Beboledi bena Loba a Singe̲no̲

1. Baboledi ba Loba ba to̲ndi nje ye bwam. Nde bangame̲n pe̲ o jokwa o singe̲ nje ye bobe. (Myenge 97:10) Nika e mapula kwala samba beboledi bena Loba a singe̲no̲. Be beboledi be so̲ nde nje e?

2. Bediedi ba Bobe Jombwea Mulatako: Mulatako ma mome na muto oboso ba diba, musonje, mulatako na ńama, mulatako na mot’a mbia, nikame̲ne̲ pe̲ na mulatako ma bome na bome me nde myobe midili te̲nge̲ne̲ Loba. (Levitiko 18:6; Roma 1:26, 27; 1 Korinto 6:9, 10) Mome na muto ba si bane̲ te̲ nde ba ja mwemba, bangame̲ne̲ o jabane̲ to̲ so̲ o bane̲ bupisane̲ mbenda.—Bonaheber 13:4.

Loba a singe̲ so̲ki, jiba, maloko ma mo̲ni, na bebolo ba njó

3. Mpoṅ, Maloko ma Mo̲ni, Jiba: Yehova Loba a titi ná a to̲po̲ lobango. (Tito 1:2) Bato ba mapule̲ ná a do̲lisane̲ babo̲ bangame̲n samba to̲po̲ la lobango. (Minia 6:16-19; Kolose 3:9, 10) Pat’a maloko ma mo̲ni ye̲se̲ i se̲medi nde o mukubo. Kriste̲n i si mano̲ngo̲ dongo o pat’a maloko ma mo̲ni to̲ po̲ ka jambo, pembisan’a wo̲si, na yine̲ ńai ipe̲pe̲. (Efeso 5:3-5) Omo̲ń’a nika, kriste̲n i si miba. I si manda bema i bino̲ ná bibabe̲ nde to̲ no̲ngo̲ bema ba bato bape̲pe̲ esibe̲ wonja.—Bebusedi 20:15; Efeso 4:28.

4. Malinga, Njó: Malinga ba si maleano̲ mena ma wana beboledi ba njó. (Bebotedi 4:5-8) Mot’a njó a titi ná a be̲ diko̲m la Loba. (Myenge 11:5; Minia 22:24, 25) E si te̲nge̲n o kuna to̲ o timbise̲le̲ bobe ońola mambo ma bobe bape̲pe̲ ba bolane̲no̲ biso̲.—Minia 24:29; Roma 12:17-21.

5. Koma la Losa na Ndimsi: Bato bō̲ ba mabolane̲ ngiń’a midī o keka bo̲le̲ maboa. Bane̲ ba mangwa basingedi babu mambo o bouse̲ babo̲ to̲ mo̲me̲ne̲ o bwa babo̲. Ngińa ńena ńe ombusa ben beboledi be̲se̲ ńe nde Satan. Ońola nika nde Kriste̲n i sangame̲ne̲no̲ no̲ngo̲ dongo o man me̲se̲. (Ndimbisedi 18:9-13) Tika be̲ be̲be̲ na Yehova nde le bekombedi be peti te̲nge̲ne̲ mambo bape̲pe̲ beno̲ ná bangwa biso̲.—Minia 18:10.

6. So̲ki: E titi bobe o ńo̲ son’a wań, bie̲, to̲ ńai a mao ipe̲pe̲. (Myenge 104:15; 1 Timoteo 5:23) Nde muńo̲si na so̲ki nde be bobe o miso̲ ma Loba. (1 Korinto 5:11-13; 1 Timoteo 3:8) Ńo̲ la jita la belam lena di ńamse̲ ja lo̲ngo̲ la bwam na jaba mbia mo̲ngo̲. Lena pe̲ di bola wa o pomane̲ o ko̲ o makekisan mape̲pe̲.—Minia 23:20, 21, 29-35.

7. Bato ba mabole̲ mambo Loba a kwalino̲ ná me bobe ba “si me̲nde̲ sangwa Janea la Loba”. (Galatia 5:19-21) Yete̲na o to̲ndi Loba na mbale̲ na pula pe̲ do̲lisane̲ mo̲, wena o tese̲ wamo̲me̲ne̲ wonja na ben beboledi. (1 Yohane 5:3) Okwa o singe̲ nje Loba a makwalano̲ ná ye bobe. (Roma 12:9) Dangwa na bato ba be̲n bede̲mo Loba a do̲lisanno̲. (Minia 13:20) Midenge ma Kriste̲n yō mena mi be̲ wa mpo̲lo̲lo̲ ma jongwane̲. (Yakobo 5:14) Nde omo̲ń’a me̲se̲, lakisane̲ nde na jongwane̲ la Loba tongwea na muka.—Filipi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.