtasaw sum sarnaqapxi, kunjamtï Job tatas, jan ukax Jesusas sarnaqapkäna ukhama (Job 27:5; 31:6; Mateo 4: 1- 11; 1 Pedro 1: 6, 7).

Jïsa, chiqäskapuniwa, ukampis jaqinakax sinti jan walinakar yatinuqtatätanwa, walja maranakaw ukham sarnaqtanxa, ukatwa payachasiñjamäspa. Amtañäni, Jehová Diosax mä amtaniw aka Uraqxa luräna, ukat phuqantapxam sasaw nayrïr chacha warmir sarakïna, jupanakaw aski wawanakapampix aka Uraqirux phuqantapxañapäna, animalanaksa jan ukax quqanaksa sum uñjapxañapäna, ukhamata wali suma uraqin jakasiñataki, mä arunxa, janiw uraq tukjapxañapäkänti (Uñxatt'arakismawa “Kunsa yatichapxi” ukat “Aka suma yatichäwinak yatiñamwa munapxi”). Ukhamasti aka Uraqix mä suma paraisor tukuyatäniwa, janiw uka tuqit payachasiñamäkiti. Ukat aka jan wali urunakax tukusxani ukhaxa, wali suma jakasiñaw utjxani.

Kuna yatichäwsa janiw jan amuyt'asakix katuqasiñasäkiti. “Iyawsañaxa [ist'atas] laykuw utji” sasaw Bibliax qhanañchi. Mä arunxa, Diosan Arupat sum yatiqasaw yatiñkankañ jikxattanxa, ukhamatwa iyawsäwix juk'ampi jilxatti (Romanos 10:17; Hebreos 11:1).

Bibliax qillqaskän uka urunakanxa kunanakas utjäna, ukanakwa uraq allisin jikxatapxi, ukanakarakiw Bibliar yanapt'i, mä arunxa, ukanakaw chiqapätapxa uñacht'ayi. Ciencia tuqitxa chiqpunwa Bibliax parlaraki. Amuyt'añäni, jaqinakax janïra ciencia tuqit sum yatxatt'apkäna ukhaw aka Uraqin muruqütapsa, jan kunxaru warkt'atätapsa Bibliax qhanañchxäna. Ukat Uraqis kunjam luratasa, kuna jamach'inakas wali jayar sarapxi, taqi ukanakwa sum qhanañchxäna (Isaías 40:22, NM; Génesis 1 jalja; Job 26:7; Jeremías 8:7).

Maysa tuqitxa, Biblian qillqat walja profecianakaw phuqasiraki, ukaw Diosan Arupätapxa uñacht'ayarakistu. Daniel profetan arunakapat amuyt'añäni, ch'amani jach'a markanakax kunjamas uñstapxani ukat kunjamarakis tukusipxani uka tuqitwa qillqatayna. Ukatxa Mesiasan jutañapatsa jiwañapatsa qillqarakitaynawa, ukanakax phuqasiskapuniwa (Daniel, 2 ukat 8 jalja; 9: 24-27). Ukat jichhürunakanxa walja profecianakaw phuqasiskaraki, ukanakaw ‘qhipa urunakankatas’ uñacht'ayarakistu (2 Timoteo 3:1-5; Mateo 24 jalja). Ukhamaw Biblian qillqat profecianakax phuqasi, jaqin arunakapax janiw ukham phuqaskaspati (Isaías 41:23). Uka tuqinakat juk'ampi yatxatt'añatakixa ¿Kunsa Bibliax chiqpachapuni yatichi?, ukat ¿Existe un creador que se interese por nosotros?, siski uka libronaka uñxatt'äta, Jehová Diosan Qhanañchirinakapan luratawa.

Bibliat yatxatasin sum amuyt'añamawa, ukatxa Diosaruw qullan ajayup mayisiñamaraki (Proverbios 15:28; Lucas 11: 9- 13). Diosan Arupax akham siwa: “Jumanakat maynitix jan yatiñ kankañapax utjkchi ukapachax, Diosat maypan, Diosasti juparux churaniwa. Jupasti jilarkirwa churi, khitirus jan kuns sasaw churaraki” sasa (Santiago 1: 5). Ukat Bibliat apst'at qillqatanak uñxatt'añaw wakisiraki. Ukatxa maynin yanapt'ataw juk'amp sum yatxataraksna, kunjamatix mä etiopex Felipempi yanapt'ayaskänxa ukhama (Hechos 8: 26- 35). Ukat khitinakatix Bibliat yatiqañ munapki ukanakaruxa, jan qullq mayisakiw Jehová Diosan Qhanañchirinakapax yatichasipki. Jumatï ukham yatiqañ munätaxa, kunapachas jupanakar jak'acht'asiskakismawa.

