¿Achike ri Rajawaren ri Tata’ixel?

1. Toq ri Jesús xk’oje’ chi Ruwach’ulew xuk’üt chi kiwäch ri rutzeqelib’ey chi tkik’utuj chi re ri Tata’ixel chi tpe ri Rajawaren. Ri tzij ajawaren pa kaqchikel ch’ab’äl, achi’el jun q’atb’äl tzij nusamajij jun q’atöy tzij. Ri Rajawaren ri Tata’ixel jun nimaläj q’atb’äl tzij. Re’ chi kaj k’o wi, xtq’aton k’a tzij pa ruwi’ Ruwach’ulew. Xtuch’ajch’ojrisaj rub’i’ ri Tata’ixel, ntel chi tzij loq’oläj xtub’än chi re. Xtub’än chi xtb’anatäj rurayib’al ri Tata’ixel chi Ruwach’ulew, achi’el rub’anon chi kaj (Mateo 6:9, 10).

2. Ri Tata’ixel xub’ij chi ja ri Jesús xtok Q’atöy Tzij pa ruwi’ ri Rajawaren (Lucas 1:30-33). Toq ri Jesús xk’oje’ chi Ruwach’ulew xuk’üt chi utziläj winäq, chi pa ruchojmil nub’än chi re ronojel, chuqa’ chi tz’aqät Q’atöy Tzij. Toq xtzolin chi kaj, man chanin ta xok Ruq’atöy Tzij Rajawaren ri Tata’ixel (Hebreos 10:12, 13). K’a pa 1914, ri Jehová xuya’ pa ruq’a’ ri Jesús ri q’atb’äl tzij rusujun chi re. Kan chupam kan ri juna’ ri’ ri Jesús nq’aton tzij chi kaj, jun Q’atöy Tzij cha’on ruma ri Tata’ixel (Daniel 7:13, 14).

3. Ri Jehová e rucha’on kayoxi’ utziläj taq winäq chi Ruwach’ulew richin yeb’e chi kaj, e k’o achi’a’ chuqa’ ixoqi’. Re winäq re’ xkeq’aton tzij chuxikin ri Jesús pa kiwi’ ri winäq, xke’ok q’atöy taq tzij chuqa’ uk’wäy taq b’ey (Lucas 22:28-30; Apocalipsis 5:9, 10). Ri Jesús xub’ij chi ke re q’atöy taq tzij re’: «xa ix jub’a’ ok», ntel chi tzij xa e jun ko’öl q’ataj karne’l. Rije’ e 144.000 (Lucas 12:32; Apocalipsis 14:1-3).

4. Kan xa xe toq xok Q’atöy Tzij ri Jesús, xroqotaj pe ri Satanás chuqa’ ri itzel taq rutaqoxela’ chi kaj. Xeruk’äq pe chi Ruwach’ulew. Ruma k’a ri’ ri itzelal chi Ruwach’ulew janila k’iyirnäq ruwäch kan xe chupam pe ri juna’ 1914 (Apocalipsis 12:9, 12). Ri nima’q taq oyowal (o ch’a’oj), ri wayijal, ri itzel taq yab’il, chuqa’ ri k’iyirnäq ruwäch ri itzelal, e ‹retal› chi ri Jesús nq’aton tzij. Chuqa’ retal chi oj k’o ruk’isib’äl taq q’ij (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Xtoqa yan ri q’ij toq ri Jesús xtutz’ët kib’anob’al ri winäq, xkerujäch k’a achi’el jun yuq’unel yerujäch ri karne’l chi kikojöl ri k’ïsk. Rija’ xtub’ij «karne’l» chi ke ri winäq kik’wan jun choj k’aslem, chuqa’ xtuya’ k’aslem man k’isel ta chi ke chi Ruwach’ulew. Ri e «tzuntzun [o k’ïsk]» ja ri’ ri man nkajo’ ta Rajawaren ri Tata’ixel (Mateo 25:31-34,46). Ri chi qawäch apo ri Jesús xtuchüp kiwäch konojel winäq ri e achi’el k’ïsk (2 Tesalonicenses 1:6-9). We rat narayib’ej yatok jun chi ke «rukarne’l» ri Jesús, taya’ k’a axikïn chi re ri rutzijoxik ri Ajawaren, chuqa’ tasamajij ri nawetamaj (Mateo 24:14, CO).

Toq xtq’aton tzij ri Jesús konojel xtkajo’ ki’, majun chik yoq’onïk (o itzelanïk) ta

6. Ri Ruwach’ulew k’ïy nima’q taq tinamït rujachon ri’, chi kijujunal k’o kiq’atb’al tzij. Ri nima’q taq tinamït jutaqïl nkib’än oyowal chi kiwäch. Ri Rajawaren ri Tata’ixel xkerujäl el konojel ri kiq’atb’al tzij ri winäq. Xa xe ri q’atb’äl tzij ri’ xtpa’e’ pa ruwi’ ronojel ri Ruwach’ulew (Daniel 2:44). Man xkek’oje’ ta chik ri nima’q taq oyowal, ri kamisanïk, chuqa’ ch’ayonïk. Konojel winäq xkek’oje’ junan, ütz xtkik’waj ki’, chuqa’ xtk’oje’ uxlanib’äl k’u’x chi kikojöl (Miqueas 4:3, 4).

7. Chupam ri mil juna’ Xtq’aton Tzij ri Jesús, ri utziläj taq winäq e tz’aqät xte’kib’ana’, chuqa’ ronojel k’a ri Ruwach’ulew tik’asäs xtub’än. Toq xte’k’is yan ri mil juna’, ri Jesús xub’än yan ronojel samaj xuk’utuj ri Tata’ixel chi re. K’a ri’ xtuya’ kan ri Ajawaren pa ruq’a’ Rutata’ (1 Corintios 15:24). ¿Achike ruma man natzijoj chi ke ri awachib’il, chuqa’ awach’alal ri xtub’än Rajawaren ri Tata’ixel?

Copyright © 2011 Watch Tower Bible and Tract Society of Pennsylvania. All rights reserved.