Chuqui bajñel ñopol tac lac cha’an yic’ot costumbre tac mach bʌ muq’uic i mulan Dios

Mach Uxtiquilic jini Dios

1. Mach ti’ pejtelelic chuqui ñopol tac lac cha’an yic’ot jini costumbre tac lu’ leco. Pero Dios ma’anic mi’ mulan jini tilem bʌ ya’ ti mach bʌ isujmic ñopbalʌl o mach bʌ lajalic bajche’ mi yʌl ti Biblia (Mateo 15:6).

2. Uxtiquil bʌ dios: ¿Jin ba Jehová jini uxtiquil bʌ Dios? Mach che’iqui. Jehová, jini lac Tat, «jiñʌch cojach bʌ Dios isujm bʌ» (Juan 17:3; Marcos 12:29). Jesús jiñʌch ñaxan bʌ I Yalobil Dios, i chucul ti’ tojlel Dios (1 Corintios 11:3). Jini lac Tat ñumen ñucʌch bajche’ i Yalobil (Juan 14:28). Jini ch’ujul bʌ espíritu mach juntiquil lac pi’ʌl; jiñʌch i p’ʌtʌlel Dios (Génesis 1:2; Hechos 2:18).

Jini Navidad yic’ot Q’uin Santo tilem ti mach bʌ isujmic ñopbalʌl c’ʌlʌl ti wajali

Mach mejlic lac ch’ujutesan mi muq’uic mejlel lac bʌc’ñan jini chʌmeño’ bʌ

3. Navidad yic’ot Q’uin Santo: Jesús ma’anic tsi’ yila pañimil ti 25 cha’an diciembre, tajol ti octubre ti ñaxan bʌ tsic, che’ i yorajlel woli i cʌntañob i tiñʌme’ jini xcʌnta tiñʌme’ob che’ ti ac’ʌlel (Lucas 2:8-12). Jesús ma’anic ba’ ora tsi’ subeyob jini xñopt’añob, cha’an mi’ melob q’uiñijel che’ baqui ora tsi’ yila pañimil. Tsa’ʌch bʌ i subeyob i mel jiñʌch i c’ajtesʌntel, che’ ba ora tsa’ chʌmi (Lucas 22:19, 20). Jini Navidad yic’ot costumbre tac tilem ti mach bʌ isujmic ñopbalʌl ti wajali. Che’ ja’el jini Q’uin Santo yic’ot chuqui mi’ mejlel ti jini q’uin tac. Jini ñaxan bʌ xñopt’añob ti wajali, ma’anic tsi’ meleyob jini Navidad mi jinicto jini Q’uin Santo, yic’ot ja’el ma’anic mi’ melob jini isujm bʌ xñopt’añob ti ili q’uin wʌle.

4. Cumpleaño tac: Jini cojach bʌ cha’p’ejl cumpleaño mu’ bʌ lac taj ti Biblia, jin tsa’ bʌ i meleyob winicob x’ixicob mach bʌ anic tsi’ ch’ujutesayob Jehová (Génesis 40:20-22; Marcos 6:21, 22, 24-27). Jini ñaxan bʌ xñopt’añob ti wajali ma’anic tsi’ meleyob cumpleaño tac. Jini costumbre tac tilem ya’ ti mach bʌ isujmic ñopbalʌl c’ʌlʌl ti wajali. Jini isujm bʌ xñopt’añob mi’ tempañob i bʌ, yic’ot mi’ yʌq’ueñob i bʌ majtañʌl baqui jach bʌ q’uin cha’an mi yubiñob i tijicñʌyel.

5. I bʌc’ñʌntel chʌmeño’ bʌ: Jini chʌmeño’ bʌ ma’anix chuqui mi mejlel i melob, yic’ot ma’anix chuqui mi’ chʌn ubiñob. Joñonla mach mejlic laj coltañob, i che’ob ja’el mach mejlicob i tic’lañonla (Salmo 146:4; Eclesiastés 9:5, 10). Jini winic mi’ chʌmel; ma’anix chuqui chʌn cuxul mi’ cʌytʌl ti’ tojlel che’ mi yujtel ti chʌmel (Ezequiel 18:4). Pero an i tajol jontolo’ bʌ ángel i c’aba’ xibajob mi’ poj melob i bʌ bajche’ i yespíritujob jini chʌmeño’ bʌ. Pejtelel costumbre tac cha’an ti’ ch’ujutesʌntel o ti’ bʌc’ñʌntel jini chʌmeño’ bʌ mach wenic (Isaías 8:19).

6. Cruz: Jesús ma’anic tsa’ chʌmi ti jump’ejl cruz, tsa’ chʌmi ti’ junts’ijt te’. Jini t’an (stau rós) ti griego ti cabʌl Biblia mi yʌl jini «cruz», cojach yom i yʌl junts’ijt bʌñʌl bʌ te’. Jini t’an cruz tilem ya’ ti mach bʌ isujmic ñopbalʌl c’ʌlʌl ti wajali. Jini ñaxan bʌ xñopt’añob ti wajali, ma’anic tsi’ c’ʌñʌyob yic’ot ma’anic tsi’ ch’ujutesayob jini cruz. Jini cha’an, ¿uts’at ba ma’ wʌl che’ mi laj c’ʌn cruz ti lac ch’ujutesaya? (Deuteronomio 7:26; 1 Corintios 10:14.)

7. Tajol tsʌts ti cʌyol i melol jini leco bʌ ti’ ñopol yic’ot jini costumbre tac. Tajol lamital año’ bʌ ti a wotot a cʌñʌyo’ bʌ o a wamigojo’ bʌ mi caj i subeñetob cha’an ma’anic ma’ cʌy a mel jini leco tac bʌ ti’ melol yic’ot jini costumbre tac. Pero ñumen ñuc i c’ʌjñibal che’ mi lac tijicñesʌben i pusic’al Dios i mach jiñobic jini laj cʌñʌyo’ bʌ (Proverbios 29:25; Mateo 10:36, 37).

Copyright © 2009 Watch Tower Bible and Tract Society of Pennsylvania. All rights reserved.