Jesusax Diosan arunakapwa yatiyäna, ukatwa jupar uñisipxäna, ukatxa arkirinakajax ukham uñisitäpxarakiniwa sasaw jupax säna. Mä kutixa, Jesusan yatichäwip ist'asaw jaqinakax wal muspharapxäna, ukampis uñisirinakapax akham sasaw uka jaqinakar sapxäna: “¿ Jumanakamppachat sallqjayasipxta? Jilïrinakatsa, ukhamarak fariseonakatsa ¿khitis juparux iyawsi?” sasa (Juan 7: 46- 48; 15:20). Yaqhipax janiw Jehová Diosan Qhanañchirinakapar sum uñt'apkiti, ukatwa jupanakampi Bibliat jan yatiqayañ munapkiristamti, jan ukax uñisiñatwa jark'asipxaspa. Ukampis jumax yatiqaskañamakiwa, Bibliat yatichapxiristamti janicha ukxa, juma pachpaw amuyasxañama (Mateo 7: 17- 20).

Jesusat yatiqasisaw ukham yatiyir sarapxi. Uka urunakanxa Diosan Arupat saranukusaw judionakax Diosar yupaychapxäna, ukampis Jesusax jupanakarus yatiyaskakïnwa, janiw yaqhachkänti (Mateo 15:1-9). Chiqansa, taqi chiqanwa jaqinakax kuna yupachäwirus sarapxapuni, yaqhipax cristianüpxtwa sapxiwa, yaqhipasti yaqha kasta yupaychäwinakaruw sarapxaraki. Ukampis ak amuyañasawa, taqiniw kunjamtï Diosan Arupax yatichki ukham chuymasan yatiqañasa. Ukatwa Jehová Diosan Qhanañchirinakapax jaqi masipar munasiñatxa Diosan arunakapat yatiyir sarapxi.

Chiqansa, janiw khitis mä yupaychäwirux ukhamaki sarañasäkiti, chuymasan chiqaw sistan ukhakiw mä yupaychäwir sarañasa, ukat payachasis sarañax janiw wakiskiti. Diosan Arupax akham sasaw cristianonakar qhanañchi: “Taqi kun yant'apxam, ukatsti kunatix askïki ukana katxarupxam” sasa (1 Tesalonicenses 5: 21). Ukhamasti, kuntï maynix iyawski ukaxa Bibliankañapawa. Amtañäni, mä sapa chiqa yupaychäwikiw utji. Uka tuqitxa Efesios 4:5 qillqatax akham siwa: “Mä sapa Tatitukiw utji, mä sapa iyawsaña, mä bautismokiraki” sasa. Ukampis jichhürunakanxa, walja thakiw utji, ukat taqi uka thakinakaw qhispiñar apistani sasaw jaqinakax sañ yatipxi, ukampis Jesusatakix uka amuyunakax janiw walïkänti. Ukatwa akham säna: “Jakañaru irpiri thakisti wali k'ullk'uwa, punkupas uka kikpa k'ullk'urakiwa, juk'anikirakiw ukarux mantapxi” sasa. Uka thaksa jikxatapkaspa ukhamwa Jehová Diosan Qhanañchirinakapax amuyapxi, jan ukhamäkaspaxa yaqha yupaychäwi thaqapxaspa (Mateo 7: 14).

Janiw jupanakax ukham amuyapkiti. Amtañäni, waljaniw jichhakamax Jehová Diosan jan Qhanañchiripäkasin jiwarawayapxi, ukampis jupanakax jaktanipxaniwa ukat mayampiw aka Uraqin jakasxapxani. Maysa tuqitxa, janïra ‘wali t'aqhisiñ’ urükipanwa waljanix Diosan chiqa yatichäwinakap tuqit sayt'asisin ukarjam sum sarnaqapxarakispa, ukhamata qhispiñataki. Ukat janiw jaqi masimar uñch'ukïtati sasaw Jesusax säna. Chiqansa, jiwasax janiw yaqhan chuymap yatksnati, Diosakiw uk sum yati. Jupax wali sumwa sapa maynir uñt'istu, ukat khuyapayasiñampiw uñjarakistu, ukhamasti jaqi masir uñch'ukiskañax janiw wakiskiti, Jesusakiw Diosan utt'ayatjamax uk luraspa (Mateo 7: 1-5; 24: 21; 25:31).

