Siisay an Diablo?

1. An terminong “diablo” nangangahulogan nin saro na nagtataram nin maraot na mga kaputikan manongod sa iba. An “Satanas” nangangahulogan nin kaiwal o paratumang. Ini mga termino na itinao sa pangenot na kaiwal nin Dios. Kan primero, sia sangkap na anghel sa langit kaiba nin Dios. Minsan siring, paghaloyhaloy sobra na an pagheling nia sa sadiri asin gusto na niang kamtan an pagsamba na tama sanang para sa Dios.—Mateo 4:8-10.

2. An anghel na ini, si Satanas, kinaolay si Eva paagi sa sarong halas. Paagi sa pagtaram nin mga kaputikan ki Eva, nakombensir nia si Eva na makisuway sa Dios. Sa siring inatake ni Satanas an inaapod na “soberaniya” o posisyon nin Dios bilang an Kaharohalangkawe. Ibinugtak ni Satanas sa pagduda kun baga an Dios namamahala sa paaging maninigo asin sa pinakaikararahay kan Saiyang mga sakop. Nagpalataw man si Satanas nin mga pagduda kun baga an siisay man na tawo magdadanay na maimbod sa Dios. Sa paggibo kaini, ginibo ni Satanas an saiyang sadiri na kaiwal nin Dios. Iyan an dahelan na sia inapod na Satanas na Diablo.—Genesis 3:1-5; Job 1:8-11; Kapahayagan 12:9.

3. Pinagmamaigotan ni Satanas na dayaon an mga tawo na sumamba sa saiya. (2 Corinto 11:3, 14) An sarong paagi na ilinalagalag nia an mga tawo iyo an falsong relihion. Kun an sarong relihion nagtotokdo nin mga kaputikan manongod sa Dios, sa katotoohan iyan nakaootob sa katuyohan ni Satanas. (Juan 8:44) An mga tawong miembro nin falsong mga relihion tibaad odok na nagtutubod na sinda nagsasamba sa tunay na Dios. Alagad sa katotoohan sinda naglilingkod ki Satanas. Sia ‘an dios kan kinaban na ini.’—2 Corinto 4:4.

An mga tawo ilinalagalag nin falsong relihion, espiritismo, asin nasyonalismo

4. An espiritismo saro pang paagi na an mga tawo ipinaiirarom ni Satanas sa saiyang kapangyarihan. Sinda tibaad mag-arang sa mga espiritu na protehiran sinda, ipahamak an iba, ihula an ngapit, o gumibo nin mga milagro. Si Satanas an maraot na puersa sa likod kan gabos na gibong ini. Tanganing mapaogma an Dios, dapat na dai kita makilabot sa espiritismo.—Deuteronomio 18:10-12; Gibo 19:18, 19.

5. Ilinalagalag man ni Satanas an mga tawo paagi sa sobrang pag-orgolyo sa rasa asin pagsamba sa politikal na mga organisasyon. An iba naghohona na an saindang nasyon o rasa mas marahay kisa sa iba. Alagad ta ini bakong totoo. (Gibo 10:34, 35) An iba naglalaom sa politikal na mga organisasyon na rumesolber sa mga problema nin tawo. Sa paggibo kaini, isinisikwal ninda an Kahadean nin Dios. Iyan an solamenteng solusyon sa satong mga problema.—Daniel 2:44.

Labanan si Satanas paagi sa pagpadagos sa pag-adal manongod ki Jehova

6. An saro pang paagi na ilinalagalag ni Satanas an mga tawo iyo an pagtentar sa sainda paagi sa makasalan na mga horot. Sinasabihan kita ni Jehova na likayan an makasalan na mga gibo huli ta aram nia na iyan ikapahahamak niato. (Galacia 6:7, 8) An ibang tawo tibaad gusto na kamo umiba sa sainda sa siring na mga gibo. Pero girumdoma na sa katotoohan si Satanas an gusto na pagibohon kamo kan mga bagay na ini.—1 Corinto 6:9, 10; 15:33.

7. Tibaad gumamit si Satanas nin paglamag o pagtumang tangani na madara kamong bayaan si Jehova. An iba sa mga namomotan nindo tibaad maanggot na marhay ta kamo nag-aadal kan Biblia. An iba tibaad tuyaon kamo. Alagad kiisay nindo utang an saindong buhay? Gusto ni Satanas na takoton kamo tanganing umontok kamo sa pag-adal manongod ki Jehova. Dai nindo togotan na manggana si Satanas! (Mateo 10:34-39; 1 Pedro 5:8, 9) Paagi sa paglaban sa Diablo, mapaoogma nindo si Jehova asin ikapaheheling nindo na kamo nagsusuportar sa Saiyang soberaniya.—Talinhaga 27:11.

Copyright © 2006 Watch Tower Bible and Tract Society of Pennsylvania. All rights reserved.