1. Tatan o mókwa jita la mambo ma bwam o Bibe̲l. Din so̲ṅtane̲ langame̲ne̲ o die̲le̲ wa o longa ebe̲yed’a mot’a Kriste̲n. (Efeso 4:22-24) Di so̲ṅtane nde le lambo langame̲ne̲ o bwam ba tombwane̲ longe̲ la bwindea. (Yohane 17:3) Nde, bape̲pe̲ pe̲ ba mabwa ńo̲ngi o senga myango ma bwam ná babo̲ pe̲ ba kuse jongise̲. Kriste̲n ya mbale̲ ye̲se̲ yangame̲n o te̲ye̲ bape̲pe̲ dikalo. Nika nde ńe byanedi ba Loba.—Roma 10:10; 1 Korinto 9:16; 1 Timoteo 4:16.
2. Wena o botea kwalisane̲ ba bena be wa be̲be̲ mambo o mokwano̲. Bīse̲ mo̲ mbia mo̲ngo̲, mako̲m m’esukudu na m’ebolo. Be̲ muyao na we̲lisane̲ ke̲ o mabola nika. (2 Timoteo 2:24, 25) O̲nge̲le̲ ná bato ba yo̲ki jombwea bedangwedi ba moto buka senga nje a makwalano̲. Bedangwedi bo̲ngo̲ ba bwam be so ná be duta bape̲pe̲ ná ba senge mwe̲ndi o malangweano̲ babo̲.—Mateo 5:16; 1 Petro 3:1, 2, 16.
3. Na ponda, wena o be̲ ńai ni dongame̲n o botea te̲ dikalo na mwemba ma Mboṅ’a Yehova mwe wa be̲be̲. Tanga la mweńa di o bońaki bo̲ngo̲. (Mateo 24:14) Njika muńe̲nge̲ e me̲nde̲no̲ be̲ yete̲na o we̲li jongwane̲ nupe̲pe̲ o timba mūt’a Yehova na tombwane̲ longe̲ la bwindea!—1 Tesalonika 2:19, 20. |
