Inte sha kwa Yehova—Ni Bani? Finshi Basuminamo?

Balimutemwa

Ni Bani?

Inte sha kwa Yehova balafwaisha ukuti mwaishibana na bo bwino. Napamo mwalibakumanyapo uko kwine mwikala nelyo mubomba na bo incito nangu mwalikumanapo na bo kumbi. Nalimo mwalibamonapo mu musebo baletambika bamagazini babo ku bapita nshila. Nelyo mwalilanshanyapo na bo panono pa mwenu.

Ukulanda fye cishinka, Inte sha kwa Yehova balyangwako kuli imwe no bumi bwenu. Bafwaya ukuba ifibusa fyenu no kumwebako ifingi pa fyo baba, ifyo basuminamo, ukuteyanya kwabo, na fintu bamona abantu ne calo twikalamo. E mulandu wine bamupekanishishe uno broshuwa.

Mu fintu fye fingi Inte sha kwa Yehova baba fye ngo uli onse. Na bo balikwata amafya ya lyonse pamo nga ya fya ndalama, balalwala, na mafya ya matontonkanyo. Inshita shimo balalufyanya, pantu na bo tabapwililika, tabapuutwamo, e lyo na bo bene bena kuluba. Lelo balatukuta ukusambilila ku fyo bapitamo kabili balaipeelesha ukusambilila Baibolo no kuwamya umo balelufyanya. Baliipeela kuli Lesa ukucita ukufwaya kwakwe, kabili balabombesha ku kufishapo ukuipeela kwabo. Muli fyonse ifyo bacita bafwaya ukukonka Icebo ca kwa Lesa no kulomba umupashi wakwe uwa mushilo ukuti ubatungulule.

Ica cindamisha kuli bene ca kuti ifisumino fyabo fyashimpwa pali Baibolo mu cifulo ca kushimpwa fye pa fya kutunganya kwa bantunse nelyo pa fisumino fye ifya mipepele. Bayumfwa nge fyayumfwile umutumwa Paulo uwalandile amashiwi yapuutwamo aya kuti: “Lesa wene abe uwa cine, no muntu onse uwa bufi.” (Abena Roma 3:4, Baibolo wa Cibemba uwa mu 1956*) Kumfwa ku fisambilishiwa nge cine ca mu Baibolo, Inte shilakoselesha sana ukukonka ifyacitile abena Berea ilyo bakutike umutumwa Paulo aleshimikila: “Bapokelele icebo no kucankwa konse, balefwayafwaya mu malembo akasuba na kasuba, beshibe ifi fintu nga ni fyo fine.” (Imilimo 17:11) Inte sha kwa Yehova shasumina ukuti ifisambilisho fya mipepele fyonse fifwile ukweshiwa ukumona nga fileumfwana na Malembo yapuutwamo, nampo nga fisambilisho fyabo nelyo ifya bambi. Bamulaalika no kumukoselesha ukucita ici cine ilyo mulelanshanya na bo.

Pali fi twalandapo cailanga fye ukuti Inte sha kwa Yehova basumina muli Baibolo ukuti e Cebo ca kwa Lesa. Batila amabuku 66 ayabamo yalipuutwamo kabili tayabepa ilyo yalelanda pa fya kale. Amalembo ayo abengi batila Icipingo Cipya bayeta ati Amalembo ya Bwina Kristu aya ciGriki, nayo batila ati Icipingo ca Kale bena bayeta ati Amalembo ya ciHebere. Bashintilila pali aya yene yabili, aya ciGriki na ya ciHebere, kabili bayakonka fye ukuti filya fine yalembwa e fyo yapilibula ukufumyako fye mulya amashiwi nelyo imibele ilelangilila ukuti ya mu mampalanya nelyo yali fye cishibilo ca fimo. Baishiba ukuti ukusesema ukwingi ukwaba muli Baibolo kwalifikilishiwa, kumbi e lyo kulefikilishiwa, na kumbi kukafikilishiwa ku ntanshi.

