Yon lavi fanmi ki fè Bondye plezi

1. Bib la di mari a se chèf fanmi an (1 Korentyen 11:3). Yon mari dwe gen yon sèl madanm, e maryaj yo de a dwe yon maryaj leta rekonèt. – 1 Timote 3:2 ; Tit 3:1.

2. Yon mari dwe renmen madanm ni menm jan li renmen tèt li. Li dwe trete li menm jan Jezi te trete disip li yo (Efezyen 5:25, 28, 29). Li pa ta dwe janm ni bat madanm nan, ni maltrete l. Okontrè, li ta dwe montre li onore l e li respekte l. – Kolosyen 3:19 ; 1 Pyè 3:7.

Yon papa ki gen lanmou founi fanmi l nesesite materyèl ak nesesite espirityèl.

3. Yon papa dwe travay di pou l pran swen fanmi li. Fòk li founi manje, rad, ansanm ak yon kote pou madanm ni ak pitit li rete. Yon papa dwe founi fanmi l nesesite espirityèl tou (1 Timote 5:8). L ap pran latèt nan ede fanmi an aprann konnen Bondye e nan ede l aprann konnen volonte l. – Detewonòm 6:4-9 ; Efezyen 6:4.

4. Yon madanm dwe yon bon èd pou mari li (Jenèz 2:18). Li dwe ede mari l nan edikasyon ak nan fòmasyon timoun yo (Pwovèb 1:8). Jewova vle pou yon madanm pran swen fanmi li avèk amou (Pwovèb 31:10, 15, 26, 27 ; Tit 2:4, 5). Li dwe gen gwo respè pou mari l. – Efezyen 5:22, 23, 33.

5. Bondye vle pou pitit obeyi paran (Efezyen 6:1-3). Li atann aske paran enstwi pitit yo epi korije yo. Paran bezwen pase tan ak pitit yo, etidye Labib avè yo, ba yo afeksyon epi okipe bezwen espirityèl yo (Detewonòm 11:18, 19 ; Pwovèb 22:6, 15). Paran pa ta dwe janm disipline pitit yo yon fason rèd oswa kriyèl. – Kolosyen 3:21.

Bondye atann aske paran enstwi pitit yo epi korije yo.

6. Lè de moun marye gen pwoblèm pou yo antann yo ansanm, yo ta dwe eseye mete konsèy Bib la an pratik. Bib la ankouraje nou montre nou gen lanmou ak padon (Kolosyen 3:12-14). Pawòl Bondye pa ankouraje separasyon kòm mwayen pou rezoud nenpòt ti pwoblèm. Men yon madanm ta ka chwazi pou l kite ak mari l (1) si pou bongre l mari a derefize pran swen fanmi an, (2) si li tèlman vyolan opwen li mete sante ak lavi madanm nan an danje, oubyen (3) si mari a fè yon opozisyon estrèm ki fè li vin enposib pou madanm nan adore Jewova. – 1 Korentyen 7:12, 13.

7. De moun marye fèt pou fidèl lenzalòt. Lè yon moun fè adiltè, se yon peche li fè kont Bondye epi kont moun li marye avèk li a (Ebre 13:4). Daprè Bib la, kontak seksyèl andeyò maryaj, se sèl motif ki pèmèt divòs e ki bay libète pou remarye (Matye 19:6-9 ; Women 7:2, 3). Jewova rayi sa, lè moun divòse san motif biblik epi marye avèk yon lòt. – Malaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.