Mga Saksi ni Jehova Kinsa Sila?—Unsay Ilang Gituohan?

Unsay Ilang Gituohan?

ANG mga Saksi ni Jehova nagtuo sa Labing Gamhanang Diyos, si Jehova, ang Maglalalang sa mga langit ug sa yuta. Ang paglungtad lamang sa makuting pagkadisenyo nga kahibulongang mga butang sa uniberso nga naglibot kanato makataronganong nagpaila nga ang usa ka intelihente ug gamhanan kaayo nga Maglalalang maoy nagbuhat nianang tanan. Maingon nga ang mga buhat sa mga lalaki ug babaye nagbanaag sa ilang mga hiyas, mao man usab ang mga buhat ni Jehova nga Diyos. Giingnan kita sa Bibliya nga “ang iyang dili-makita nga mga hiyas . . . , tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” Dugang pa, nga walay tingog o mga pulong, “ang kalangitan nagapahayag sa himaya sa Diyos.”—Roma 1:20; Salmo 19:1-4.

YUTA . . . gilalang ni Jehova . . . atimanon sa tawo . . . pagapuy-an sa walay kataposan

Ang mga tawo dili maghulma ug mga sudlanan nga kulonon o maghimog mga telebisyon ug kompiyuter nga walay katuyoan. Ang yuta ug ang mga linalang niini nga mga tanom ug mananap mas kahibulongan pa. Ang gambalay sa lawas sa tawo uban sa trilyontrilyong selula niini dili nato masabtan—bisan ang utok nga atong gigamit sa paghunahuna kahibulongan kaayo nga dili nato matugkad! Kon ang mga tawo adunay katuyoan sa paggama sa ilang dili-kaayo hinungdanong mga imbento, tino nga si Jehova nga Diyos may katuyoan sa iyang katingalahang mga linalang! Ang Proverbio 16:4 nag-ingon nga aduna gayod siyay katuyoan: “Ang tanang butang gihimo ni Jehova alang sa iyang katuyoan.”

Adunay katuyoan si Jehova sa paghimo sa yuta, sumala sa iyang giingon sa unang tawhanong magtiayon: “Magmabungahon ug magdaghan kamo ug pun-a ang yuta . . . , pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.” (Genesis 1:28) Tungod kay sila misupak, kining maong magtiayon napakyas sa pagpuno sa yuta sa matarong nga mga pamilya nga mahigugmaong mag-atiman sa yuta ug sa mga tanom ug mananap niini. Apan ang ilang kapakyasan dili makapakyas sa katuyoan ni Jehova. Libolibo ka tuig sa ulahi, kini gisulat: ‘Ang Diyos, ang Mag-uumol sa yuta . . . , wala maglalang niini sa walay kapuslanan.’ Siya “nag-umol niini aron pagapuy-an.” Dili kini pagalaglagon, kondili “ang yuta magpabilin sa walay kataposan.” (Isaias 45:18; Ecclesiastes 1:4, The New English Bible) Ang katuyoan ni Jehova alang sa yuta mamatuman: “Ang akong kaugalingong laraw mobarog, ug ang tanang butang nga akong gikahimut-an akongpagabuhaton.”—Isaias 46:10.

Busa, ang mga Saksi ni Jehova nagtuo nga ang yuta magpabilin sa walay kataposan ug ang tanang tawo, buhi ug patay, nga mohaom sa katuyoan ni Jehova alang sa gipanindot, gipuy-an nga yuta mahimong mabuhi diha niana sa walay kataposan. Ang tanang tawo nakapanunod ug pagkadili-hingpit gikan kang Adan ug Eva, busa sila mga makasasala. (Roma 5:12) Giingnan kita sa Bibliya: “Ang suhol nga ginabayad sa sala mao ang kamatayon.” “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” “Ang kalag nga makasala—kini mismo mamatay.” (Roma 6:23; Ecclesiastes 9:5; Ezequiel 18:4, 20) Nan sa unsang paagi mabuhi sila pag-usab aron sa pagpakig-ambit sa mga panalangin dinhi sa yuta? Pinaagi lamang sa halad lukat ni Kristo Jesus, kay siya miingon: “Ako ang pagkabanhaw ug ang kinabuhi. Siya nga magpasundayag ug pagtuo kanako, bisan siya mamatay, siya mabuhi.” “Ang tanan nga anaa sa handomanang mga lubnganan makadungog sa iyang tingog ug manggula.”—Juan 5:28, 29; 11:25; Mateo 20:28.

Sa unsang paagi kini mahitabo? Gipatin-aw kini diha sa “maayong balita sa gingharian,” nga gisugdan pagmantala ni Jesus sa dinhi pa siya sa yuta. (Mateo 4:17-23) Apan karon ang mga Saksi ni Jehova nagawali sa maayong balita sa linain gayod nga paagi.

KON UNSAY GITUOHAN SA MGA SAKSI NI JEHOVA

Copyright © 2006 Watch Tower Bible and Tract Society of Pennsylvania. All rights reserved.