Tamar qullqimpi yanapt'añ tuqitxa akham sasaw apóstol Pablox säna: “Sapa mayniw, kunjämtï chuymapanxa amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa (2 Corintios 9: 7). Jehová Diosan Qhanañchirinakapax tantachäwinakansa, jach'a tantachäwinakansa janiw khitirus qullq mayipkiti. Ukampis qullqimpi yanapt'añ munirinakatakix cajanakaw utji. Ukhamasti janiw khitin ichuntt'atapas ni qhawqha churatapas yatiskiti. Yaqhipax walja irantt'apxi, yaqhipasti juk'ampikiw yanapt'apxaraki; ukat yaqhipax janirakiw irantt'apkiti. Ukampis janiw walja qullqi churañapunix askïkiti, kunjamtï Jesusax siskänxa, kuna amtampis churirjamäsax maynix churi ukaw juk'amp askixa. Ukhamwa Jesusax Jerusalén markankir templon churaskirinakat amuyt'ayäna (Lucas 21:1-4).

Diosan Apnaqäwipaw aka Uraqi paraisoptayxani siski uka yatichäwi maynix ist'ki, ukat chuymapar purt'i ukhaxa janiw ukhamaki qhiparkiti, jan ukasti wal uka suma yatiyäwxa yaqhanakar yatiyañ muni. Jumax ukhamaw jikxatasirakisma (Hechos 5: 41, 42).

Chiqansa, kunaymanitwa maynix cristianüxatap uñacht'ayaspa, ukampis Diosan arunakapat yatiyir sarki ukhaw Jesusan arkiripäxatapxa sum uñacht'ayi. Jesusax ‘chiqapawa, ukat kunsa chiqaparupuniw arsu’ sasaw Bibliax qhanañchi. Aka Uraqinkkasaxa “Diosan reinopaw jak'ankxi” sasaw yatiyäna. Ukat ukham lurapxäta sasaw arkirinakapar jaytawayäna (Apocalipsis 3: 14; Mateo 4: 17; 10: 7). Ukat akham sarakïnwa: “Taqi akapachankir jaqinakar yatiyir sarapxam [...]. Yatichapxarakim”, ukat “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki” sasa (Mateo 24: 14; 28: 19, 20).

Maynix kunaymanitwa Diosan Apnaqäwipat yatiyaspa. Inas munat masinakampis jan ukax yaqhanakampis parlt'añ munchispa. Ukat yaqhipax cartanaka qillqasinwa yaqhanakar apayapxaraki, ukat telefonot jawsasin yatiyirinakas utjarakiwa. Ukampis yaqhipax libronak jan ukax revistanakwa yatxatañ munir masinakaparux apayapxaraki. Ukampis janiw mä qhawqhaniruki yatiyañ munapkiti ukatwa Jehová Diosan Qhanañchirinakapax utat uta sarapxi.

Biblianxa taqiniruw akham saraki: “Qullan Ajayumpi Corderon esposapampisti siwa: ‘jutam’. Ist'irïki ukasti sarakpan ‘Jutam’ sasa. Khititix umat pharjayaski, ukat um munaraki ukax jutpan, jakañ umat inak umt'arakpan” sasa (Apocalipsis 22:17). Ukampisa, janiw khitis paraíso tuqitsa jan ukax ukan utjkani uka bendicionanakatxa pä chuyma yatiyir sarañapäkiti, jan ukasti taqi chuymaw sarañapa.

Chiqpachansa, jumax juk'ampwa Jehová Diosan Qhanañchirinakapatsa yatichäwinakapatsa yatiñ munpachätaxa. Inas kuna tuqitsa payachassta jan ukax mayjsa amuysta, uka tuqinakatwa parlt'añ munpachätaxa. Nanakax ukhamarakiw jumarux ukham sum qhanañcht'añ munapxsma, ukampis janiw aka qillqatarukix mantkaspati, ukhamasti inas utam jak'ankïr Jehová Diosan Qhanañchirinakapan Tantachasiñ Utapan jupanakampi parlt'chisma, jan ukax utamar jutapkani ukhasa jupanakampix parlt'arakchisma. Maysa tuqitxa, markamankir sucursalaparuw mä carta tuqi jiskt'asirakisma, aka manqhanwa kawkirus apayasma ukax uñsti.

Direccionanaka