Bedubedi na Bede̲mo Be Malingise̲ Loba

Loba a titi Maloba Malalo o Loba Diwo̲

1. Seto̲ bedubedi be̲se̲ na bede̲mo be̲se̲ nde be bobe. Nde Loba a si mado̲lisane̲ mo̲ yete̲na be wu nde o ebasi e kwedi to̲ yete̲na be mate̲nge̲ne̲ belēdi ba Bibe̲l.—Mateo 15:6.

2. Maloba Malalo o Loba Diwo̲: Mo̲ Yehova e nde—bato balalo o Loba diwo̲ e? Ke̲m! Yehova, Tete̲, e nde “mpo̲m ma Loba la mbale̲”. (Yohane 17:3; Marko 12:29) Yesu e nde Mun’Ao ńa boso, e pe̲ nde owas’a Loba. (1 Korinto 11:3) Tete̲ a buki Muna. (Yohane 14:28) Mudī musangi mu titi moto; mwe nde ngiń’ebolo ńa Loba.—Bebotedi 1:2; Bebolo 2:18.

Bolise̲ la Yabe̲ la Yesu na Pasa ba mawa nde o bebasi be kwedi ba kwaṅ

Njo̲m to̲ po̲ e titi o jowe̲ bawedi to̲ o bwa babo̲ bo̲ngo̲

3. Yabe̲ la Yesu na Pasa: Yesu a si yabe̲ o 25 ma mo̲di mu londe̲ 12. A yabe̲ nde be̲be̲ na buńa ba boso ba mo̲di mu londe̲ 10, pond’a mbu ńena batatedi ba mese̲le̲no̲ mabemba mabu o eboko bulu. (Lukas 2:8-12) Yesu a sanedi Kriste̲n to̲ buńa ná i bolise̲ buńa bao ba yabe̲. O diwengisan a bīse̲ nde bokwedi bao ná ba bolise̲ to̲ so̲ ná bo̲nge̲le̲ kwed’ao. (Lukas 22:19, 20) Bolise̲ la yabe̲ la yesu na bede̲mo bao be mawa nde o bebasi be kwedi ba kwaṅ. Nika ńe pe̲ mbale̲ ońola bede̲mo ba Pasa, ka bolane̲ la mye̲ń na pakatolo. Kriste̲n yaboso i si ta i bolise̲ yabe̲ la yesu to̲ Pasa, name̲ne̲ pe̲ na Kriste̲n ya mbale̲ we̲nge̲.

4. Jo̲nge̲le̲ la Buńa ba Yabe̲: Mińa ma yabe̲ miba buka te̲ nde Bibe̲l e mato̲peano̲, mi bolisabe̲ pe̲ nde na bato ba si ta bowe̲ Yehova. (Bebotedi 40:20-22; Marko 6:21, 22, 24-27) Kriste̲n ya boso i si ta i bolise̲ mińa ma yabe̲. Ede̲mo a bolise̲ la mińa ma yabe̲ e wu nde o bebasi be kwedi ba kwaṅ. Kriste̲n ya mbale̲ i mabola mabea na longe̲le̲ mańolo o to̲ njika ponda nde oteten’a mbu.

5. Bo̲ngo̲ ba Bawedi: Bawedi ba titina ba we̲le̲ bola to̲ senga to̲ lambo. Di titina jongwane̲ babo̲, to̲ babo̲ pe̲ ba titina ba bolane̲ biso̲ bobe. (Myenge 146:4; Mulangwedi 9:5, 10) Mudī mu mawo̲; mu si matika be̲ longe̲ ombusa kwedi. (Hesekiel 18:4) Nde o dongo la ngedi, ange̲l ya bobe i mabelabe̲ ná midī ma bobe, i mabola biana mo̲ nde ye midī ma bawedi. Bede̲mo be̲se̲ be se̲medi o bo̲ngo̲ ba bawedi to̲ o jowe̲ la bawedi be bobe.—Yesaya 8:19.

6. Mbasa: Yesu a si wedi o mbasa. A wedi nde o diwondi to̲ so̲ o ebongo. Eyal’a Grikia e tukwabe̲ ná “mbasa” o Bibe̲l jita e makwalea nde esungu’ebongo ewo̲ na mune. Eyemban a mbasa e wu nde o bebasi be kwedi ba kwaṅ. Mbasa e si ta e bolane̲ to̲ kusa jowe̲ na Kriste̲n ya boso. Na nika so̲, o mo̲nge̲le̲ ná e te̲nge̲ne̲ ná o bolane̲ mbasa o jowe̲ e?—Ndimbisedi 7:26; 1 Korinto 10:14.

7. Yena e be̲ ndutu jita o jese̲le̲ ben bedubedi na ben bede̲mo. Mbia na mako̲m bena ba keka yuwe̲le̲ mo̲nge̲le̲ mo̲ngo̲ ná o si wengisane̲ bedubedi bo̲ngo̲. Nde dolisane̲ la Loba di buki do̲lisane̲ la bato.—Minia 29:25; Mateo 10:36, 37.

Copyright © 2006 Watch Tower Bible and Tract Society of Pennsylvania. All rights reserved.