Merelo Anidda Mulugu

1. Adhary a Mulugu anokwela ejile eli yapama. Mbwenye vina anofanyela osunza widda eli yabure. (Salmo 97:10) Eji entapulela orabela merelo mena anidda Mulugu. Mereloya aba menagu bavi?

2. Mararuwo: Ogonihana vahinathi okala matelo, oraruwa, oraruwa na dhinama, oraruwa na mmudhi vina oraruwa alobwanavi dhotene esi dhothega dhopitha wa Mulugu. (Levitiko 18:6; Roma 1:26, 27; 1 Korinto 6:9, 10) Akala athu eli katelani, mbwenye ankala vamodha, anofanyela othiyana obe olebiya matelo awa mowiwanana na nlamulo na okathi.—Aebreo 13:4.

Mulugu onowidda olezela, wiya, mugunddu na merelo otimbwini

3. Othambi, Mugunddu, Wiya: Yehova Mulugu kanloga othambi. (Tito 1:2) Abale anfuna orumeleliwa na iyene anofanyela orabela othambi. (Vimarya 6:16-19; Kolosi 3:9, 10) Makalelo otene a mugunddu ali otakala na nrima. Mowi akristu kanja mugunddu oli wotene, ninga maloteria, makuruta a kavalo na bingo. (Efeso 5:3-5) Akristu vina kaniya. Kangula dhilobo anonaga wila dhilowiyiwa, ne kanthukula dhilobo s’ohirumeleliwa.—Obudduwa 20:15; Efeso 4:28.

4. Oludduwa Wopitha, Otimbwini: Oludduwa wothabwa onothukulela merelo etimbwini. (Wita 4:5-8) Oddule onkala wovoreya kankala marho a Mulugu. (Salmo 11:5; Vimarya 22:24, 25) Jabure okana ntxiga obe wiyeliha obure na obure mwa esile dhinikosile akwehu.—Vimarya 24:29; Roma 12:17-21.

5. Dholowa Na Olabela Mizimu: Athu ena anoddoddobela guru dha mizimu wi one akala dhinovulumutxa maredda. Enaguwa anowalowa amwiddani awa wi akale aredda obe wi ape. Guru eli mundduni mwa merelo aba otene ddi Satana. Nona akristu kanfanyela okana elobo eli yotene yowiwanana na awene. (Deuteronomo 18:9-13) Okalavi wonfiyedha Yehova bu mukaleloya wovibarela mwa dholowa dhinvokedhiwihu na athu ena.—Vimarya 18:10.

6. Olezela: Kayo yabure omwa vinyu vañgono, cerveja obe yomwa yina yowawa. (Salmo 104:15; 1 Timoteo 5:23) Mbwenye omwa bure na olezela sabure vamentoni va Mulugu. (1 Korinto 5:11-13; 1 Timoteo 3:8) Omwa vaddiddi ononyonga egumi vina onomwadha murala wawo. Vinagu onouthukulela momaguvamwene wa manyengetho mena.—Vimarya 23:20, 21, 29-35.

7. Abale ankosa dhilobo esile dhinloga Mulugu wila sabure “kanahalena Omwene wa Mulugu”. (Galasia 5:19-21) Akala txibarene weyo onomukwela Mulugu akala vina onofuna omuziveliha, onela owodha orula merelo aba. (1 Joau 5:3) Kasunza widda ejile enloga Mulugu wila jabure. (Roma 12:9) Keddaga na abale ana makalelo apama. (Vimarya 13:20) Amarho akristu, owarala, anokala akamyedhi. (Tiago 5:14) Mwa dhotene, karoromela mwa nikamiyedho na Mulugu, bugakumbira mu nlobelo.—Filipi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.