Zôvy mô Devoly?

1. Mpandenga sady mpagnaratsy ny hafa dikany “Devoly”. Dikany “Satana” ndreka rafy na mpanohitra. Zegny aby teny izakagna le tegna rafin-Jagnahary. Izio tamy voalôhany anjely tanteraka niaraka tamin-Jagnahary tagny an-dagnitra. Nagnambôny tegna be anefa izy tato afara, de tiany izy ndreka ivavahagna fô tsy Zagnahary le tegna managna zo amin-jegny.—Matio 4:8-10.

2. Nampiasa bibilava i Satana mbôra ikoragnana tamin’i Eva. Izikoà fa nandingàny i Eva de nanjary tsy nagneky an-Jagnahary. Namian’i Satana tsigny mafy tamin-jegny ny toeragna amy maha Farany Agnambo ananjy. Nanoin’i Satana koà zegny hahatônga ny ôlogna hisalasala ny amy fahezan-Jagnahary mitôndra, avakeo fizahanany zegny tegna mahatsara ny ôlogna. Nanoiny koà zegny hahatônga ôlogna hisalasala fô tsisy ôlogna tegna tsy hivadika amin-Jagnahary zegny. Izikoà fa nagnano anjegny i Satana de nanjary rafin-Jagnahary, sady nantsôvigna hoe Satana Devoly.—Genesisy 3:1-5; Joba 1:8-11; Apokalypsy 12:9.

3. Tian’i Satana fitahigna ny ôlogna mbôra aminjey hivavaka aminanjy. (2 Korintianina 11:3, 14) Fômba reka amitahany ôlogna ny fivavahagna tsy marigna. Izikoà fa mampianatra lenga mikasika an-Jagnahary ny fivavahagna reka, de tegna magnano raha tian’i Satana. (Jaona 8:44) Zareo mpivavaka amy fivavahagna tsy marigna reo matoky mafy fô mivavaka amy le tegna Zagnahary marigna zareo, kanefa i Satana no tegna itompoan-jareo, satrià izy “zagnaharin’izô tontolo izô.”—2 Korintianina 4:4.

Mamitaka ôlogna ny fivavahagna tsy marigna, ny mpagnaody, ny fagnamboniagna tanindrazagnan-tegna

4. Raha hafa ampiasen’i Satana koà ny ôlogna mpagnaody. Mety hagnantso raha tsy hita maso ny ôlogna mbôra hiarôvan-tegna, anolahagna ôlon-trafa, hampafantatra mialôha ny raha hoavy, sady agnanovagna raha mahamagnana. Izikoà tiantsika hampiravoravo Zagnahary, de tsy tôkony handeha velively amy mpagnaody antsika, satrià i Satana ny ambadika magnomià hery anjareo regny.—Deoteronomia 18:10-12; Asan’ny Apostoly 19:18, 19.

5. Voafitak’i Satana koà ny ôlogna izikoà fa mipoerapoera dila loatra mikasika firazagnany, avakeo izikoà fa magnatsaratsara antoko pôlitika. Heveriny sasany fô tsaratsara noho ny an’ôlon-trafa ny tanindrazany amboàny firazagnany, kanefa tsy marigna aby zegny. (Asan’ny Apostoly 10:34, 35) Tavandreny sasany hangalagna raha mampanahiragn’ôlombelogna ny antoko pôlitika. Tsy magneky ny Fanjakan-Jagnahary anefa zareo izikoà fa magnano anjegny, kanefa izio no tegna aodin-draha mampanahiragna antsika.—Daniela 2:44.

Sakano mafy i Satana amy fanohizanô mianatra mikasika an’i Jehovah

6. Fômba reka amitahan’i Satana ôlogna koà ny fagniriagna hagnano raha tsy manjary. Asen’i Jehovah magnalavitra raha fanoigna tsy manjary antsika, satrià fantany fô havoà mafy antsika zegny. (Galatianina 6:7, 8) Mety hitaômin’ôlogna hagnano raha tsy manjary karananjy koà anô. Kanefa alevo onogna fô i Satana no tegna mandrisika anô hagnano raha tsy manjary jiaby regny.—1 Korintianina 6:9, 10; 15:33.

7. Mety hampiasa fagninjehagna amboàna fanakanagna i Satana mbôrakoà anô hiala amy Jehovah. Mety ho vignitra be aminô mianatra Beboly ny havanô sasany. Mety hafoken’ôlogna koà anô. Tamin-jôvy anefa egnanô? Tian’i Satana ampitahôrigna anô mbôra aminjey iahagna mianatra raha mikasika an’i Jehovah. Aza ikegna handresy i Satana! (Matio 10:34-39; 1 Petera 5:8, 9) Fanakagnanô ny Devoly no agnatoroànô fô ti-hampiravoravo an’i Jehovah anô, sady magneky ny fitondrasany.—Ohabolana 27:11.

Copyright © 2009 Watch Tower Bible and Tract Society of Pennsylvania. All rights reserved.