Nja Ńe Diabolo e?

1. Eyal’a “diabolo” e mapula nde o kwala moto nu mato̲pe̲ lobango te̲nge̲ne̲ nupe̲pe̲. “Satan” nika ńe nde musingedi to̲ mute̲nge̲ne̲ bato. Ben byala be nde mina ma bolabe̲ musinged’a Loba ńa boso. O bebotedi, a ta nde ange̲l ńe ná ke̲nge̲nge̲ o mo̲ń na Loba. Nde ombusa ponda, a timbi be̲ne̲ jo̲nge̲le̲ dinde̲ne̲ na pulise̲ jowe̲ jangame̲ne̲ nde Loba.—Mateo 4:8-10.

2. Ni ange̲l, Satan, e kwalisane̲ Eva tongwea na ńama-bwaba. Tongwea na mpoṅ, e nime̲le̲ mo̲ o kwe̲me̲ Loba. Nika so̲ nde Satan a te̲nge̲ne̲no̲ nje e belabe̲ ná “bediedi basam” ba Loba to̲ epol’ao ya Ńasam nu Peti. Satan a baise̲ myuedi o bia nga Loba a madie̲le̲ baboledi Bao o ńai ni dongame̲n na o bwam babu. Satan a wan pe̲ myuedi o bia nga mot’a benama a me̲nde̲ tika tingame̲ o bolea Loba. Tongwea na nika nde Satan a timbise̲no̲ mo̲me̲ne̲ musinged’a Loba. Ońola nika nde a timbino̲ belabe̲ ná Satan Diabolo.—Bebotedi 3:1-5; Hiob 1:8-11; Bebīsedi 12:9.

3. Satan a makeka o lo̲ndo̲ bato ná bowe̲ mo̲. (2 Korinto 11:3, 14) Mbadi po̲ a mawo̲ndo̲no̲ bato ńe nde tongwea na ebasi e kwedi. Ebasi e malee̲ te̲ mpoṅ jombwea Loba, ke̲ e malonde̲ nde mwano ma Satan na mbale̲. (Yohane 8:44) Bato bena be belongi ba bebasi be kwedi bena ba dube̲ na iwiye̲ ye̲se̲ ná ba mowe̲ nde Loba la mbale̲. Nde na mbale̲ ba mabolea nde Satan. E nde ‘loba la mun mundi ma wase.’—2 Korinto 4:4.

Ebasi e kwedi, ndimsi na kumb’ekombo ba mawo̲ndo̲ bato

4. Bolane̲ la ndimsi pe̲ le nde mbadi nipe̲pe̲ Satan a madutano̲ bato owas’a ngiń’ao. Moto ena a pulise̲ midī o kombe̲ mo̲, o bolane̲ bape̲pe̲ bobe, o bīse̲ mambo ma me̲nde̲ po̲, to̲ o po̲ngo̲ betańsedi. Satan nde e ni ngińa mwititi ńe ombusa ben beboledi be̲se̲. Ná di bwese̲ Loba muńe̲nge̲, di sangame̲ne̲ o be̲ne̲ dongo to̲ diwo̲ na ndimsi.—Ndimbisedi 18:10-12; Bebolo 19:18, 19.

5. Satan a mawo̲ndo̲ pe̲ bato tongwea na kumb’eyobo na jowe̲ la bebokedi ba politik. Bato bō̲ ba mo̲nge̲le̲ ná ekombo abu to̲ eyobo abu e buki bene̲. Nde nika e titi mbale̲. (Bebolo 10:34, 35) Bape̲pe̲ ba mawasa nde o bo̲le̲ ndut’a mbel’a moto tongwea na bebokedi ba politik. Na bola la nika, ba mato̲bo̲ nde Janea la Loba. Mo̲ nde le mpo̲m ma lambo di mabo̲le̲ ndut’asu.—Daniel 2:44.

Te̲nge̲ne̲ Satan tongwea na benga jokwa jombwea Yehova

6. Mbadi nipe̲pe̲ Satan a mawo̲ndo̲no̲ bato ńe nde tongwea na kekise̲ babo̲ na bepuledi ba bobe. Yehova mo̲ ná jeke biso̲ mo̲me̲ne̲ na beboledi ba mbindo ebanja a bi ná be me̲nde̲ lenea biso̲ bobe. (Galatia 6:7, 8) Bato bō̲ bena ba pula ná o late na babo̲ o be beboledi. O̲nge̲le̲ so̲ ná Satan na mbale̲ nde a mapule̲ ná o bole man mambo ma bobe.—1 Korinto 6:9, 10; 15:33.

7. Satan ena a bolane̲ mitakisan to̲ mabándan o pula ná o pande etum na Yehova. Bandolo bo̲ngo̲ bō̲ bena ba londa na malinga ońola ná o mokwa Bibe̲l. Bape̲pe̲ bena ba yo̲ye̲ wa. Nde na nja o kusanno̲ longe̲ e? Satan a mapula bwese̲ wa bo̲ngo̲ ná wese̲le̲ jokwa lo̲ngo̲ jombwea Yehova. O sese̲le̲ ná Satan a buke! (Mateo 10:34-39; 1 Petro 5:8, 9) O mate̲nge̲ne̲ te̲ Diabolo, o mabwese̲ nde Yehova muńe̲nge̲ na lee̲ pe̲ ná o masuwe̲le̲ jasame̲ Lao.—Minia 27:11.

Copyright © 2006 Watch Tower Bible and Tract Society of Pennsylvania. All rights reserved.