Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ?

Ufọn Emi Eti Mbụk Anamde ọnọ N̄kann̄kụk Mbufo

KE ERERIMBOT mfịn, nnyịn imesiwak ndikop ẹtịn̄de ekikere emi: “Mme edumbet Ido Ukpono Christ inyeneke ufọn. Mmọ idikam inyeneke ufọn ke awak-n̄kukọhọ n̄kaowo mfịn.” Nte ededi, ke nneme oro ẹdọhọde nte adausụn̄ Hindu oro Mohandas K. Gandhi ekenyenede ye Lord Irwin, akani Andida ke Ibuot Ukara Britain ke India, ẹma ẹwụt ata isio isio ekikere. Ẹdọhọ ẹte ke Lord Irwin okobụp Gandhi se enye ekekerede nte edikọkde mme mfịna ke ufọt Great Britain ye India. Gandhi ama emen Bible onyụn̄ okụbọde aka Matthew ọyọhọ ibuot ition onyụn̄ ọdọhọ ete: “Ke ini idụt fo ye okịm ẹdidianade kiet ẹnam mme ukpepn̄kpọ oro Christ ekekpepde ke Ukwọrọikọ oro ke Obot, nnyịn iyọkọk mme mfịna, idịghe eke idụt nnyịn ikpọn̄ ikpọn̄ edi eke ofụri ererimbot nde.”

Ukwọrọikọ oro etịn̄ aban̄a ndiyom idaha eke spirit nnyụn̄ nnyene ifụre ifụre ido, ndinam emem, nditua owo mbọm, ndinyụn̄ mma edinen ido. Enye ikpanke uwotowo kpọt edi akpan ndiyat esịt ye mbon efen, ikpanke edisịn efịbe kpọt edi n̄ko akpan ọkpọsọn̄ idiọk ekikere kaban̄a idan̄. Enye asua usiondọ emi mînyeneke ntak oro esibiatde mme ubon onyụn̄ ọnọde nditọ unan. Enye ọdọhọ nnyịn ete: ‘Ẹma mme asua mbufo, ẹnọ mbon ubuene n̄kpọ, ẹkûbiere ikpe ẹnọ mbon efen ye unana mbọm, ẹnam n̄kpọ ye mbon efen nte mbufo ẹkpeyomde ẹnam ye mbufo.’ Edieke ẹdade kpukpru item emi ẹsịn ke edinam, ayada akwa ufọn edi. Adan̄a nte ediwak owo ke obio mbufo ẹnamde mmọ, ntre ke obio mbufo edikabade ọfọn akan!

Mme Ntiense Jehovah ẹtụk mme owo ke afan̄ emi. Bible ekpep mmọ ete ẹwụt ukpono ẹnọ ndọ. Ẹkpep nditọ mmọ nti edumbet. Ẹsọn̄ọ ẹtịn̄ ẹban̄a ufọn ubon. Mme ubon oro ẹdianade kiet ẹdi edidiọn̄ ẹnọ obio mbufo, ye idem idụt mbufo. Mbụkeset ẹyọhọ ye mme uwụtn̄kpọ ẹban̄ade nte mme ukara ererimbot ẹwụrede ke ini mbọbọ ubon ẹmemde ndien oburobụt ido ẹtọtde. Adan̄a nte mme owo ye mme ubon oro Mme Ntiense Jehovah ẹnamde ẹdu uwem nte ekemde ye mme edumbet Christian ẹwakde, ntre ke nsọn̄ibuot, oburobụt ido, ye ubiatibet ẹdisụhọrede ke obio mbufo.

Kiet ke otu ikpọ mfịna oro ẹtụkde mme obio ye mme idụt edi asari eke orụk. Ke edide isio ye oro, apostle Peter ọkọdọdọ ete: “Mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” Ndien Paul ekewet ete: “Jew ye Greek ikemeke ndidu, ofụn ye eyen-isọn̄ ikemeke ndidu, erenowo ye n̄wan inyụn̄ ikemeke ndidu; koro kpukpru mbufo ẹdi kiet ke Christ Jesus.” (Utom 10:34, 35; Galatia 3:28) Mme Ntiense Jehovah ẹnyịme emi. Kpukpru orụk ye uduot ẹdụn̄ ẹnyụn̄ ẹnam utom ọtọkiet ke ibuot itieutom ofụri ererimbot, ke mme n̄kọk itieutom, ye ke mme esop mmọ.

Ke Africa, ndusụk ekpụk ikemeke ndibuaha ọtọkiet ye unana en̄wan. Nte ededi, ke mme mbono Mme Ntiense Jehovah do, mme owo ẹtode ediwak nsio nsio ekpụk ẹdia udia, ẹna, ẹnyụn̄ ẹtuak ibuot ọtọkiet ke ọyọhọ n̄kemuyo ye ufiop ufiop itie ebuana. Idem esikpa ikpọ owo ukara ke ini mmọ ẹkụtde emi. Ẹma ẹtọt uwụtn̄kpọ utịp edidianakiet eke ata Ido Ukpono Christ ke Amsterdam News New York eke August 2, 1958. Ndikụt mbono ofụri ererimbot oro ẹkesiakde ke mbemiso oro Mme Ntiense ẹkewakde ẹbe tọsịn ikie iba ye aba-ye-duop oro ẹkesopde idem ke New York City, akanam ẹtịn̄ ikọ emi.

“Mbubịt owo, mfia owo ye mbon Edem Usaiahautịn ẹtode kpukpru idaha ke uwem ye kpukpru itie ke ererimbot, ẹma ẹbuaha ọtọkiet ke inemesịt ye ke ifụre ke kpukpru itie. . . . Mme Ntiense emi ẹtuakde ibuot ẹtode idụt 120 ẹmedụn̄ ẹnyụn̄ ẹtuak ibuot ọtọkiet ke emem, ẹwụtde mbon America ke edi mmemmem ndinam emi. . . . Mbono oro edi nyayama uwụtn̄kpọ ke nte mme owo ẹkemede ndinam utom nnyụn̄ ndụn̄ ọtọkiet.”

Ediwak owo ẹkeme ndidọhọ ẹte ke mme edumbet Ido Ukpono Christ inyeneke ufọn inọ ererimbot eyomfịn. Nte ededi, nso efen inyene ufọn m̀mê idinyene ufọn? Mme edumbet Christian ẹkeme ndinyene ufọn edieke ẹdade ẹsịn ke edinam ke obio mbufo idahaemi, ndien mmọ ẹyenam ẹdian kpukpru ‘obio ye esien ye idut’ ke ofụri isọn̄ ọtọkiet ke idak ukara Obio Ubọn̄ Abasi emi edikarade ubonowo.—Ediyarade 7:9, 10.

Copyright © 2006 Watch Tower Bible and Tract Society of Pennsylvania. All rights reserved.