Diosan uñisit luräwinaka

1. Diosan yupaychirinakapax kunatï walïki ukxa munasipxiwa, ukat kunatï jan walïki ukxa uñisipxañapawa (Salmo 97:10). Ukhamax Diosan uñisit jan wali luräwinakxa janiw lurapxañapäkiti. ¿Kawkïris ukanakaxa?

2. Q’añu lurañanaka: Janïr jaqichatäkasin ikintasiñasa, jaqichatäxasin yaqhanakampi ikintasiñasa, uywanakampi q’añu lurañasa, familiaranakampi sarnaqañasa ukat chachapura warmipura q’añunak lurañasa Diosatakixa wali jach’a juchawa (Levítico 18:6; Romanos 1:26, 27; 1 Corintios 6:9, 10). Jan casaras chikthapitanakaxa jaljtapxañapawa jan ukax casarasipxañapawa (Hebreos 13:4).

Machañsa, lunthatasiñsa, qullqit anatañsa, nuwasiñsa Diosax uñisiwa

3. K’arisiña, qullqit anataña, lunthatasiña: Jehová Diosax janiw k’ariskaspati (Tito 1:2). Ukat Diosampi iyawsatäñatakixa janiw k’arisipxañapäkiti (Proverbios 6:16-19; Colosenses 3:9, 10). Qullqit anatañanakaxa qullq juk’amp munayiriwa. Cristianonakaxa ukatwa lotería, bingo satäkisa ukanakan jan anatapkiti, ni caballo t’ijurinakatsa apuestapkiti, janirakiw ukanakar uñtasita jan walinaksa lurapkiti (Efesios 5:3-5). Janiw lunthatäpkiti, ni lunthatatanaksa yatkasa alapkaspati, janirakiw jan kamsasa kuns apasipkaspati (Éxodo 20:15; Efesios 4:28).

4. Phiñasiña, nuwasiña: Colerasiñaxa nuwasiñaruw apistaspa (Génesis 4:5-8). Nuwasirinakax janiw Diosampi sum apasipkaspati (Salmo 11:5; Proverbios 22:24, 25). Jan wal lurkatas janiw ukhamat ukham kutt’ayañasäkiti (Proverbios 24:29; Romanos 12:17-21).

5. Layqasiñanaka: Yaqhipanakaxa ajayunakaruw jawsapxi qullayasiñataki. Yaqhipanakasti yaqhanakaruwa layqxayapxi usuntañapataki jan ukax jiwañapataki. Satanasaw taqi ukanakxa lurayi. Ukhamaxa janiw cristianonakax ukanak lurapxañapäkiti (Deuteronomio 18:9-13). Layqanakata jark’aqasiñatakixa Jehová Diosar jak’achasiñasawa (Proverbios 18:10).

6. Machantasiña: Vino, alcohol jan ukax cerveza mä juk’a umt’añaxa walikïskiwa (Salmo 104:15; 1 Timoteo 5:23). Ukampisa jiljañasa machjasiñasa Diosatakixa juchawa (1 Corintios 5:11-13; 1 Timoteo 3:8). Sint umasaxa usuntasmawa ukatxa familiamsa jan waliruwa apt’asma. Ukatxa, yaqha juchanakaruw purt’asirakismaxa (Proverbios 23:20, 21, 29-35).

7. Diosax janiw walïkiti siski ukanak lurir jaqinakax “janiw Diosan reinopanxa katuqatäpkaniti” (Gálatas 5:19-21). Chiqapuni Diosar munassta ukat kusisiyañ munsta ukhaxa uka jan walinakxa apanukxätawa (1 Juan 5:3). Kuntï Diosaxa janiw walïkiti siski ukxa uñisiñamawa (Romanos 12:9). Sum sarnaqirinakampi sarnaqañamawa (Proverbios 13:20). Yatxatat cristiano masinakasaw wal yanapt’apxistaspa (Santiago 5:14). Ukat Diosat mayisiñamapuniwa ukaw wal yanapt’ätamxa (Filipenses 4:6, 7, 13).

Copyright © 2007 Watch Tower Bible and Tract Society of Pennsylvania. All rights reserved.