 |
Beliefs | Future | Medical | Topics | Contact Us | Publications | Languages |
| Ŋun ’Dek Nyo Kayaŋ? | Todinet 14  |
Tetenesi ti Katokorok ti Yekowa Kona Ada |
|
 |
Katokorok ti Yekowa ti diŋit na soŋinana suluja nanu? (1) |
|
Momoresi ti Katokorok ti Yekowa todinörikin ada? (2) |
|
Gurut ŋariesi ryöi ya? (3) |
|
Ŋa logwon a ka’dolanit lo kwe i piritön geleŋ geleŋ ti lomomorja? (4) |
|
Kunen momoresi dumalak nagon kokona temba i kiŋa? (5) |
|
Nan kita nagon kokona i pirit nase duma kitaet ko i kenia kase? (6) |
1. Katokorok ti Yekowa ti diŋit na soŋinana suluja i kiŋa to 1870. A kokwe, lepeŋat luŋu a Kajujumuk ti Bibilia. Ama i kiŋa 1931 lepeŋat a ’dumakin ’börik karin nagwon i Wuröt luŋu a Katokorok ti Yekowa. (Yisaya 43:10) I suluesi na’di’dik ŋina tetenet aje ’durjö a milionyon ti Katokorok, logon kikita parik i tokujö i jurön lwölwöŋ 230. 
2. Najore ti lomomorja ti Katokorok ti Yekowa gwon ko momoresi daŋin musala temba i jima geleŋ. Do a luŋu anyen po i nene na kine. (Ebere 10:24, 25) Bibilia nye nagwon a gwo’diet na ŋo na totodinö. Momoresi liŋ ŋai ko kinu ko kwaset. “Kölisi ti mulökötyö” logon ’bo’bo töili köti yoyolo i najore ti kine momoresi. (Epeso 5:18, 19, NW) Lupörikin kana, ’duma na gurut ’bayin.—Matayo 10:8. 3. Najore ti lomomorja kondya momoresi i Kadi na Tumatyan. I diŋitan liŋ kine a kadijik na ’dukö pölilyö ko Katokorok lo wulundyö ’börik ka’de. Do ti met nyimuejin, kode kurusejin na ’di’dik, kode ŋo gwoso kine i lukata na Kadi na Tumatyan. Kitaesi na kona ko gurut ropa ko ’dokesi nagon a ’dume gwoso nagon töiliet kase a ’deggi na. Nyena ŋutu logon ’de’dekan tindu ’dokesi, sanduk gubbet na ’dokesi kata.—2 Korinto 9:7.
4. I geleŋ geleŋ na lomomorja, temejik kata, kode kamemetak. Lepeŋat lo ’do’ya kwe i tödindyö na lomomorja. (1 Timoteo 3:1-7; 5:17) Lepeŋat ŋaŋaraki ko kalipönök kakitak. (1 Timoteo 3:8-10, 12, 13) Kilo ŋutu ako ’biluji ki anyen gwon i loki na kulye ti lomomorundya. (2 Korinto 1:24) Lepeŋat ako tiki karin ’bu’busesi na ka’de. (Matayo 23:8-10) Lepeŋat ti jupu ka’de ko kulye kulo. Lepeŋat köti ti ropa i kita nase. Gwoso na wulundi se ’börik na kilo temejik gwon i meddya na ’dekesi ti mulökötyö ti lomomorja. Lepeŋat bubulö tindu sukesi ko gayesi i diŋitan yöyöŋesi.—Yakobo 5:14-16; 1 Petero 5:2, 3. 5. Katokorok ti Yekowa köti kata ko momoresi dumalak temba i kiŋa. I kine diŋitan lomomorja jore po i pirit na geleŋ i todinö na Bibilia. Batisa na kajujumuk ludukö gwon a lele swöt lo diŋitan liŋ ti tetenet na momoret duma kode na momoret duma parik.—Matayo 3:13-17; 28:19, 20. 6. Laŋet duma na kak ’bukuluŋ na Katokorok ti Yekowa nu New York. Teŋ na Kasarak gwon nyu, teŋ nagwon i kiden na temejik logon a kurundyö parik lo memeddya i loki na lomomorja ti kak ’bukuluŋ. Köti piritön kitaesi ti kenia na lwöŋgu 100 kata i kak ’bukuluŋ. I kine piritön, ŋutu lo wulundyö ’börik ka’de ŋaŋarakindya i kulya ti wurö ko kora na bukön ti Bibilia. Kiko kata köti logon a tiki anyen tetenani kita na tokujö. Nyo do ti galundya diŋit nagon do ’yö’yi pirit kitaet na kene nagon nyona ko do?
|
|||
Wurö i kiŋa 1998 |
 |
Copyright © 2006 Watch Tower Bible and Tract Society of Pennsylvania. All rights reserved. |
|
