I bɛ se ka diinɛ lakika dɔn cogo di?

1. Yesu ye Krecɛn diinɛ lakika kelen de sigi. O kosɔn, bi bi in na, Jehowa Ala batobaga lakikaw ka kan ka kɛ farikolo walima kulu kelen dɔrɔn de ye. (Yuhana 4:23, 24; Efesekaw 4:4, 5) Bibulu b’a fɔ ko mɔgɔ damadɔw dɔrɔn de bɛ ɲɛnamaya sira koronnen kan.—Matiyu 7:13, 14.

2. Bibulu tun y’a fɔ ko cidenw ka saya kɔfɛ, kalansira fuw ni kɛwale minnu tɛ Krecɛn kɛwalew ye, k’olu bɛna don dɔɔnin dɔɔnin Krecɛnw ka jɛkulu la. Cɛ dɔw bɛna dannabagaw lafili walasa dannamɔgɔw ka tugu olu kɔ sanni u ka tugu Yesu kɔ. (Matiyu 7:15, 21-23; Kɛwalew 20:29, 30) O de kosɔn, an ɲɛ bɛ diinɛ sifa caman na minnu b’a fɔ k’u ye Krecɛn diinɛ ye. An bɛ se ka Krecɛn lakikaw lasaa cogo di?

3. Krecɛn lakikaw bɛ dɔn tagamaseere fɔlɔ min fɛ, o ye kanuya jɔnjɔn ye u ni ɲɔgɔn cɛ. (Yuhana 13:34, 35) U ma kalan k’a miiri k’u ka fisa ni siya wɛrɛ mɔgɔ ye, walima ni fara ɲɛ wɛrɛ mɔgɔ ye. U ma kalan fana ka jamana wɛrɛw mɔgɔw kɔniya. (Kɛwalew 10:34, 35) O de y’a to u sen tɛ kɛlɛw la. Krecɛn lakikaw bɛ ɲɔgɔn minɛ i n’a fɔ balimakɛw ni balimamusow.—1 Yuhana 4:20, 21.

Krecɛn lakikaw bɛ ɲɔgɔn kanu; u bɛ Bibulu bonya; u bɛ wajuli kɛ Ala ka Masaya ko la

4. Diinɛ lakika bɛ dɔn tagamaseere min fana fɛ, o ye k’a kɔnɔmɔgɔw bɛ bonyaba da Bibulu kan. U bɛ sɔn Bibulu la iko Ala ka kuma, wa, a bɛ min fɔ, u dalen bɛ o fana na. (Yuhana 17:17; 2 Timote 3:16, 17) Ala ka kuma nafa ka bon u bolo ka tɛmɛ hadamaden ka miiriyaw, walima u ka laadaw kan. (Matiyu 15:1-3, 7-9) U b’a ɲini don o don k’u ka ɲɛnamaya kɛ ka bɛn Bibulu ma. O la sa, u tɛ wajuli kɛ fɛn dɔ kan ka tila ka fɛn wɛrɛ kɛ.—Tite 1:15, 16.

5. Diinɛ lakika ka kan fana ka Ala tɔgɔ bonya. (Matiyu 6:9) Yesu ye mɔgɔ wɛrɛw ladɔnniya Ala tɔgɔ la, n’o ye Jehowa ye. Krecɛn lakikaw ka kan k’o de kɛ. (Yuhana 17:6, 26; Romɛkaw 10:13, 14) Mɔgɔ jumɛnw bɛ Ala tɔgɔ fɔ mɔgɔ wɛrɛw ye i sigida la?

6. Krecɛn lakikaw ka kan ka wajuli kɛ Ala ka Masaya ko la. Yesu y’o de kɛ. A tun bɛ kuma Masaya kan tuma bɛɛ. (Luka 8:1) A ye ci di a ka kalandenw ma walasa u k’o cikan kelen wajuli kɛ dugukolo bɛɛ kan. (Matiyu 24:14; 28:19, 20) Krecɛn lakikaw dalen b’a la ko Ala ka Masaya dɔrɔn de bɛ na ni hɛrɛ ni lafiya lakikaw ye nin dugukolo in kan.—Zaburu 146:3-5.

7. Yesu ka kalandenw tɛ nin diɲɛ jugu in ta ye. (Yuhana 17:16) U sen tɛ diɲɛ politikikow la walima sɔsɔlikow la minnu bɛ hadamadenyako kan. Taamacogo, kɛwalew ni jogo jugu minnu jɛnsɛnnen bɛ diɲɛ kɔnɔ, u b’u tanga olu bɛɛ ma. (Yakuba 1:27; 4:4) Ikomi Krecɛn lakikaw bɛ dɔn nin tagamaseerew de fɛ, yali i bɛ se ka diinɛ jɛkulu dɔ lasaa i sigida la o tagamaseerew bɛ min na wa?

Copyright © 2006 Watch Tower Bible and Tract Society of Pennsylvania. All rights reserved.