ISHINA LYABO

Bushe ni Nte sha kwa Yehova? Ee, e fyo abene baita. Lishina lyakwata ubupilibulo, ililangilila ukuti bashimika ubunte pa lwa kwa Yehova, buLesa bwakwe, ne mifwaile yakwe. “Lesa,” “Shikulu,” na “Kalenga” yaba malumbo fye ukupala “Kateka,” “Imfumu,” na “Mushika,” ayengabomfiwa na ku bantu. Lelo “Yehova” lishina lya pa lwakwe kabili lilosha kuli Lesa wa maka yonse kabili Kalenga wa bubumbo bonse. Ici calangililwa pa Amalumbo 83:18, apatila: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.”

Ishina lya kwa Lesa mu ciHebere ca ku kale

Ishina Yehova (nelyo Yawe, ukulingana na Baibolo wa ci Lamba ne fyo abasoma bamo basalapo) limoneka mupepi ne miku 7,000 mu Amalembo ya kutendekelako aya ciHebere. Mu maBaibolo ayengi talyabamo lelo lyapyanikishiwapo na mashiwi pamo nga “Lesa” nelyo “Shikulu.” Lelo, na muli aya yene amaBaibolo, umo kuti aishiba fye bwino bwino apali ishina Yehova mu Amalembo ya kutendekelako aya ciHebere pantu mulya amashiwi yapyanikishiwapo yaba mu filembo fikalamba nge fi: LESA, SHIKULU. Mu maBaibolo ayengi aya ndakai ishina Yehova nelyo Yahweh e mo lyaba. E co na Baibolo pali Esaya 42:8, isosela ati, “Ine ndi Yehova. E shina lyandi.”

Mu Malembo, apo Inte sha kwa Yehova bafumya ishina lyabo ni mu cipandwa 43 ica kwa Esaya. Pali ci cipandwa, aba pano isonde balondololwa nga bali mu cilye ca milandu: Balesa ba nko baebwa ukuleta Inte shabo pa kuti shise shishininkishe ukutunga kwabo ukwa kuti balilungama nelyo ukukutika ku nte sha kwa Yehova no kusumina icine. Apa e po na Yehova abilisha ku bantu bakwe ukuti: “Imwe muli nte shandi, cisemo ca kwa Yehova, kabili muli babomfi bandi abo nasala, ku kuleka munjishibe, no kuntetekela, kwiluko kuti ni ne wine; pa kuntangilila takwabumbilwe mulungu kabili pa kunkonkapo takwakabe. Ine, ine ndi Yehova, kabili tapali mupusushi umbi kano ine.”—Esaya 43:10, 11.

Pa makana ya myaka ilyo Kristu ashilafyalwa Yehova Lesa alikwete inte shakwe pano isonde. Pa numa ya kutantawila abantu ba citetekelo mu AbaHebere icipandwa 11, AbaHebere 12:1 batila: “E ico na ifwe, pa kuba abashingulukwa kwi kumbi lya nte ilyakule fi, tube abafuule cifinine conse no lubembu ulwalambatila, tubutuke no mukosha ulubilo ulwabikilwa ifwe.” Yesu asosele pa cinso ca kwa Ponti Pilato ukuti: “Pali ici e co naishiile pano isonde, pa kuti nkeseshimike cine ubunte.” Etwa ukuti “inte ya cishinka kabili iya cine.” (Yohane 18:37; Ukusokolola 3:14) Yesu aebele abasambi bakwe ukuti: “Mukapokelela amaka ilyo ukeso Mupashi wa mushilo pali imwe; kabili mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.”—Imilimo 1:8.

Ici e calenga ukuti abantu mupepi na 6,000,000 ilelo abaleshimikila mu fyalo ukucila 230, imbila nsuma ya Bufumu bwa kwa Yehova ubo bukatekwa na Kristu Yesu, balemona ukuti calilinga ukuita abene abati Inte sha kwa Yehova.

Inte mupepi na 6,000,000 mu fyalo ukucila pali 230

* Amalembo yambwilwe muli uno broshuwa yafumine muli yi Baibolo, kano nga calangililwa mu kupusanako.

Copyright © 2006 Watch Tower Bible and Tract Society of Pennsylvania. All rights reserved.