Baboledi ba Loba Bangame̲ne̲ o Be̲ Bosangi

1. Yehova Loba e bosangi na ná ke̲nge̲nge̲. A me̲ngane̲ ba ba mowe̲ mo̲ ná ba tike o be̲ bosangi—o mudī, o bedangwedi, o mo̲nge̲le̲ na o ńolo. (1 Petro 1:16) E mabaise̲ miwe̲n na mbale̲ o tika be̲ bosangi o miso̲ ma Loba. Di maja nde o wase ńena ńe mbindo. Di be̲n pe̲ ewe̲nji te̲nge̲ne̲ ńo̲ng’asu ya bola bobe. Nde di sangame̲ne̲ o bo̲bise̲.

2. Bosangi ba Mudī: Yete̲na di mapula bolea Yehova, di titina di tika bupe̲ belēdi to̲ bede̲mo to̲ bō̲ ba ebasi e kwedi. Jangame̲ne̲ o busa o ebasi e kwedi na banga pe̲ suwe̲le̲ mo̲ o mbadi ye̲se̲. (2 Korinto 6:14-18; Bebīsedi 18:4) Di mokwa te̲ mbale̲ jombwea Loba, di no̲nge jangame̲ye̲ ná di si lo̲ndo̲be̲ na bato ba mokwe̲le̲ lobango.—2 Yohane 10, 11.

3. Bosangi o Bedangwedi: Yehova a mapula ná ba ba mowe̲ mo̲ ba die̲le̲ babo̲ mo̲me̲ne̲ ka Kriste̲n ya mbale̲ ponda ye̲se̲. (1 Petro 2:12) A me̲ne̲ nje ye̲se̲ di mabolano̲, to̲ e be̲ nde o diwuta (Bonaheber 4:13) Jangame̲ne̲ panda etum na musonje na beboledi ba mbindo bepe̲pe̲ ba mun mundi ma wase.—1 Korinto 6:9-11.

4. Bosangi ba Mo̲nge̲le̲: Yete̲na di londe̲ myo̲ngo̲ masu na mo̲nge̲le̲ ma sangi na me ná ke̲nge̲nge̲, bedangwedi basu pe̲ be me̲nde̲ be̲ bosangi. (Filipi 4:8) Nde yete̲na di ko̲lo̲ngo̲ne̲ mambo ma mbindo, nika e me̲nde̲ nde lenea bediedi ba bobe. (Mateo 15:18-20) Jangame̲ne̲ o panda na beńe̲nge̲ be makwese̲ mo̲nge̲le̲ masu mbindo. Jena di londe̲ myo̲ngo̲ masu na mo̲nge̲le̲ ma sangi tongwea na jokwa la Eyal’a Loba.

5. Bosangi ba Ńolo: Ońola ná i lomabe̲ nde na Loba, Kriste̲n yangame̲ne̲ kombe̲ mańolo mabu na mbo̲t’abu bosangi. Jangame̲ne̲ jowa mā masu ke̲ di mawa o ndabo’a mbusa, jangame̲ne̲ pe̲ o jowa mo̲ o biana di mada, to̲ tapa nje e madabe̲. O si be̲n te̲ mutombo ma bwam, nje o mabusise̲no̲ yangame̲ne̲ pulabe̲. (Ndimbisedi 23:12, 13) Kombe̲ la ńolo bosangi di mongwane̲ o be̲ne̲ ja la bwam. Wum’a bejedi ya Kriste̲n yangame̲ne̲ o be̲ ne̲te̲ na ńai ni sangi o eboko na oteten. Yangame̲ne̲ be̲ o mundi ka eyembilan ya bwam ya bosangi.

6. Beto̲pedi be Sangi: Baboledi ba Loba bangame̲ne̲ to̲po̲ mbale̲ ponda ye̲se̲. Balobango ba si me̲nde̲ jingea o Janea la Loba. (Efeso 4:25; Bebīsedi 21:8) Kriste̲n i si mabolane̲ beto̲pedi ba bobe. I si masenga to̲ to̲po̲ make̲ko ma sangame̲n to̲ myango ma mbindo. Ońola bosangi ba beto̲pedi babu, i me̲ne̲ne̲ ka bato be diwengisan o bepolo babu b’ebolo to̲ o besukudu babu na o myoyo mabu ma mboa.—Efeso 4:29, 31; 5:3.

Baboledi ba Loba bangame̲ne̲ o be̲ bosangi o mbadi ye̲se̲

Copyright © 2006 Watch Tower Bible and Tract Society of Pennsylvania. All rights reserved.