¿Achike xtub’än ri Tata’ixel chi re ri Ruwach’ulew?

1. Toq ri Jehová xub’än ri Ruwach’ulew, xub’än richin jantape’ (o chi jumul) ta xek’oje’ winäq chuwäch. Rija’ xrajo’ xek’oje’ ta utziläj taq winäq, chuqa’ xekikot ta jantape’ chuwäch (Salmo 115:16; Isaías 45:18). Ri Ruwach’ulew majub’ey xtchup ta ruwäch xa xtk’oje’ jantape’ (Salmo 104:5; Eclesiastés 1:4).

2. Toq majani tb’an ri achin, ri Tata’ixel xucha’ jun peraj ulew richin tikasäs xub’än chi re, xub’ij k’a tik’asäs ulew pa Edén chi re. Chi ri’ xuya’ ri nab’ey achin chuqa’ ri nab’ey ixöq: Adán chuqa’ Eva. Ri Tata’ixel xrajo’ chi rije’ xk’oje’ ta kalk’wal, xkinojisaj ta ri Ruwach’ulew. Ke ri’ eqal eqal xkib’än ta tik’asäs chi re ronojel ri Ruwach’ulew (Génesis 1:28; 2:8, 15).

Xk’is ruwäch ri tik’asäs ulew

3. Ri Adán chuqa’ ri Eva xemakun ruma xkiq’äj rutzij ri Jehová rik’in ronojel kina’oj, rik’in ronojel ketamab’al chi rij rutzij ri Jehová. Ruma k’a ri’ ri Jehová xerelesaj pe chuwäch ri tik’asäs ulew pa Edén, ke ri’ xk’is k’a ruwäch ri tik’asäs ulew (Génesis 3:1-6, 23). Ri Jehová man rumestan ta k’a ri rurayib’al chi rij ri Ruwach’ulew. Rija’ nub’ij chi tik’asäs chik xtub’än chi re ronojel, chuqa’ xkek’oje’ k’a jantape’ winäq chuwäch. ¿Achike rub’eyal xtub’än chi re? (Salmo 37:29.)

4. Toq xtb’an tik’asäs chi re ri Ruwach’ulew, nab’ey xtchup kiwäch ri itzel taq winäq (Salmo 37:38). Re’ xtb’anatäj pa Armagedón. Ri Armagedón ja ri’ ri royowal ri Tata’ixel xtukäm pe richin xtuchup ruwäch ri itzelal. Kan ja k’a ri’ xttz’apëx ri Satanás mil juna’; ke ri’ majun achike ta xtb’anon itzelal chi Ruwach’ulew. Xa xe k’a ruwinaq ri Tata’ixel xkek’ase’ kan (Apocalipsis 16:14, 16; 20:1-3).

5. Ri Jesús xtq’aton k’a tzij pa ruwi’ ri Ruwach’ulew mil juna’ (Apocalipsis 20:6). Eqal eqal xtuk’äm el ri mak pa qajolom chuqa’ pa qach’akul. Xkojb’etz’aqät k’a, achi’el wi rub’anon ri Adán chuqa’ ri Eva toq majani kemakun ta. Majun chik xtk’oje’ ta yab’il, rijixïk, chuqa’ ri kamïk. Ri yawa’i’ xkeb’ek’achoj, ja k’a ri e ri’j taq winäq xte’kib’ana’ chik xtani’, alab’oni’ o k’ajola’ (Job 33:25; Isaías 33:24; Apocalipsis 21:3, 4).

6. Chupam ri mil juna’ xtq’aton tzij ri Jesús, ri utziläj taq winäq xkesamäj richin tik’asäs xtkib’än chi re ronojel ri Ruwach’ulew (Lucas 23:43). Chuqa’ man ajlatäl ta ri kaminaqi’ xkek’astäj, xkek’oje’ chik achi’el winäq chi Ruwach’ulew (Hechos 24:15). We xtkib’än ri nub’ij ri Tata’ixel, xkek’ase’ richin jantape’ chi Ruwach’ulew. We man xtkib’än ta, xa xtchup kiwäch richin jantape’ (Juan 5:28, 29; Apocalipsis 20:11-15).

7. Ke ri’ xtb’anatäj k’a ri xrajo’ ri Tata’ixel chi rij ri Ruwach’ulew toq xub’än. ¿Narayib’ej yatilon kik’in ri urtusanïk xtya’öx chi qawäch apo? We ke ri’ man taya’ kan ri atijonik chi rij ri Jehová, chuqa’ jantape’ tab’ana’ ri nub’ij. Ri yaruto’ richin nab’än re’ ja ri yab’e pa molojri’ïl nb’an pa Runimajay ri Ajawaren kichin Ruq’alajrisanela’ ri Jehová (Salón del Reino de los testigos de Jehová), ri k’o pa atinamit (Isaías 11:9; Hebreos 10:24, 25).

Chi rij ri Armagedón, xtb’an tik’asäs chi re ri Ruwach’ulew

Copyright © 2011 Watch Tower Bible and Tract Society of Pennsylvania. All rights reserved.