Subu’u Zambe bebé meye’elan été

1. Meye’elan me ne minlañ wo laan a Zambe. Eyoñ wo laane nye, w’ayiane sili womien si. W’ayiane bo mban meye’elane, ndemben Zambe ébo mvôé jôé. Yéhova ane ngul alôté bia, ve da a vô’ôlô meye’elan mangan! Ye ône fo’o mban meye’elan?—Besam 65:2; 1 Bethessalonicien 5:17.

2. Meye’elan me ne ngab jia ya ékaña’a bi ave Zambe. Ajôte bi ayiane ye’elan fo’o ve Yéhova Zambe étam. Eyoñ Yésus anga too si va, a mbe a ye’elan fo’o ve ésa wé, sa môt mfe. Bi ayiane bo avale da. (Matthieu 4:10; 6:9) Ve jame da, bi ayiane ye’elan Zambe a jôé Yésus. Nalé a liti na bi asemé éto Yésus, a na bi bili mbunan metuna’a a nga ve.—Jean 14:6; 1 Jean 2:1, 2.

3. Eyoñ bi aye’elan, bi ayiane kate Zambe mam m’aso nlem wongan été. Bi nji yiane lañ meye’elan kalate meye’elan été nge kobô me nlô. (Matthieu 6:7, 8) Bi ne ye’elan éyoñ ése, vôm ase a été ése bi né. Zambe a wô’ô to’o meye’elan bi abo nlem été. (1 Samuel 1:12, 13) Bine jeñ vôm bine étam a vôm ane évôvoé éyoñ bi aye’elan.—Marc 1:35.

4. Avale mam avé ône ye’elan me Zambe? Mam mese me tii a amvôé dôé mia Zambe. (Bephilippien 4:6, 7) Meye’elan Yésus anga ve bia éve’ela’a m’aliti na bi ayiane ye’elane amu jôé Zambe a nkômban wé. Bi ne fe ye’elan amu bidi ya môs, a njaman mam abé mangan, a bine fe sili na Zambe a volô bia na bi bo te ku meve’ele me Satan. (Matthieu 6:9-13) Bi nji yiane ye’elan fo’o ve mfa’a wongan étam. Bi ayiane fe ye’elan mfa’a mam m’alat a nkômban Zambe.—1 Jean 5:14.

5. Ône ye’elan éyoñ ése nlem wôé wo tindi wo na ô ve Zambe akéva nge duma. (1 Minkañete 29:10-13) Wo yiane ye’elane éyoñ ése ô bili minjuk nge éyoñ mbunan wôé ône meve’ele été. (Besam 55:22; 120:1) Ene mvaé ya ye’elan éyoñ wo zu di. (Matthieu 14:19) Yéhova a yi na bi ye’elan “aval éyoñ ése.”—Beéphesien 6:18.

6. Bi ayiane dañe ye’elane éyoñ bi ate bo jam éne abé. Bi ayiane sili Yéhova na a ko bia éngôngo a jamé bia. Nge bi meme nye abé dangan bi ate bo a nge bi abo te ba’alane jamete, Zambe ane “avôle ya jamé.”—Besam 86:5; Minkana 28:13.

7. Yéhova a vô’ôlô ve meye’elane me bôt be ne zôsôô. Nge wo yi na Zambe a wô’ô meye’elane môé, wo yiane taté bo ane metiñ mé m’ajô. (Minkana 15:29; 28:9) Wo yiane sili womien si éyoñ w’aye’elan. (Luc 18:9-14) Enyiñ jôé j’ayiane liti na w’ayi nge Zambe a yalan meye’elan môé. W’éliti éyoñ éte na ô bili mbunan a na mam wo sili m’aso wo nlem été. Eyoñ éte étam Yéhova é yalane wo.—Behébreu 11:6.

Copyright © 2006 Watch Tower Bible and Tract Society of Pennsylvania. All rights reserved.