Za ane Zambe?

1. Bôt b’akañe abui biôm. Ve Kalate Zambe a kate bia na NYA Zambe ane ve wuwua. Nye anga kôm biôm bise bi ne yôp a si. Nye étam bi ayiane kañ, amu nye anga ve bia ényiñ.—1 Becorinthien 8:5, 6; Nlitan 4:11.

2. Zambe abili abui biyôlé mese’esa, ve abili jôé da nde éne YEHOVA. Minkôñelane bekalate be Zambe miziñ mi nji bi jôé te amu bôt be nga tyendé de a futi NTI nge ZAMBE. Ve éyoñ Kalate Zambe a nga tiliban, jôé Yéhova émbe été bebé biyoñ 7000!—Nkôlan 3:15; Besam 83:18.

3. Yéhova a bili nyôl, ve nyôle jé énji bo ane énjañ. Kalate Zambe a jô na “Zambe ane nsisim.” (Jean 4:24) Nsisim ône ngum aval ényiñ j’adañ énjañ. Teke môt a binam éziñ a yene ya Zambe. Yéhova a too yôp, ve ane ngul ya yene mam mese. (Besam 11:4, 5; Jean 1:18) Mfufup nsisim ône jé? Ônji bo môt ane Zambe. Ône ngule Zambe a bo je mam.—Besam 104:30.

4. Kalate Zambe a kate bia avale môt Zambe ané. A liti bia na mefulu mé m’adañ yéné me ne nye’an, zôsôô, fek, a ngu. (Deutéronome 32:4; Job 12:13; Esaïe 40:26; 1 Jean 4:8) Kalate Zambe a kate fe bia na ane mvam, mbamba nlem, a yeme jamé, ane akap, a ôjibi. Aval ane bone mewôk, bi ayiane jeñ na bi vu nye.—Beéphesien 5:1, 2.

Bi aye’é za ane Zambe éyoñ bi afombô biôm anga té a éyoñ bi aye’é Kalate wé

5. Eyoñ bi akañe Zambe, ye bi ayiane kute bive’ela’a a be ngunemelan meboñ si a ye’elane bie? Momo! (Nkôlan 20:4, 5) Yéhova a jô na bi ayiane kañe ve nye étam. Anji kômbô kabane duma dé a jôm éfe nge môt mfe. Bive’ela’a bi se ngul ya volô bia.—Besam 115:4-8; Esaïe 42:8.

6. Aval avé bi ne yeme Zambe nya nyemane? Zen jia éne na bi fombô biôm anga té a tu’a fas jé bi aye’ele bia. Bitetéa bi Zambe bi aye’ele bia na abili ngul a fek abui. Nye’an wé w’ayené biôm bise anga té. (Besam 19:1-6; Beromain 1:20) Zen baa bi ne yem Zambe éne na bi ye’é Kalate wé. Emien a tu’a kate bia avale Zambe avé ané Kalate wé été. A kate fe bia ôsimesane wé a jé a yi na bi bo.—Amos 3:7; 2 Timothée 3:16, 17.

Copyright © 2006 Watch Tower Bible and Tract Society of Pennsylvania. All rights reserved.