¿Achike Nuk’üt Ri Loq’oläj Wuj?

WAKAMI, ri itzelal xa b’a akuchi (o ape’) na nawak’axaj o natz’ët. Ruyon eleq’, oyowal chuqa’ nima’q taq kamisanïk yeb’anatäj. Wakami ke’ach’ob’o’ (o ke’anuku’) ri k’ayewal e awilon qa rat. Rik’in b’a’ jun yab’il o rukamik jun awach’alal rupoysan ak’u’x. Rik’in b’a’ rat nana’ achi’el xuna’ ri Job, ri jun utziläj achin. Rija’ xub’ij: «Ruyon q’axo’n ri wilon» (Job 3:26).

Rik’in b’a’ rat nab’ij:

• ¿Ja re’ wi nrajo’ ri Tata’ixel pa nuwi’ chuqa’ pa kiwi’ konojel ri winäq?
• ¿Akuchi xtinwïl nuto’ik richin xkensöl ri nuk’ayewal?
• ¿La k’o jun q’ij xtk’oje’ uxlanib’äl k’u’x?

Ri Loq’oläj Wuj nuya’ kiq’alajrisaxik re k’utunïk re’.

RI LOQ’OLÄJ WUJ NUB’IJ CHI RI TATA’IXEL XKERUSÖL RI K’AYEWAL.

«Xtusu’ [...] ruya’al runaq’ kiwäch, ruma kan xtub’än chi xtk’is el ri q’axo’n y ri jiloj. Kan xtk’is el chuqa’ ri kamïk y ri oq’ej.» (Apocalipsis 21:4)

«Ri e jetz’ kan xketzopiyaj achi’el nub’än ri masat.» (Isaías 35:6)

«Ri e moyi’ xketzu’un.» (Isaías 35:5)

«Ri kaminaqi’ [...] xkeb’eyakatäj k’a pe.» (Juan 5:28,29)

«Man jun chi ke ri qawinaq ri xtyawäj ta.» (Isaías 33:24)

«Kan pa ruk’iyal k’a ri ixin xtwachin» chi ruwach’ulew (Salmo 72:16)

TAWETAMAJ RI NUK’ÜT RI LOQ’OLÄJ WUJ

Man tab’ij chi xa choj jun achïk’ kisolik ri k’ayewal, ri’ ja ri Jehová sujuyun. Ri Loq’oläj Wuj nub’ij achike rub’eyal xtub’än chi re.

Man xa xe ta k’a ri’. Ri Loq’oläj Wuj nuk’üt chuqa’ achike rub’eyal nqïl kikotem pa qak’aslem wakami. Tach’ob’o’ (o tanuku’) ri k’ayewal e awilon chuqa’ kipoysan ak’u’x. Rik’in b’a’ ri ak’ayewal ruma ri pwäq,yab’il, kamïk o k’ayewal chi kij awach’alal. Ri Loq’oläj Wuj yojruto’ richin yojq’ax chi kiwäch re k’ayewal re’, chuqa’ nukuqub’a’ qak’u’x rik’in ri kiq’alajrisaxik ri k’utunïk, achi’el re’:

• ¿Achike ruma k’o tijoj poqonal pa qawi’?
• ¿Achike rub’eyal nqapab’a’ qi’ chi kiwäch ri k’ayewal?
• We oj k’ulan, ¿achike nqab’än richin k’o kikotem pa qochoch?
• ¿Achike nqab’än toq yojkäm?
• ¿La k’o jun q’ij xkeqatz’ët chik ri qach’alal e kaminäq el?
• ¿Achike ruma nqakuqub’a’ qak’u’x chi ri Tata’ixel xtub’än ri rusujun?

Ri ye’asik’ij re tzij re’ nub’ij chi rat nawajo’ nawetamaj ri nub’ij ri Loq’oläj Wuj chi kij re k’utunïk re’. Ri wuj k’o pa aq’a’ xkaruto’ rik’in re’. We natz’ët ri pa xulan qa chi re jujun ruxaq ri wuj, e k’o k’utunïk chi kij ri ch’uti’ taq tanaj. Ri ruq’alajrisanela’ ri Jehová yekikusaj ri k’utunïk toq nkitijoj ki’ chi rij ri Loq’oläj Wuj. Re jun rub’eyal tijonïk re’ e k’ïy winäq ütz yetz’eton. Nqarayib’ej k’a chi ütz ta chuqa’ xtatz’ët rat. Toq yatajin nawetamaj ri nuk’üt ri Loq’oläj Wuj, ja ta k’a ri Tata’ixel xtk’oje’ pa awi’.

TAWETAMAJ NAKUSAJ RI LOQ’OLÄJ AWUJ

RI Loq’oläj Wuj 66 wuj ruk’wan ri’. Richin man k’ayew ta nawïl ri nakanoj chupam, ri jujun wuj rujachon ri’ pa capítulo chuqa’ versículo. Chupam re wuj re’ k’ïy texto e ya’on pe. Ri ajlanïk k’o pe chi rij rub’i’ ri wuj, ja ri’ ri capítulo; ja k’a ri jun chik apo, ja ri’ ri versículo. Achi’el ri texto «2 Timoteo 3:16», ja ri’ ri ruka’n wuj xtaq el chi re ri Timoteo, capítulo 3, versículo 16.

We xke’asik’ij ri texto e ya’on pe chupam re wuj re’, chanin xtk’iyïr ri awetamab’al chi rij ri Loq’oläj Wuj. Chuqa’ we q’ij q’ij xtasik’ij oxi’ o wo’o’ capítulo chi re ri Loq’oläj Wuj, pa jun juna’ xtak’ïs rusik’ixik.