Jehowa Seerew labɛnnen bɛ cogo min na

1. Jehowa Seerew ka bi jɛkuluba daminɛna san 1870 masurunna na an tile la. U tun bɛ wɛlɛ Bibulu Kalandenw. Nka, san 1931 na, u ye Jehowa Seerew tɔgɔ ta, tɔgɔ min bɛ bɔ Bibulu kɔnɔ. (Esayi 43:10) K’a sɔrɔ u tun man ca a daminɛ na, u cayara ka kɛ Seere miliyɔn caman ye sisan. O Seere cɛsirilenw bɛ wajuli la jamanaw na minnu ka ca ni 230 ye.

2. Jehowa Seerew ka jɛkulu fanba la, u bɛ lajɛw kɛ siɲɛ saba dɔgɔkun o dɔgɔkun. A ɲininen bɛ i fɛ i ka na o lajɛw la. (Heburuw 10:24, 25) U ka kalan bɛɛ sinsinnen bɛ Bibulu kan. Lajɛw bɛ daminɛ ni deliliw ye, wa, u bɛ laban fana ni delili ye. O lajɛ caman na, ‘Ala sira dɔnkiliw’ bɛ da ni dusukun ye. (Efesekaw 5:18, 19) O yɔrɔ donni ye fu ye, wari deli tɛ kɛ mɔgɔ fɛ.—Matiyu 10:8.

3. Jɛkulu caman b’u ka lajɛw kɛ Masaya So kɔnɔ. Tuma caman na, Seerew b’a bɔ u yɛrɛ la k’u jɔ so gansan dɔ cogo la. I tɛna ja dɛsɛlenw, kuruwaw walima o fɛn ɲɔgɔn si ye Masaya So kɔnɔ. Mɔgɔw b’a bɔ u yɛrɛ la ka bolomafara minnu di, olu de bɛ kɛ ka musakaw bɔ. Mɔgɔ minnu b’a fɛ ka bolomafara di, buwati bɛ yen o kama.—2 Kɔrɛntekaw 9:7.

4. Maakɔrɔw walima lakɔlɔsibagaw bɛ jɛkulu kelen-kelen bɛɛ kɔnɔ. U bɛ kalan ɲɛminɛ jɛkulu kɔnɔ. (1 Timote 3:1-7; 5:17) Cidenyabaara magannaw b’u dɛmɛ. (1 Timote 3:8-10, 12, 13) O cɛw man fisa ni jɛkulu mɔgɔ tɔw ye. (2 Kɔrɛntekaw 1:24) Bonya tɔgɔ kɛrɛnkɛrɛnnen t’u la. (Matiyu 23:8-10) U tɛ finiw don minnu b’u danfara ka bɔ tɔw la. U tɛ sara fana u ka baara la. Jɛkulu maakɔrɔw labɛnnen bɛ ka jɛkulu mago ɲɛ alako ta fan fɛ ni nisɔndiya ye. U bɛ se ka mɔgɔ dusu saalo. Ni kunkow bɛ mɔgɔ dɔ la, u bɛ se fana k’o tigi bilasira.—Yakuba 5:14-16; 1 Piɛre 5:2, 3.

5. Jehowa Seerew bɛ jamalajɛw kɛ fana san o san. O tumaw na, jɛkulu caman b’u lajɛ walasa ka jɛmukan kɛrɛnkɛrɛnnenw lamɛn minnu sinsinnen bɛ Bibulu kan. Kalanden kuraw ka batɛmu bɛ kɛ jamalajɛ kelen-kelen bɛɛ la.—Matiyu 3:13-17; 28:19, 20.

6. Jehowa Seerew ka tɔnsigiyɔrɔsoba bɛ New York. Ɲɛmɔgɔya Kulu sigilen bɛ yen. O kulu kɔnɔmɔgɔw ye jɛkulu maakɔrɔw ye minnu bɛ ko caman dɔn. Olu de bɛ jɛkuluw bɛɛ ɲɛminɛ. Tɔnbolofaraw fana ka ca ni 100 ye diɲɛ kɔnɔ. O sow kɔnɔ, baarakɛlaw bɛ dɛmɛ don walasa sɛbɛn minnu sinsinnen bɛ Bibulu kan, olu ka se ka dilan, ka ci. Wajuli baarako fana bɛ labɛn o yɔrɔ de la. Tɔnbolofara baaradaw min ka surun i la, i bɛ se ka taa o lajɛ. Mun na i tɛna i labɛn o kama?

Copyright © 2006 Watch Tower Bible and Tract Society of Pennsylvania. All rights reserved.