Nimanïk chuqa’ b’anob’äl ri man yeqa ta chuwäch ri Tata’ixel

Ri Tata’ixel man oxi’ ta ruk’wan ri’

1. Man konojel ta nimanïk chuqa’ b’anob’äl e itzel. Ja k’a ri e petenäq rik’in ri man qitzij ta nimab’äl k’u’x o ri nkijäl rub’ixik ri nuk’üt ri Loq’oläj Wuj, man yeqa ta chuwäch ri Tata’ixel (Mateo 15:6).

2. Oxi’ Dios chupam jun Dios. ¿La oxi’ Dios ruk’wan ri’ ri Jehová, ntel chi tzij oxi’ winäq chupam jun Dios? Manäq. Ri Jehová, ri Tata’aj, xa xe rija’ «qitzij Dios y majun chik jun Dios k’o» (Juan 17:3, CO; Marcos 12:29). Ri Jesús nab’ey Ralk’wal ri Tata’ixel, chuqa’ ri Tata’ixel k’o pa ruwi’ ri Jesús (1 Corintios 11:3). Ri Tata’aj ik’owinäq ruq’ij chuwäch ri K’ajolaxel (Juan 14:28). Ri loq’oläj xamanil man jun ta winäq, xa ja ri ruchuq’a’ ri Tata’ixel (Génesis 1:2; Hechos 2:18).

Ri Alaxb’äl petenäq chi kij ojer taq nimab’äl k’u’x ri man e qitzij ta

Majun ruma nqaya’ kiq’ij ri anima’i’ chuqa’ nqaxib’ij qi’ chi kiwäch

3. Ri Alaxb’äl chuqa’ ri Loq’oläj taq Q’ij. Ri Jesús man xaläx ta pa 25 chi re ri ruk’isib’äl ik’. Rija’ xaläx pa nab’ey taq q’ij chi re ri lajuj ik’, jun ik’ toq ri yuq’unela’ yekiyuq’uj kikarne’l pa juyu’ chaq’a’ (Lucas 2:8-12). Ri Jesús majub’ey xub’ij ta chi ke ri runimanela’ chi tkib’ana’ nimaq’ij ruma ri ralaxb’al. Ri xub’ij rija’ chi tnatäx o tk’uxläx ja ri rukamik (Lucas 22:19, 20). Ri Alaxb’äl, chuqa’ ronojel ri nimaq’ij yeb’analöx ruma re’ e petenäq chi kij ojer taq nimab’äl k’u’x, ri man e qitzij ta. Ke ri’ k’a chuqa’ ri nimaq’ij yeb’an chi rij ri Loq’oläj taq Q’ij; achi’el ri weqoj yeb’analöx, chuqa’ toq ri winäq yeb’e chi kij ri tyoxi’ pa taq b’ey. Ri nab’ey taq runimanela’ ri Jesús majun xkinimaq’ijuj ta ri Alaxb’äl, chuqa’ ri Loq’oläj taq Q’ij. Ri qitzij taq runimanela’ ri Jesús, wakami, man yekinimaq’ijuj ta chuqa’.

4. Nak’owisaj Aq’ij. Ri Loq’oläj Wuj xa xe ka’i’ achi’a’ yerusik’ij ri xkik’owisaj kiq’ij, rije’ man xkiya’ ta ruq’ij ri Jehová (Génesis 40:20-22; Marcos 6:21, 22, 24-27). Ri nab’ey taq runimanela’ ri Jesús man xkik’owisaj ta kiq’ij. Re b’anob’äl re’ petenäq chi kij ojer taq nimab’äl k’u’x, ri man e qitzij ta. Ri qitzij taq runimanela’ ri Jesús nkiya’ sipanïk chuqa’ yekib’än kinimaq’ij xa b’a achike q’ij chi re ri juna’.

5. Xib’irïk chi kiwäch anima’i’. Ri anima’i’ majun achike ta yetikïr nkib’än chuqa’ man nkina’ ta. Röj man yojtikïr ta yeqato’, chuqa’ rije’ man yetikïr ta nkib’än itzelal chi qe (Salmo 146:4; Eclesiastés 9:5, 10). Ri qanima nkäm, man nk’ase’ ta kan toq yojkäm (Ezequiel 18:4, NM). K’o b’ey ri itzel taq taqoxela’, ri nb’ix itzel taq xamanil chi ke, nkib’än kiwachib’äl ri anima’i’. Ronojel ri b’anob’äl yeb’än ruma xib’irïl chi kiwäch anima’i’ o richin nya’öx kiq’ij, man e ütz ta (Isaías 8:19).

6. Cruz. Ri Jesús man xkäm ta chuwäch jun cruz, rija’ chuwäch xa jun raqän che’ xkäm wi. Ri jun tzij griego, ri kïy Loq’oläj taq Wuj kib’anon qa «cruz» chi re, nch’on chi rij xa jun raqän che’. Ri etal cruz petenäq chi kij ojer taq nimab’äl k’u’x ri man e qitzij ta. Ri nab’ey taq runimanela’ ri Jesús man xkikusaj ta, chuqa’ man xkiya’ ta ruq’ij ri cruz. Ruma ri’ ¿Achike nab’ij rat, la ütz nqakusaj jun cruz richin nqaya’ ruq’ij ri Tata’ixel? (Deuteronomio 7:26; 1 Corintios 10:14.)

7. K’o na wi b’ey (o jantäq) k’ayew nub’än ye’aya’ kan jujun chi ke ri b’anob’äl re’, chuqa’ ri na’oj e animan pe. E k’o na wi awach’alal o awachib’il nkib’ij chawe chi man ke’aya’ kan ri na’oj e animan pe. Ri nab’än rurayib’al ri Tata’ixel, ik’owinäq ruq’ij chuwäch nab’än ri nkib’ij ri winäq (Proverbios 29:25; Mateo 10:36, 37).

Copyright © 2011 Watch Tower Bible and Tract Society of Pennsylvania. All rights reserved.