Gwiliŋet Lo ’Baŋ Logon Tulyöŋgu Ŋun

1. Bibilia na kulya adi lalet logwon a kwe na ’baŋ nanyit. (1 Korinto 11:3) Ŋuto lalet agu ködyö gwon ko nakwan geleŋ ka’de. Lepeŋat ködyö totoyem i kiko lo rigwo gwoso ’deket na saret lo miri.—1 Timoteo 3:2; Tito 3:1.

2. Lalet ködyö nyanyar narakwan nanyit gwoso na nyarji nye mugun nanyit na. Lepeŋ ködyö ’dep nye gwoso na ’debi Yesu kakepok kanyit nu. (Epeso 5:25, 28, 29) Lepeŋ ködyö ti ’biddyö narakwan nanyit asut kode konakin nye arabat i lele kiko. Kölum, ti lepeŋ bu’ye ko ti kuke kuk nye.—Kolosai 3:19; 1 Petero 3:7.

Monye logon a kanyaranit titin ’baŋ nanyit ŋo ti mugun ko ti mulökotyo

3. ’Dek ti monye kitani parik i ruruga na ’baŋ nanyit. Lepeŋ agu ködyö titikin narakwan nanyit se ko ŋwajik kanyit kinyo, boŋgwat, ko kadi. Monye agu ködyö köti titikin ’baŋ nanyit ’dekesi kase ti mulökötyo. (1 Timoteo 5:8) Nye lo ’do’ya i ŋarakindya na ’baŋ nanyit i jujumbu na kulya ti Ŋun ko ’dekesi Kanyit.—Nyökit 6:4-9; Epeso 6:4.

4. Narakwan ködyö gwon a kaŋaranit na’but na lalet lonyit. (Suluet 2:18) Ti nye ŋaraki ŋarakin lalet lonyit i todindyö ko i tojumbu na lupudiet kase. (Tolupesi 1:8) Yekowa ’de’dekuri adi ti narakwan ruruke ruruk ’baŋ nanyit ko nyarju. (Tolupesi 31:10, 15, 26, 27; Tito 2:4, 5) Ti lepeŋ ködyö gwe ko kuket duma ko lalet lonyit.—Epeso 5:22, 23, 33.

5. Ŋun ’de’dekuri ŋwajik i twöju na kayuŋwök kase. (Epeso 6:1-3) Lepeŋ yendu kayuŋwök i sarju ko i ririkindyö na ŋwajik kase. Kayuŋwök ködyö gwon ko diŋit nagon se sisi’dari ko ŋwajik kase i pirit na geleŋ ko i jujumbu na Bibilia, ko ruruga se i ’dekesi kase ti mulökötyo ko ti yeyeesi ti töilyet. (Nyökit 11:18, 19; Tolupesi 22:6, 15) Kayuŋwök ködyö ti ririŋga ŋwajik kase i kiko lo ŋoma ko tukaŋan asut.—Kolosai 3:21.

Ŋun a yinikin kayuŋwök i sarju na ŋwajik kase ko i ririkindyö nase

6. Ko ŋutu lo toyem kata ko yöyöŋesi kase kiden, ti se mörji tokitaju kukuesi ti Bibilia. Bibilia na ririŋakindya yi i kweja na nyarju ko i töpitökin. (Kolosai 3:12-14) Kulyaet lo Ŋun lo ti jujukindya adi rekin nye na gwon a kiko lo tetenani yöyöŋesi na ’di’dik. Ama nakwan ko a ’dekan bubulö wulundyö kö’yu lalet lonyit ko (1) lepeŋ ko kwe naggo a rerenya ŋarakindya ’baŋ nanyit, (2) lepeŋ a kaŋa parik tindu nye gwon ko kujönö i kulya ti ’busan nanyit na mugun ko ru nanyit, kode (3) ’dö’döju nanyit na a duma parik ko ti bulö rukökindyö nye i kwakwadu na Yekowa.—1 Korinto 7:12, 13.

7. Ŋutu lo toyem ti gwe ko toyinikin ko ’börik. Lubö a toron ko Ŋun i komoŋ ko i komoŋ na lalet ilot kode narakwan inot na yema. (Ebere 13:4) Tokitaju na toro’bo yuŋwesi i koke na yema nye geleŋ nagon a kwe i Wuröt na rukökinikin narakwan kode lalet i yandu a gwe a luitöt i yemba kode i yema köti. (Matayo 19:6-9; Roma 7:2, 3) Yekowa maman ŋutu lo yandu ’bak kusik ti kulya nagon i lukata na Wuröt a yembi nene kode a yemani ko lele köti.—Malaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.