Weku Si Himi Nɛ Sa Mawu Hɛ Mi

1. Baiblo ɔ de ɔ kɛ huno ji weku yi. (1 Korintobi 11:3) E sa nɛ huno ɔ ngɔ yo kake pɛ. E sa nɛ a sɛ gba si himi ɔ mi ngɛ blɔ kpakpa nɔ ngɛ mla nya.—1 Timoteo 3:2; Tito 3:1.

2. E sa nɛ huno ɔ suɔ e yo ɔ kaa benɛ e suɔ lɛ nitsɛ e he ɔ. E sa nɛ e kɛ lɛ hi si kaa benɛ Yesu kɛ e kaseli ɔmɛ hi si ɔ. (Efesobi 5:25, 28, 29) E sɛ nɛ e gbe e yo ɔ aloo e wa lɛ yimi ngɛ blɔ ko nɔ. Se, e gbo lɛ zo nɛ e kɛ bu ha lɛ.—Kolosebi 3:19; 1 Petro 3:7.

Tsɛ nɛ e ngɛ suɔmi ɔ hlaa e weku ɔ helo nya kɛ mumi mi nihi nɛ he hia mɛ kɛ haa mɛ

3. E sa nɛ tsɛ tsu ni waa kɛ hiɛ e weku ɔ nɔ. E sa nɛ e hla ni yeni, bo, tade, kɛ huɔ he kɛ ha e yo kɛ e bimɛ. E sa nɛ tsɛ tsu e weku ɔ mumi mi hiami nihi a he ni kɛ ha mɛ. (1 Timoteo 5:8) E nyɛɛ hɛ mi kɛ ye bua e weku ɔ nɛ a kase Mawu kɛ E yimi tomi he ni.—5 Mose 6:4-9; Efesobi 6:4.

4. E sa nɛ yogbayo pee walɔ kpakpa kɛ ha e huno. (1 Mose 2:18) E sa nɛ e ye kɛ bua e huno ɔ kɛ tsɔɔ a bimɛ ni nɛ a tsɔse mɛ. (Abɛi 1:8) Yehowa ngɛ hlae nɛ yogbayo je e suɔmi mi kɛ hiɛ e bimɛ a nɔ. (Abɛi 31:10, 15, 26, 27; Tito 2:4, 5) E sa nɛ e na bu nɛ emi kuɔ kɛ ha e huno ɔ.—Efesobi 5:22, 23, 33.

5. Mawu ngɛ hlae nɛ jokuɛwi bu afɔli tue. (Efesobi 6:1-3) E ngɛ fɔli a blɔ mi hyɛe kaa a tsɔɔ a bimɛ ni nɛ a kudɔ mɛ. E he hia nɛ fɔli na deka kɛ ha a bimɛ nɛ a kɛ mɛ kase Baiblo ɔ, nɛ a tsu nihi nɛ he hia mɛ ngɛ mumi mi kɛ he numi mi ɔ he ni kɛ ha mɛ. (5 Mose 11:18, 19; Abɛi 22:6, 15) E sɛ nɛ fɔli ɔmɛ tsɔse a bimɛ ngɛ yimi wami blɔ nɛ yeɔ awi nɔ.—Kolosebi 3:21.

Mawu ngɛ hlae nɛ fɔlɔhi tsɔɔ a bimɛ ni nɛ a kudɔ mɛ

6. Ke nimli nɛ a ngɛ gbae kɛ nyagbai kpe ngɛ be nɛ a maa pee ha kɛ hi si ngɛ kake peemi mi ɔ, e sa nɛ a bɔ mɔdi kaa a kɛ Baiblo ga womi maa tsu ni. Baiblo ɔ wo ɔ wɔ ga kaa wa je suɔmi kpo kɛ tsɔɔ nɛ wa kɛ yayami pa. (Kolosebi 3:12-14) Mawu Munyu ɔ sume gba mi gbami kaa lɔɔ nɔ a gu kɛ tsu nyagbai tsɔwii a he ni. Se yogbayo ma nyɛ maa to e yi mi kaa e maa je e huno he ke (1) e huno ɔ kɛ tsui timi kua e weku ɔ nɔ hyɛmi, (2) e huno ɔ yi mi wa nɛ e kɛ yo ɔ he wami nami kɛ e si himi wo osla mi, aloo (3) be nɛ e tee si kɛ woɔ lɛ ha nya wa tsɔ nɛ e nyɛ we nɛ e ja Yehowa.—1 Korintobi 7:12, 13.

7. E sa nɛ nimli nɛ a sɛ gba si himi mi ye a sibi anɔkuale. Gba puɛmi ji yayami nɛ a pee ɔ kɛsi ɔ Mawu kɛ gba si himi he piɛlɔ. (Hebribi 13:4) Nɔmlɔ kpa nɛ a kɛ maa huɔ si ngɛ he piɛlɔ se ɔ pɛ ji nɔ nɛ Ngmami ɔ ha he blɔ nɛ a kɛ poo gba mi nɛ a kɛ nɔmlɔ kpa maa sɛ gba ehe mi. (Mateo 19:6-9; Romabi 7:2,3) Yehowa nyɛ̃ gba mi pomi nɛ da we Ngmami nɔ nɛ a kɛ nɔmlɔ kpa maa sɛ gba ehe mi.—Maleaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.