¿Achike ri Diablo?

1. Ri tzij «diablo» nub’ij chi jun winäq nutz’ük tzij chi rij jun chik winäq. Ja k’a ri tzij «satanás» nch’on chi rij jun winäq ri man ütz ta yerutz’ët ri nub’än jun chik winäq, xa nupab’a’ ri’ chi kij ri yerub’än. Re ka’i’ tzij re’ kan ütz nb’ix chi re ri Satanás, ri nab’ey man najowan ta ri Tata’ixel. Ri pa nab’ey, jun wi tz’aqät taqoxel xk’oje’ chi kaj rik’in ri Tata’ixel. K’ate’ xunimirsaj pe ri’, xrajo’ k’a xya’öx ta ruq’ij, achi’el ruq’ij ruk’amon nya’öx xa xe ri Tata’ixel (Mateo 4:8-10).

2. Ri Satanás xukusaj jun kumätz richin xch’on rik’in ri Eva; rik’in tz’ukun taq tzij xub’än chi ri Eva xuq’äj rutzij ri Tata’ixel. Ja ri’ k’a rub’eyal ri Satanás xrajo’ xuqasaj «ruk’ojlem» ri Tata’ixel; ntel chi tzij ri nimaläj ruq’ij rija’. Xub’än chi ri winäq ka’i’ kik’u’x xkib’än chi rij ri rub’eyal nq’aton tzij ri Tata’ixel, chuqa’ la k’o utzil nuk’äm pe o manäq. Chuqa’ xel chi tzij chi majun winäq ntikïr nuk’waj jun utziläj k’aslem chuwäch ri Tata’ixel. Toq xub’än ronojel re’ xupo’ ri’ itzelanel chi rij ri Tata’ixel. Ja k’a ri’ toq xub’ini’aj Satanás ri Diablo (Génesis 3:1-5; Job 1:8-11; Apocalipsis 12:9).

3. Ri Satanás nukanoj rub’anik yeruq’ol ri winäq richin nya’öx ruq’ij (2 Corintios 11:3, 14). Jun rub’eyal nukusaj ja ri man qitzij ta nimab’äl k’u’x. Toq jun nimab’äl k’u’x nuk’üt nojin taq tzij chi rij ri Tata’ixel, xa nub’än rurayib’al ri Satanás (Juan 8:44). Ri winäq e k’o chupam ri man qitzij ta nimab’äl taq k’u’x, kan kiniman chi nkiya’ ruq’ij ri qitzij Tata’ixel. Man qitzij ta k’a, rije’ xa ja ri Satanás nkiya’ ruq’ij ruma rija’ «ri k’o pa ruwi’ ri ruwach’ulew» (2 Corintios 4:4).

Ri man qitzij ta nimab’äl k’u’x, ri ch’onïk kik’in xamanil, chuqa’ ri naya’ ruq’ij jun tinamït, yeruq’ol ri winäq

4. Ri ch’onïk kik’in xamanil jun chik rub’eyal nukusaj ri Satanás richin yeruq’ol ri winäq. E k’o winäq yekisik’ij ri itzel taq xamanil richin yechajïx, richin yekitzelaj winäq, richin nkib’ij ri petenäq chi qawäch apo o richin yekik’achojrisaj yawa’i’. Ri Satanás ja ri’ ri itzel uchuq’a’ k’o chi rij ronojel re b’anob’äl re’. We nqajo’ nqab’än ri nqa chuwäch ri Tata’ixel mani k’a nqab’än ch’onïk kik’in xamanil (Deuteronomio 18:10-12; Hechos 19:18, 19).

5. Ri Satanás yeruq’ol chuqa’ ri winäq rik’in ri nanimirsaj awi’ chi rij awijatzul, chuqa’ ri naya’ kiq’ij ri moloj e b’enäq chi rij ri q’atb’äl tzij. E k’o winäq nkina’ chi ri kitinamit o ri kijatzul k’o ruq’ij chi kiwäch ri ch’aqa chik. Ri’ man qitzij ta k’a (Hechos 10:34, 35). E k’o ch’aqa chik, koyob’en chi ja ri moloj e b’enäq chi rij ri q’atb’äl tzij xkesolon ri k’ayewal chi Ruwach’ulew. Ja ri’ rub’eyal nkik’üt chi man nkajo’ ta Rajawaren ri Tata’ixel, ri qitzij Q’atb’äl Tzij xtsolon ri jalajoj taq qak’ayewal (Daniel 2:44).

Man taya’ kan ri atijonik chi rij ri Jehová, ke ri’ napab’a’ awi’ chuwäch ri Satanás

6. Jun chik rub’anik yeruch’äk winäq ri Satanás ja ri yeruya’ pe itzel taq rayinïk pa kijolom. Ri Jehová nub’ij chi man keqab’än ri itzel taq b’anob’äl, ruma retaman chi yojkitzelaj (Gálatas 6:7, 8). E k’o na wi winäq nkajo’ at ajun rat nab’än itzel taq b’anob’äl kik’in. Toqa k’a chawe chi xa ja ri Satanás nrayin nab’än ri b’anob’äl ri’ (1 Corintios 6:9, 10; 15:33).

7. Jun chik rub’eyal nukusaj ri Satanás ja ri yatoqotäx o nojqäx awij richin naya’ kan ri Jehová. K’o b’ey ri awach’alal npe koyowal ruma natijoj awi’ chi rij ri Loq’oläj Wuj. E k’o chik ch’aqa winäq yatkiyoq’. Toq ke ri’ nb’an chawe, toqa k’a pa ajolom achike ya’yon ri ak’aslem. Ri Diablo yaruxib’ij richin man nawetamaj ta chik chi rij ri Jehová. Mani k’a naya’ awi’ yaruch’äk (Mateo 10:34-39; 1 Pedro 5:8, 9). Toq napab’a’ awi’ chuwäch ri Satanás, nakikotisaj ruk’u’x ri Jehová, chuqa’ nak’üt chi naya’ ruq’ij ri nimaläj Ruk’ojlem (Proverbios 27:11).

Copyright © 2011 Watch Tower Bible and Tract Society of Pennsylvania. All rights reserved.