Ne̲ni Weno̲ Ná o So̲ Jowe̲ la Mbale̲ e?

1. Yesu a boki nde ebas’a Kriste̲n ya mbale̲ ewo̲. O nin we̲nge̲, ńolo po̲, to̲ so̲ dibo̲to̲ diwo̲ la bowe̲ Yehova Loba nde langame̲ne̲ o be̲. (Yohane 4:23, 24; Efeso 4:4, 5) Bibe̲l e malee̲ ná buka te̲ ngus’a bato nde ye o ngea nisadi ni malane̲ o longe̲.—Mateo 7:13, 14.

2. Bibe̲l e ta e mábīse̲ ná ombusa kwed’a bamuloloma, belēdi be kwedi na bebolo be si wo̲n Kriste̲n be me̲nde̲ jingea son na son oteten’a mwemba ma Kriste̲n. Bato ba me̲nde̲ duta badubedi ná ba bupe̲ nde babo̲ o mulopo ma bupe̲ Kristo. (Mateo 7:15, 21-23; Bebolo 20:29, 30) Ońola nika nde di me̲ne̲no̲ ńai na ńai a bebasi be makwale̲ ná be Kriste̲n. Ne̲ni jeno̲ ná di we̲le̲ jemba Kriste̲n ya mbale̲ e?

3. Eyemban e buki be̲se̲ ya Kriste̲n ya mbale̲ ye nde ná i maleane̲le̲ ndol’a mbale̲. (Yohane 13:34, 35) I si mokwabe̲le̲ o jo̲nge̲le̲ ná i buki bato ba matumba mape̲pe̲ to̲ bena ba be̲n muso̲no̲ ma ńolo mupe̲pe̲. I si mokwabe̲le̲ pe̲ to̲ o singe̲ bato ba bekombo bepe̲pe̲. (Bebolo 10:34, 35) Ońola nika nde i si mano̲ngo̲no̲ dongo o bila. Kriste̲n ya mbale̲ i mombwea nde babo̲ mo̲me̲ne̲ ka bonasango na bonańango.—1 Yohane 4:20, 21.

Kriste̲n ya mbale̲ i to̲ndo̲ne̲le̲, i be̲ne̲ye̲ Bibe̲l edube, i mate pe̲ dikalo jombwea Janea la Loba

4. Eyemban epe̲pe̲ ya jowe̲ la mbale̲ ye nde ná belongi bao be be̲ne̲ye̲ Bibe̲l edube ende̲ne̲. Be makasa mo̲ ka Eyal’a Loba na dube̲ pe̲ nje e makwalano̲. (Yohane 17:17; 2 Timoteo 3:16, 17) Be malanga Eyal’a Loba ka lambo di buki mo̲nge̲le̲ to̲ bede̲mo ba bato ba benama. (Mateo 15:1-3, 7-9) Be makeka ná Bibel e die̲le̲ longe̲ labu la buńa te̲. Ońola nika nde be si mabīse̲no̲ lambo, nde be bola diwengisan.—Tito 1:15, 16.

5. Jowe̲ la mbale̲ jangame̲n pe̲ bola dina la Loba edube. (Mateo 6:9) Yesu a boli ná dina la Loba, Yehova, di biane̲ na bato. Kriste̲n ya mbale̲ pe̲ yangame̲ne̲ bola mulemlem. (Yohane 17:6, 26; Roma 10:13, 14) Njika bato ba malangweye̲ bape̲pe̲ ońola dina la Loba o epas’ango̲ ya mundi e?

6. Kriste̲n ya mbale̲ yangame̲n o te̲ dikalo jombwea Janea la Loba. Yesu a boli nika. A ta a to̲po̲ ponda ye̲se̲ ońola Janea. (Lukas 8:1) Anedi bokwedi bao o langwa mulemlem ma mwe̲ndi o wase ńe̲se̲. (Mateo 24:14; 28:19, 20) Kriste̲n ya mbale̲ i dube̲ ná Janea la Loba buka te̲ nde di me̲nde̲ wane̲ musango ma mbale̲ na mbo̲le̲ o nin wase.—Myenge 146:3-5.

7. Bokwedi ba Yesu ba sangame̲n no̲ngo̲ dongo to̲ diwo̲ na nin was’a bobe. (Yohane 17:16) Ba sangame̲n o jinge̲le̲ babo̲ mo̲me̲ne̲ o bekwadi ba politik ba nin wase to̲ o musunga mao ma madoi. Ba mabanga bediedi, bedangwedi na bete̲medi ba bobe bena be londi o wase we̲nge̲. (Yakobo 1:27; 4:4) Wena o we̲le̲ jemba dibo̲to̲ la bato lena di be̲n byembilan ba Ebas’a Kristo ya mbale̲ o epas’ango̲ ya mundi e?

Copyright © 2006 Watch Tower Bible and Tract Society of Pennsylvania. All rights reserved.