Bajche’ much’quibilob jini i testigojob Jehová

1. Ti ili q’uin wʌle jini i testigojob Jehová tsa’ tejchi che’ ti 1870. I c’aba’ob ti ñaxan jiñʌch xCha’paya Bibliajob, pero che’ ti 1931 tsi’ ch’ʌmʌyob i c’aba’ loq’uem bʌ ti Biblia i testigojob Jehová (Isaías 43:10). Che’ bʌ tsa’ tejchi ch’o’ch’oc jax to, wʌle tsa’ix wen p’ojli i yonlelix i Testigojob Jehová, mu’ bʌ i cha’leñob subt’an ñumen ti doscientos treinta tejclum tac ti’ petol pañimil.

2. Jini congregación tac chaʼan i testigojob Jehová miʼ tempañob i bʌ chaʼyajl ti jumpʼejl semana. Poj pʌybilet cha’an ma’ majlel ya’ ti tempa bʌ tac (Hebreos 10:24, 25). Jini cʌntesʌntel mu’ bʌ i yʌjq’uel ya’i loq’uemʌch ti Biblia. Jini tempa bʌ tac mi’ tejchel yic’ot mi’ yujtel jump’ejl oración, yic’ot ti’ chʌmp’ejlel jini tempa bʌ mi’ «c’ʌjyel c’ay tac», loq’uem bʌ ti lac pusic’al cha’an i ch’ujutesʌntel Jehová (Efesios 5:18, 19). Libre mi la cochel i ma’anic mi’ c’ajtintel taq’uin (Mateo 10:8).

3. Ti yonlel jini congregación tac mi’ melob i tempa bʌ ti jump’ejl Otot cha’an Tempa bʌ. Ti’ pejtelel, jini Otot tac cha’an Tempa bʌ tsi’ meleyob jini i testigojob Jehová mach bʌ anic mi’ ch’ʌmob i tojol yic’ot mach cabʌlic i ch’ʌjlil tac tsi’ meleyob. Ya’i ma’anic mi caj a q’uel imágen tac cruz o yan tac bʌ. Jini taq’uin mu’ bʌ i yʌc’ob loq’uem bʌ ti’ pusic’al, jiñʌch mu’ bʌ i c’ʌn i tojob chuqui mi’ c’ʌñob. Majqui jach yom i ts’ita’ mel i coltaya mi mejlel i yotsan ya’ ti alʌ caja te’ (2 Corintios 9:7).

4. Ti jujump’ejl congregación tac an ancianojob, ñaxan bʌ mi yʌc’ob majlel i bʌ ti cʌntesa (1 Timoteo 3:1-7; 5:17). Jini ancianojob mi’ tajob i coltʌntel ti’ tojlel yambʌ xcoltayajob (1 Timoteo 3:8-10, 12, 13). Ili winicob mach ñumen ñucobic bajche’ ti pejtelel jini congregación (2 Corintios 1:24). Ma’anic mi’ yʌq’uentelob i c’aba’ ñumen ñuc bʌ (Mateo 23:8-10). Mach q’uexelic mi’ ch’ʌlob i bʌ bajche’ yaño’ bʌ. Yic’ot ma’anic mi’ ch’ʌmob i tojol cha’an i ye’telob. Jini ancianojob mi’ q’uelob chuqui an to yom i cha’an jini congregación, cha’an mi’ melbeñob i ye’tel Jehová ti’ wen. Mi yʌc’ob i coltaya i mi’ pʌsob wem bʌ bij che’ an majqui an ti wocol (Santiago 5:14-16; 1 Pedro 5:2, 3).

5. Jini i testigojob Jehová mi’ melob colem tac bʌ tempa bʌ ti jujump’ejl jab ja’el. Ya’ bʌ ora jini, mi’ tempañob i bʌ yonlel congregación tac cha’an mi’ ñich’tañob i cʌntesʌntel loq’uem bʌ ti Biblia. Junchajp mu’ bʌ i q’uejlel ya’ ti colem tac bʌ tempa bʌ, jiñʌch jini ch’ʌmja’ cha’an tsiji’ bʌ xcʌnt’añob (Mateo 3:13-17; 28:19, 20).

6. Ya’ ti Nueva York ya’an jini colem bʌ oficina i cha’an i testigojob Jehová mu’ bʌ i ch’ʌm ti’ wenta tac yan tac bʌ oficina ti petol pañimil. Ya’i ya’an junmojt mu’ bʌ i pʌso’ bij, junmojt ancianojob wen cabʌlo’ bʌ i ña’tʌbal, mu’ bʌ i ch’ʌm ti wenta jini congregación ti’ petol pañimil. Yic’ot ja’el, ti’ petol pañimil an che’ bajche’ ñumen ti cien oficina tac. Jini x’etelob mu’ bʌ i cha’leñob e’tel ya’i mach bʌ anic mi ch’ʌmob i tojol, mi yʌc’ob i coltaya ti’ melol laj cʌntesʌntel ti jump’ejl jun loq’uem bʌ ti Biblia, i mi’ chocob majlel ti yan tac bʌ tejclum. Ya’i mi’ chajpʌntel bajche’ yom mi’ yujtel subt’an ja’el. ¿Chucoch mach ma’ chajpan a bʌ cha’an mi majlel a q’uel jini oficina lʌc’ʌl bʌ an ya’ baqui chumulet?

Copyright © 2009 Watch Tower Bible and Tract Society of Pennsylvania. All rights reserved.