Mini Ji Mawu Yi Mi Tomi kɛ ha Zugba Nɔ?

1. Yehowa bɔ zugba nɔ konɛ adesai na buajɔ kɛ hi nɔ kɛ ya neneene. E suɔ nɛ dali, nɛ a ngɛ buajɔ hi zugba nɔ nɔ be fɛɛ be. (Lala 115:16; Yesaia 45:18) A bi zugba hɛ mi kpatae; e ngɛ kɛ yaa daa.—Lala 104:5; Jajelɔ 1:4.

2. Loko Mawu maa bɔ nɔmlɔ ɔ, E hla zugba he ko nyafii ko nɛ e pee lejɔ paradiso. E tsɛ lɛ kɛ Eden abɔɔ. Hiɔ ji he nɛ e kɛ kleklee nyumu kɛ yo, Adam kɛ Hawa wo. Mawu to kaa a fɔ bimɛ nɛ a he hiɛ nɛ zugba hi. Jinɛ a maa pee zugba tsuo paradiso bɔɔbɔɔ.—1 Mose 1:28; 2:8, 15.

Paradiso nɛ la

3. Adam kɛ Hawa pee yayami ngɛ Mawu mla nɛ a bua nɛ a gbo nɔ tue ɔ he je. Lɔɔ he je ɔ, Yehowa je mɛ kɛ je Eden abɔɔ mi. Paradiso ɔ la. (1 Mose 3:1-6, 23) Se Yehowa hɛ jii e yimi tomi kɛ ha zugba nɔ nɔ. E wo si kaa e maa pee lɛ paradiso eko hu, he nɛ adesai maa hi si ngɛ kɛ ya neneene. Mini blɔ nɔ e maa gu kɛ pee enɔ?—Lala 37:29.

4. Loko zugba nɔ maa pee paradiso ɔ, e sa nɛ a je nimli yayami peeli ɔmɛ kɛ je nɔ. (Lala 37:38) E nɔ maa ba mi ngɛ Harmagedon, nɛ ji Mawu ta nɛ e kɛ maa po yayami peemi se kwraa ngɛ je ɔ mi. Ngɛ lɔɔ se ɔ, a maa wo Satan tsumi jeha 1,000. E nɔ tsɔɔ kaa nɔmlɔ yayami ko kwraa be piɛe nɛ maa puɛ zugba hu. Mawu webi pɛ nɛ maa na yi wami nami.—Kpojemi 16:14, 16; 20:1-3.

5. Yesu Kliisto maa ye zugba nɔ nɔ Matsɛ jeha 1,000. (Kpojemi 20:6) E maa je yayami peemi kɛ je wa jwɛmi kɛ wa nɔmlɔ tsoi a he bɔɔbɔɔ. Wa maa pee adesai nɛ a he su kɛ pi si kaa benɛ Adam kɛ Hawa ngɛ loko a pee yayami ɔ. Hiɔ, bwɔmi, kɛ gbenɔ bi si hie hu. A maa tsa hiɔ tsɛmɛ, nɛ nimli nɛ a bwɔ maa pee nihewi kɛ yihewi eko hu.—Hiob 33:25; Yesaia 33:24; Kpojemi 21:3-4.

6. Ngɛ Yesu Jeha Akpe Nɔyemi ɔ mi ɔ, adesai anɔkuafohi maa tsu ni kɛ pee zugba nɔ tsuo paradiso. (Luka 23:43) A maa tle nimli akpekpei nɛ a gbo ɔ si kɛ ba adesa wami mi e ko hu ngɛ zugba nɔ. (Bɔfoi Asane 24:15) Ke a pee nɔ nɛ Mawu ngɛ hlae ngɛ a dɛ ɔ, a maa ya nɔ nɛ a maa hi si ngɛ zugba nɔ kɛ ya neneene. Ke pi ja, a maa kpata a hɛ mi kɛ ho neneene ya.—Yohane 5:28, 29; Kpojemi 20:11-15.

7. Lɔɔ he je ɔ, Mawu sisije yi mi tomi kɛ ha zugba maa ye omanye. O maa suɔ nɛ o na jɔɔmi nɛ maa ba huɔse ɔ ko lo? Ke ja, e he hia nɛ o ya nɔ nɛ o kase Yehowa he ni nɛ o bu nihi nɛ e ngɛ hlae ɔmɛ tue. He nya buami nɛ a peeɔ ngɛ Yehowa Odasefohi a Matsɛ yemi Asa nɔ nɛ o ma ya maa ye bua mo nɛ o pee ja.—Yesaia 11:9; Hebribi 10:24, 25.

Ngɛ Harmagedon se ɔ, a maa pee zugba paradiso

Copyright © 2006 Watch Tower Bible and Tract Society of Pennsylvania. All rights reserved.