Yesu Kristo a Ŋa?

1. Yesu köju a gwoloŋ i ’diko a ŋuto mulökötyo i ŋerot na po nanyit kak ni. Lepeŋ a ŋo logon Ŋun a gwe a kokwe, ko ŋina kwe a luŋuni a Ŋuro ‘pilili’ lo Ŋun. (Kolosai 1:15, NW; Kweyatti 3:14) Yesu logwon a Ŋuro geleŋ tuŋ logon Ŋun komugun a gwe. Yekowa tokitaju Yesu i diŋit na gwondi lepeŋ ki nu gwoso ‘kakitanit bodo’ i gweja na ŋo liŋ logwon ki ko kak ni. (Tolupesi 8:22-31, NW; Kolosai 1:16, 17) Ŋun köti a tokita lepeŋ gwoso kanyönyökönit Lonyit lo kokwe. Ŋina a kwe na luŋuri Yesu a “Kulyaet.”—Yoane 1:1-3; Kweyatti 19:13.

2. Ŋun a sunyun Ŋuro Lonyit kak ni i wusundya na gwiliŋit nanyit i pele na Maria. Nyenagon Yesu ’bak monye logon a ŋuto. Ko ŋina kwe lepeŋ ako rutundya toron kwöŋ kode tomunyan. Ŋun a sunyun Yesu kak ni ko kusik ti kulya musala: (1) I todinökindyö na yi to’diri na Ŋun (Yoane 18:37), (2) anyen ’depakindya go i kondya na ’dekesi ti Ŋun, a kwekindye miret nagon yi kepoddu nye (1 Petero 2:21), a ko (3) putukindyö na gwiliŋet nanyit a rubaŋga anyen yukuundyö yi i gwon a lui i kulya ti toron ko twan. Kwe a nyo ŋina ’de’dekarikin?—Matayo 20:28.

3. I laundya na saret lo Ŋun, ŋuto lo kokwe, Adama, a kondya ŋo nagon Bibilia luŋgu a “toron.” Nyenagon a Ŋun ’duŋökindye lepeŋ putet lo twan. (Suluet 3:17-19) Lepeŋ tene bulö temakindya i saresi ti ’busan na Ŋun, lepeŋ tene gwon a loke köti. A lepeŋ doŋgi doŋga madaŋ madaŋ a twane twan. Adama a puputun toron i ŋwajik kanyit liŋ. Ko ŋina kwe yi köti dodoŋga, gigilö, a twane twan. Ŋutu lo gwogwoloŋ lwöke ada?—Roma 3:23; 5:12.

4. Yesu köju a ŋuto lo ’bak toron gwoso na suluji Adama nu. Kökö Adama, ama, Yesu a ’dep saresi ti Ŋun gwogwo ’bak toron i loki na temesi na bot parik. Ko ŋina kwe lepeŋ lo jukin i putukindya ru nanyit na ŋuto loke a rubaŋga na ropanikin toron na Adama. Ŋina a ŋo nagon Bibilia luŋgu a “daket.” A ŋwajik ti Adama bulöne bulö dake i putet na twan. Ŋutu liŋ logon a tikindya yupet ko Yesu bubulö pitöki toronjin kase anyen ryöju gwiliŋet na yeŋ nyin.—1 Timoteo 2: 5, 6; Yoane 3:16; Roma 5: 18, 19.

Kita na Yesu na tokujö morakindya lukata todindyö, kondya na söresi, a ko köti tikindya na gwiliŋet nanyit kogwon kulya kayaŋ

5. Na gwondi Yesu kak ni nu lepeŋ a tuŋaju ŋutu lo gilö, tunyöju lo magora, ko a toligga libibiöt. Lepeŋ köti a toŋiju lo twatwa. Kwe a nyo na kondi lepeŋ söresi? (1) Lepeŋ a won konyen ko ŋutu lo dara, köti a yöŋö ŋarakindya na lepeŋat. (2) Söresi ti lepeŋ tikindya kwiyet na kweja adi lepeŋ a Ŋuro lo Ŋun. (3) Kine kwekindya ŋo nagon lepeŋ mo kokonakin ŋutu lo yiŋga saresi i diŋit na sarji nye a Mor loki na kak ’bukuluŋ nu.—Matayo 14:14; Marako 2:10-12; Yoane 5:28, 29.

6. Yesu a twan a Ŋun toŋiundi lepeŋ i twan i gweyari lo mulökötyo, a lepeŋ yitöni i ’diko. (1 Petero 3:18) Suluja i ŋinu diŋit, Ŋun aje tikin lepeŋ a Mor. Ti gwon pajo a Yesu ’dumadi kaŋo konesi narok, a ko ŋoŋga i kak ni.—Saumajin 37:9-11; Tolupesi 2:21, 22.

Copyright © 2006 Watch Tower Bible and Tract Society of Pennsylvania. All rights reserved.