¿Khitis Supayaxa?

1. Supaya jan ukax “Diablo” aruxa yaqhanakat jan wali k’arinak parliri sañ muni. “Satanás” arusti uñisiri jan ukaxa kutkatasiri sañ munaraki. Aka arunakampi uñt’atawa Diosan jach’a uñisiripaxa. Qalltanxa suma angelänwa, alaxpachanwa Diosampi qamasïna ukatxa jach’a jach’aw tukxäna, Diosjama yupaychayasiñwa munxäna (Mateo 4:8-10).

2. Supayasti mä asirumpiwa Evar arxayäna ukat k’arimpi k’arimpiwa Diosar jan ist’aykänti. Ukhamatwa Supayax Diosan “jach’a kankañaparu” qallasitayna. Diosaxa janiw sum apnaqkiti, janiw jaqinakan sumankañapsa munkiti sasaw payachasiyatayna. Ukatxa, khiti jaqisa Diosat jithiqtakispawa sarakitaynawa. Ukham lurasawa Diosan uñisiripar tukutayna. Ukatwa Supay Satanás sataxa (Génesis 3:1-5; Job 1:8-11; Apocalipsis 12:9).

3. Satanasaxa yupaychayasiñatakiwa jaqinakar sallqji (2 Corintios 11:3, 14). Mä tuqitxa k’ari yupaychäwinakampiw sallqji. Diosata k’arinak yatichiri yupaychäwinakaxa Supayan munañapwa lurasipki (Juan 8:44). Inasa k’ari yupaychäwinkiri jaqinakaxa chiqpach Diosaruwa yupaychasipkta sapxchispa, ukampisa Supayaruw luqtasipki, jupawa ‘akapachan diosapaxa’ (2 Corintios 4:4).

K’ari yupaychäwinakasa, layqasiñanakasa ukat kasta tuqit jach’achasiñanakasa jaqinakaruw sallqji

4. Layqasiñanakampiwa Satanasax jaqinakar apnaqaraki. Yaqhipanakaxa inasa ajayunakaru jawsapxchispa jan walinakat jark’aqayasiñataki, yaqhanakaru jan walt’ayañataki, qhipürunakata yatiñataki jan ukax milagronak lurañatakisa. Satanasawa taqi ukanakxa lurayi. Diosar kusisiyañ munasaxa janipuniw kunäkipansa ukanakxa lurañasäkiti (Deuteronomio 18:10-12; Hechos 19:18, 19).

5. Supayaxa kasta tuqit jach’achasiñanakampi ukat politicaru mitisiñampiwa jaqinakar sallqjaraki. Yaqhipanakaxa markapasa jupasa yaqhanakat sipan wali sumäkaspa ukham amuyasipxi. Ukax janiw chiqäkiti (Hechos 10:34, 35). Yaqhanakasti politiconakaw jan walt’añanak askichani sapxarakiwa. Ukhamatwa Diosan Apnaqäwipa maysaru apanukupxi, uka Apnaqäwikiwa taqi jan walt’äwinakasxa askichaspa (Daniel 2:44).

Jehová Diosata yatiqasa Satanasaru atipjma

6. Jucha lurañanakar wiytasaw Supayaxa jaqinakar sallqjañ yatiraki. Uka jan wali luräwinakax jan walinakaruw puriyistaspa, uk yatisaw Jehová Diosaxa ukanakat jithiqtapxam sistuxa (Gálatas 6:7, 8). Yaqhipanakax jupanakamp chika jan walinak lurañamwa munapxaspa. Ukat ak amtañamawa, Supayaw ukanak lurañam munaski (1 Corintios 6:9, 10; 15:33).

7. Jehová Diosat jithiqtañamatakiwa Supay Satanasax arknaqayiristam jan ukax uñisiyiristamxa. Bibliat yatiqaskatamatxa inasa familiaranakamaxa wal phiñasipxchispa, yaqhanakasa larusipxchispa. Ukampisa, ¿khitis jakañ churtamxa? Supayax Jehová Diosata jan yatiqaskakiñamatakiwa sustjañ muntamxa. Jan atipayasimti (Mateo 10:34-39; 1 Pedro 5:8, 9). Supayaru atipjasaxa, Jehová Diosaruw kusisiyäta, ukatxa Apnaqäwiparu atinisitamwa uñacht’ayarakïta (Proverbios 27:11).

Copyright © 2007 Watch Tower Bible and Tract Society of Pennsylvania. All rights reserved.