Nje Ye Janea la Loba e?

1. Niponda a tano̲ o mundi ma wase, Yesu okwe̲le̲ bokwedi bao o kane̲ ońola Janea la Loba. Janea le nde bediedi ba mundi be be̲n kiṅe̲ o mulopo mao. Janea la Loba le nde mbad’a bediedi ba tobotobo. Di maso̲be̲ nde o mo̲ń, nde di me̲nde̲ die̲le̲ nin wase ńe̲se̲. Di me̲nde̲ sangise̲, to̲ so̲ timbise̲le̲ dina la Loba bosangi. Di me̲nde̲ o bola ná jemea la Loba di bolabe̲ o wase kana di mabolabe̲no̲ o mo̲ń.—Mateo 6:9, 10.

2. Loba a ta a kakane̲ ná Yesu a me̲nde̲ be̲ Kiṅ’a Janea Lao. (Lukas 1:30-33) Niponda Yesu a tano̲ o mundi ma wase, a lee̲ ná a me̲nde̲ be̲ Mudiedi ńe muyao, nu te̲m na sim, ńe pe̲ ná ke̲nge̲nge̲. Niponda a timbino̲ o moń, a si te̲se̲be̲ ka Kiṅ’a Janea la Loba dibokime̲ne̲. (Bonaheber 10:12, 13) O mbu ma 1914, Yehova a boli Yesu ngiń’a byanedi A tano̲ a mákakane̲ mo̲. Botea na ni ponda, Yesu a madie̲le̲ omo̲ń ka Kiṅe̲ ni po̲so̲be̲ na Yehova.—Daniel 7:13, 14.

3. Yehova a po̲si pe̲ bome na bito ba jemea bō̲ o mundi ma wase ná bale o mo̲ń. Ba me̲nde̲ janea mbel’a moto mwemba na Yesu ka kiṅe̲, bakaisedi, na prisi. (Lukas 22:28-30; Bebīsedi 5:9, 10) Yesu a bele̲ ban badiedi mwemba na mo̲ o Janea lao ná “dibemba disadi”. Be o muso̲ngi ma 144 000.—Lukas 12:32; Bebīsedi 14:1-3.

4. Dibokime̲ne̲ te̲ Yesu a timbino̲ Kiṅe̲, a pangi nde Satan na ange̲l’ao ya bobe o mo̲ń, imbe̲le̲ babo̲ o mbasanedi ma mundi ma wase. Ońola nika nde botea o mbu ma 1914, mambo ma batino̲ o be̲ bobe o wase. (Bebīsedi 12:9, 12) Bila, njai inde̲ne̲, maboa ma bobe, muto̲nde̲ ma kwe̲me̲ la mbenda—man me̲se̲ me nde dongo la “eyemban” e malee̲ ná Yesu a n’anea na ná yen ebe̲yed’a mambo e mápo̲ o mińa mao misukan.—Mateo 24:3, 7, 8, 12; Lukas 21:10, 11; 2 Timoteo 3:1-5.

5. Son a ponda, Yesu a me̲nde̲ kaise̲ bato, aba babo̲ kana mutatedi a mabano̲ mido̲ngi na mbodi. “Mido̲ngi” me nde ba ba me̲nde̲ lee̲ ná be nde bautu bao ba jemea. Ba me̲nde̲ kusa longe̲ la bwindea o wase. “Mbodi” ye nde ba bena ba me̲nde̲ bange̲ Janea la Loba. (Mateo 25:31-34, 46) Son a ponda Yesu a me̲nde̲ ńamse̲ be̲se̲ be bowan ba mbodi. (2 Tesalonika 1:6-9) O mapula te̲ be̲ mō̲ ńa “mido̲ngi” ma Yesu, wangame̲ne̲ senga myango ma bwam ma Janea na we̲le̲ nje o mokwano̲ o ebolo.—Mateo 24:14.

Owas’a Janea la Yesu, dibena to̲ ndando ba si me̲nde̲ pe̲ be̲

6. Bon ba we̲nge̲, wase ńabedi bekombo jita. Ewo̲ te̲ e be̲n lao janea. Man matumba ma yo̲ki jana diwo̲ te̲ te̲nge̲ne̲ dine̲. Nde Janea la Loba di me̲nde̲ timbane̲ manea ma bato me̲se̲. Di me̲nde̲ die̲le̲ ka mpo̲m ma janea o wase ńe̲se̲. (Daniel 2:44) Tongwea na nika, bila, ebwan na njó ba si me̲nde̲ pe̲ be̲. Bato be̲se̲ ba me̲nde̲ ja o wuma iwo̲ o musango na o mulatako.—Mika 4:3, 4.

7. Otetena Janea la Yesu la Ikol’a Mbu, bato ba jemea ba me̲nde̲ timba ná ke̲nge̲nge̲, wase ńe̲se̲ pe̲ e me̲nde̲ timba paradisi. Ya po̲le̲ o su la ikol’a mbu, ke̲ Yesu a mábola nje ye̲se̲ Loba a baise̲no̲ mo̲ ná a bole. To̲ denge̲ a matimbise̲le̲ so̲ Sango ao Janea. (1 Korinto 15:24) Ońola nje o titino ná o langwea mako̲m na bandolo bo̲ngo̲ nje Janea la Loba di me̲nde̲no̲ bola e?

Copyright © 2006 Watch Tower Bible and Tract Society of Pennsylvania. All rights reserved.