¿Achike kinuk’ik kib’anon ri ruq’alajrisanela’ ri Jehová?

1. Ri kitzijol ri ruq’alajrisanela’ ri Jehová xtikïr pe pa taq juna’ 1870. Nab’ey Tijoxela’ chi rij ri Loq’oläj Wuj xkib’ini’aj. Ja k’a chupam ri juna’ 1931 xkik’äm el ri kib’i’ chupam ri Loq’oläj Wuj, xkib’ini’aj k’a ruq’alajrisanela’ ri Jehová (Isaías 43:10, NM). Kan xa xe toq xtikïr pe kitzijol, ri moloj k’iyirnäq pe. Wakami, pa millón chi winäq yetzijon ri Loq’oläj Wuj. Nk’o jub’a’ chi re ri 230 nima’q taq tinamït akuchi nkitzijoj wi.

2. Ri kimolaj ruq’alajrisanela’ ri Jehová nkimöl ki’ ka’i’ b’ey chupam wuqu’ q’ij. Xa jujun ok ri jun b’ey nkimöl ki’. Yatoyob’ëx richin yatapon chupam xa b’a achike na chi ke re molojri’ïl re’ (Hebreos 10:24, 25). Ri nk’üt chi ri’ chupam ri Loq’oläj Wuj k’amon el (tz’amon el). Ri jujun molojri’ïl ntikïr, chuqa’ nk’is rik’in ch’onïk chi re ri Tata’ixel. Chuqa’ yeb’ixäx b’ix (Efesios 5:18, 19). Xa b’a achike ütz ntok apo, chuqa’ man nk’utüx ta pwäq (Mateo 10:8).

3. Ri ruq’alajrisanela’ ri Jehová nkib’än kimolojri’ïl chupam jun Runimajay ri Ajawaren, xa jujun ok molaj juk’an chik nkib’än wi. Re nimajay re’ man jampe’ ta kib’anik b’anon chi ke. Ja ri Ruq’alajrisanela’ ri Jehová e b’anayon, choj kisipalon kiq’ij. Chi kipam re nimajay re’ man xke’atz’ët ta tyoxi’ o xa b’a achike chik na jun kiwachib’äl tyoxi’. Ri pwäq nukusäx ja ri kiya’on ri winäq nkirayib’ej yeto’on. Ri nkirayib’ej yeto’on, ütz nkiya’ kan ri kipwäq chupam jun k’ojlib’äl kan richin wi ri’ (2 Corintios 9:7).

4. Chupam jujun molaj e k’o achi’a’ yek’utun ri Loq’oläj Wuj, rije’ ri e uk’wäy taq b’ey o ri yeyuq’un ri winäq (1 Timoteo 3:1-7; 5:17). Rije’ yeto’öx kuma ch’aqa chik achi’a’, ri e cha’on richin yesamäj kik’in (1 Timoteo 3:8-10, 12, 13). Majun chi ke rije’ ik’owinäq ruq’ij chi kiwäch ri ch’aqa chik winäq (2 Corintios 1:24). Chuqa’ man k’o ta jun nimaläj kib’i’ nya’öx (Mateo 23:8-10). Ri kitzyaq nkikusaj man jun wi ta chi kiwäch ri ch’aqa chik. Chuqa’ man yetoj ta ruma ri kisamaj. Ri uk’wäy taq b’ey ronojel kik’u’x yekito’ ri winäq, ri e k’o chupam ri molaj, rik’in ri Loq’oläj Wuj. Nkikuqub’a’ kik’u’x chuqa’ yekipixab’aj toq k’o kik’ayewal (Santiago 5:14-16; 1 Pedro 5:2, 3).

5 Ri ruq’alajrisanela’ ri Jehová juna’ juna’ yekib’än nima’q taq molojri’ïl. Chi kipam re molojri’ïl re’ nkik’ül ki’ e k’ïy molaj richin nkak’axaj jun nimaläj tzijonem pa ruwi’ ri Loq’oläj Wuj. Jun chi ke ri yeb’an chi kipam re molojri’ïl re’ ja ri yeqasäx pa ya’ ri k’ak’a’ taq tijoxela’ (Mateo 3:13-17; 28:19, 20, CO).

6. Ri ruk’u’x kisamaj ri ruq’alajrisanela’ ri Jehová, ronojel ruwach’ulew, Nueva York k’o wi. Chi ri’ k’o jun molaj Uk’wäy taq B’ey ri e pa’äl pa ruwi’ ri samaj nb’an ronojel Ruwach’ulew. Re uk’wäy taq b’ey re’ k’o ketamab’al pa ruwi’ ri samaj nkib’än. Chuqa’ ronojel ruwach’ulew ik’owinäq (o q’axnäq) chuwäch jun wok’al (100) ri samajay e k’o. Ri samajela’ e k’o chupam jujun samajay kisipan kiq’ij richin yeto’on chi re kelesaxik wuj chi rij ri Loq’oläj Wuj, chuqa’ yekijäch el. Chupam chuqa’ jujun samajay nnuk’ ronojel samaj chi rij rutzijol ri Loq’oläj Wuj. Tajama’ jun aq’ij richin nab’etz’eta’ ri samajay naqaj nub’än chawe.

Copyright © 2011 Watch Tower Bible and Tract Society of Pennsylvania. All rights reserved.