Ne̲ni Mboṅ’a Yehova i Longedino̲ - Wum’a mibia i te̲se̲be̲ na Mbon’a Yehova

Wum’a mibia i te̲se̲be̲ na Mbon’a Yehova

Beliefs

Future

Nje Loba a Mabaise̲no̲ Biso̲ e?

Jokwa 14

Ne̲ni Mboṅ’a Yehova i Longedino̲
	Njika ponda Mboṅ’a Yehova i botedino̲ o nin pond’asu e? (1)
	Ne̲ni mako̲to̲ne̲ ma Mboṅ’a Yehova ma madiabe̲le̲no̲ e? (2)
	Myo̲ni mabu mi mawea nde o we̲ni e? (3)
	Nja ńe o mulopo ma mwemba te̲ e? (4)
	Njika ndongame̲n inde̲ne̲ i matombe̲ mbu te̲ e? (5)
	Njika ebolo e mabolabe̲ o mulopo mabu m’ebolo na o milábi mao e? (6)

1. Mboṅ’a Yehova ya we̲nge̲ i botedi nde o mimbu ma 1870. O bebotedi, ba ta nde ba belabe̲ ná Bokwe̲ Bibe̲l. Nde o mbu ma 1931 ba no̲ngi dina di weledi o Betiledi ná Mboṅ’a Yehova. (Yesaya 43:10) Bebokedi bena bebotedi bosadi, be timbi kola na be̲ne̲ lodun la Mboṅ i walame̲n o te̲ dikalo oteten’a buka na 230 ma bekombo.

2. Jita la Myemba ma Mboṅ’a Yehova mi be̲n ndongame̲n ngedi ilalo woki te̲. O belabe̲ o jukea o to̲ njika mo̲ nde. (Bonaheber 10:24, 25) Bibe̲l nde ńe eyot’a nje e maleabe̲le̲ oten. Ndongame̲n i matelame̲ na kwesame̲ pe̲ na muka. “Myenge ma mudī” mi matape̲ milema pe̲ mi malo̲ngo̲be̲ o jita la ndongame̲n. (Efeso 5:18, 19) Jingea di si masawabe̲, njangi to̲ po̲ pe̲ e titi.—Mateo 10:8.

3. Jita la myemba di matombise̲ ndongame̲n o Ndabo’a Janea. Ma mandabo ma yo̲ki nde be bye̲me̲ki ba milongi mi longabe̲ na Mboṅ ye nde baboledi ba wonja. O si me̲nde̲ je̲ne̲ bedinge̲dinge̲, mbasa, to̲ i ńai’a mambo o Ndabo’a Janea. Mo̲ni ba mabolane̲no̲ mu mawa nde tongwea na mabea ma wonja. Belimbi ba mabea be ońola ba ba mapule̲ o bole̲ mabea ma wonja.—2 Korinto 9:7.

4. O mwemba te̲, o be̲n batudu to̲ bombwedi. Ba madie̲le̲ belēdi oteten’a mwemba. (1 Timoteo 3:1-7; 5:17) Ba makusa jongwane̲ la baboledi. (1 Timoteo 3:8-10, 12, 13) Ban bato ba si te̲se̲be̲ ka banedi omo̲ń’a bene̲ belongi ba mwemba. (2 Korinto 1:24) Ba si mabelabe̲ na mina ma tobotobo. (Mateo 23:8-10) Bebo̲tedi babu be titi diwengisan na ba bane̲. Ba si masawabe̲le̲ pe̲ to̲ ońola ebol’abu. Batudu ba mombwea ńo̲ng’a mudī ya mwemba na wonja ńe̲se̲. Ba ma we̲le̲ wana belo̲ko̲medi na bediedi o ponda ndutu.—Yakobo 5:14-16; 1 Petro 5:2, 3.

5. Mboṅ’a Yehova i majese̲ pe̲ ndongame̲n inde̲ne̲ mbu te̲. O ni ponda, myemba jita mi mukea o bwam ba kusa belēdi ba Bibe̲l ba tobotobo. Dubise̲ la bokwedi ba peńa pe̲ di yo̲ki o be̲ ka dongo diwo̲ la ndongame̲n ninde̲ne̲ te̲.—Mateo 3:13-17; 28:19, 20.

6. Mulopo m’ebolo ma Mboṅ’a Yehova mwe nde o New York. Oten nde Ńolo ni Madie̲le̲ e maso̲be̲no̲, nika ńe nde klas’a batudu bō bena ba mombweye̲ myemba ma wase ńe̲se̲. O be̲n pe̲ so̲ buka 100 milábi m’ebolo o wase ńe̲se̲. O be bepolo, baboledi ba wonja ba mongwane̲ o druk na loma pe̲ kalati i mongwane̲ o so̲ṅtane̲ Bibe̲l. Bediedi pe̲ be mabolabe̲ oten jombwea ebol’a dikalo. Ońola nje o si ma pe̲pe̲le̲no̲ mulábi m’ebolo mwena mwe wa be̲be̲ e?

Busisabe̲ o mbu ma 1996
Copyright © 2008 Watch Tower Bible and Tract Society of Pennsylvania. All rights reserved.