Jun k’aslem pa ochoch ri nqa chuwäch ri Tata’ixel

1. Ri Loq’oläj Wuj nub’ij chi ri achijil rujolom ri ach’alalri’ïl pa jay (1 Corintios 11:3). Ri achin xa xe jun rixjayil nk’oje’, chuqa’ ri ruk’ulub’ik o ruk’ulanem k’o chi ntz’ib’äx pa q’atb’äl tzij (1 Timoteo 3:2; Tito 3:1).

2. Ri achin trajo’ ri rixjayil achi’el nrajo’ ri’ rija’. Ri runa’oj nub’än rik’in, achi’el runa’oj ri Jesús kik’in ri rutzeqelib’ey (Efesios 5:25, 28, 29). Majub’ey tuchäy chuqa’ majub’ey tub’än oyowal chi re, xa tuya’ ruq’ij (Colosenses 3:19; 1 Pedro 3:7).

Ri utziläj tata’aj yerilij chuqa’ yeruto’ rik’in ri Loq’oläj Wuj ri ralk’wal chuqa’ rixjayil.

3. Ri tata’aj jantape’ tsamäj richin yerilij ri ralk’wal chuqa’ rixjayil. K’o chi yerutzüq, yeruwëq chuqa’ nuya’ kochoch. Chuqa’ kerupixab’aj rik’in ri Loq’oläj Wuj (1 Timoteo 5:8). Keruto’ ri ralk’wal chuqa’ ri rixjayil richin nketamaj chi rij ri Tata’ixel chuqa’ ri Runojib’al (Deuteronomio 6:4-9; Efesios 6:4).

4. Ri ixöq jun utziläj to’onel tub’ana’ rik’in ri rachijil (Génesis 2:18). Chuqa’ tuto’ ri rachijil chi re kipixab’anik ri ak’wala’ (Proverbios 1:8). Ri Jehová nrajo’ chi ri ixöq yerilij ri ral chuqa’ rachijil rik’in ajowab’äl (Proverbios 31:10, 15, 26, 27; Tito 2:4, 5). Ri ixöq tuya’ janila ruq’ij ri rachijil (Efesios 5:22, 23, 33).

5. Ri Tata’ixel nrajo’ chi ri ak’wala’ yekinimaj kite’ kitata’ (Efesios 6:1-3). Chuqa’ nrajo’ chi ri te’ej tata’aj yekipixab’aj o yekitijoj, chuqa’ yekichojmirisaj ri kalk’wal. Ri te’ej tata’aj janila ütz nkijäm kiq’ij richin yek’oje’ kik’in ri kalk’wal, chuqa’ nkisik’ij ri Loq’oläj Wuj kik’in. Ke ri’ yekito’ k’a chi rij ri Loq’oläj Wuj, chuqa’ nkikotisaj kik’u’x (Deuteronomio 11:18, 19; Proverbios 22:6, 15). Majub’ey tkiya’ tzij pa kiwi’ ri kalk’wal rik’in chaponïk chuqa’ ch’ayonïk (Colosenses 3:21).

Ri Tata’ixel nrajo’ ke ri te’ej tata’aj yekitijoj chuqa’ yekichojmirisaj ri kalk’wal

6. Toq jun k’ulaj winäq man ütz ta kik’wan ki’ janila ütz nkikanoj kito’ik chupam ri Loq’oläj Wuj. Ri Loq’oläj Wuj nub’ij chi tqajo’ qi’ chuqa’ tqakuyu’ qamak (Colosenses 3:12-14). Ri Loq’oläj Wuj man nub’ij ta chi ütz najäch awi’ richin ye’achojmirisaj koköj taq ak’ayewal. Ri ixöq ntikïr k’a nujäch ri’ rik’in rachijil toq nb’anatäj re’: 1) ri achin man nrajo’ ta nrilij o nutzüq ri rixjayil chuqa’ ri ralk’wal, 2) toq kan janila nchapon chuqa’ nch’ayon, ke ruma ri’ nyawäj o rejqalem kamïk ri ixöq, chuqa’ 3) toq ri ixöq man ntikïr ta nuya’ ruq’ij ri Jehová ruma ri achin kan majun wi nuya’ ta q’ij chi re (1 Corintios 7:12,13).

7. Ri k’ulan taq winäq man tkikanoj kik’exel. Ri nak’waj awi’ rik’in jun chik winäq, jun mak chuwäch ri Tata’ixel chuqa’ chuwäch ri ak’ulaj (Hebreos 13:4). Toq jun winäq nkotz’e’ rik’in jun chik winäq man ruk’ulaj ta, xa xe b’anob’äl ri’ achoj ruma nub’ij ri Loq’oläj Wuj ütz nchüp ruwäch jun k’ulub’ik, chuqa’ ri k’ulan wi taq winäq yetikïr yek’ule’ rik’in jun chik (Mateo 19:6-9; Romanos 7:2, 3). Ri Jehová itzel nutz’ët toq jun winäq nuchüp ruwäch ruk’ulub’ik, chuqa’ nk’ule’ rik’in jun chik toq ri achoj ruma man k’o ta chupam ri Loq’oläj Wuj (Malaquías 2:14-16).

Copyright © 2011 Watch Tower Bible and Tract Society of Pennsylvania. All rights reserved.