Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ?

ABASI ayak idiọkido odu, ndien ediwak miliọn owo ke isọn̄ ẹkokoi ẹnam enye. Ke uwụtn̄kpọ, mmọ ẹsiak ekọn̄, ẹduọk mme bọmb ẹwot nditọwọn̄, ẹsobo isọn̄, ẹnyụn̄ ẹda akan̄ ẹdi. Ediwak miliọn owo ẹn̄wọn̄ sika ẹnyụn̄ ẹnyene kansa obufre, ẹsịn efịbe ẹnyụn̄ ẹnyene mme udọn̄ọ ẹmende ẹto idan̄, ẹn̄wọn̄ ọkpọsọn̄ mmịn ẹbe ubọk ẹnyụn̄ ẹdọn̄ọ udọn̄ọ edidiana ekpa, ye ntre ntre eken. Mme utọ owo emi inen̄ekede iyom kpukpru idiọkido ẹtre. Mmọ n̄kukụre ẹyom ẹsio mme ufen mmọ ẹfep. Ke ini mmọ ẹdọkde se ẹketọde, mmọ ẹsiseme ẹte, “Ntak edide ami-e?” Ndien mmọ ẹduọhọ Abasi, nte Mme N̄ke 19:3 ọdọhọde ete: “Ndisịme ido owo abiat uwem esie, ndien ekem enye enyene udu ye ỌBỌN̄.” (The New English Bible) Ndien edieke Abasi etrede idiọkido mmọ, mmọ ẹyeyat esịt ẹban̄a nte mînyeneke ifụre ndinam enye!

Akpan ntak emi Jehovah ayakde idiọkido odu edi man ọbọrọ ata emi Satan akamiade. Satan kpa Devil ọkọdọhọ ke Abasi ikemeke ndisịn mme owo ke isọn̄ emi ẹdinamde akpanikọ inọ Enye ke idak idomo. (Job 1:6-12; 2:1-10) Jehovah ayak Satan odu man enyene ifet ndisọn̄ọ ata esie. (Exodus 9:16) Satan ke aka iso ndida nnama ndi idahaemi, man ọwọn̄ọde mme owo ọkpọn̄ Abasi, nte enye odomode ndisọn̄ọ ata esie. (Ediyarade 12:12) Nte ededi, Job ama omụm nsọn̄ọnda akama. Jesus ama onyụn̄ anam ntre. Mme ata Christian ẹnam ntre idahaemi.—Job 27:5; 31:6; Matthew 4:1-11; 1 Peter 1:6, 7.

Idịghe ntre nte ekemde ye Bible. Etie nte ọfọn akaha ndidi akpanikọ n̄kukụre koro ubonowo emehe ye idiọkn̄kpọ ke ediwak isua ikie. Jehovah okobot isọn̄ onyụn̄ ọdọhọ ubonowo ete ẹyọhọ enye ye ndinen iren ye iban oro ẹdisede ẹban̄a eto ye uwem unam esie ẹnyụn̄ ẹkpeme uyai esie utu ke ndisobo enye. (Se ibuotikọ oro “Nso ke Mmọ Ẹnịm ke Akpanikọ?” ye “Eti Mbụk Oro Mmọ Ẹyomde Fi Okop.”) Utu ke Paradise oro ẹn̄wọn̄ọde ndifọn n̄kaha ndidi akpanikọ, mfụhọ mfụhọ idaha eke idahaemi ọdiọk akaha ndika iso. Paradise ayada itie esie.

Ndinyene mbuọtidem ke mme un̄wọn̄ọ emi idịghe ikpîkpu n̄kpọ. “Mbuọtidem oto ke edikop.” Ebede ke ndikpep Ikọ Abasi, ẹyekụt ọniọn̄ esie, mbuọtidem onyụn̄ ọkọri.—Rome 10:17; Mme Hebrew 11:1.

Ukpepn̄kpọ Bible oro aban̄ade udọkisọn̄ nyom n̄kpọeset ọsọn̄ọ nte ediwak mbụk Bible ẹdide akpanikọ. Ifiọk ntaifiọk akpanikọ odu ke n̄kemuyo ye Bible. Mme akpanikọ ẹtienede mi ẹma ẹdu ke Bible anyan ini mbemiso nditọ ukpepn̄kpọ ererimbot ẹkekụtde: nsio nsio idaha oro isọn̄ ekebede ke nte enye akasan̄ade edidu, nte ke isọn̄ edi ekara, nte ke enye ọkọn̄ọ ke ikpîkpu ke ufụmenyọn̄ ye nte ke mme inuen ẹsiwọrọ idụn̄.—Genesis, ibuot 1; Isaiah 40:22; Job 26:7; Jeremiah 8:7.

Mme ntịn̄nnịm ikọ ndisu owụt ke ẹkeda odudu spirit ẹwet Bible. Daniel ama ebem iso etịn̄ aban̄a mme ukara ererimbot ndidaha nda nnyụn̄ nduọ, ọkọrọ ye ini oro Messiah edidide ẹdinyụn̄ ẹwotde enye. (Daniel, ibuot 2, 8; 9:24-27) Mfịn, mme ntịn̄nnịm ikọ eken ẹmesu, ẹnamde ẹdiọn̄ọ mmọ emi nte “ukperedem ini.” (2 Timothy 3:1-5; Matthew, ibuot 24) Owo ikemeke ndinyene utọ mbemiso ifiọk oro. (Isaiah 41:23) Kaban̄a nsọn̄ọ efen efen, se n̄wed oro The Bible—God’s Word or Man’s? ye Is There a Creator Who Cares About You?, emi Watchtower Bible and Tract Society osiode.

Ana afo ekpep Bible onyụn̄ etie ekere enye, ke ukem ini oro eben̄ede spirit Abasi ndida fi usụn̄. (Mme N̄ke 15:28; Luke 11:9-13) Bible ọdọhọ ete: “Edieke owo mbufo ekededi ananade eti ibuot, yak enye eben̄e Abasi, emi ọnọde kpukpru owo ke ntatubọk, mînyụn̄ itọhọke owo; ndien Abasi ọyọnọ enye.” (James 1:5) N̄ko, mme n̄wed un̄wam ukpep Bible ẹdu oro odotde ẹkere ẹban̄a. Nte ido edide ẹyom un̄wam ẹto mbon efen, nte ke ini Philip ekekpepde n̄kpọ ye owo Ethiopia. (Utom 8:26-35) Mme Ntiense Jehovah ẹsinịm ukpepn̄kpọ Bible ke mfọn ye mbon oro ẹnyenede udọn̄ ke mme ufọk mmọ. Emenyene ifụre ndiben̄e nyom emi.

Ẹma ẹbiọn̄ọ ukwọrọikọ Jesus, ndien enye ama ọdọhọ ete ke ẹyebiọn̄ọ mme anditiene imọ n̄ko. Ke ini ukpepn̄kpọ Jesus okotụkde ndusụk owo, mme andibiọn̄ọ ẹdide mbon ido ukpono ẹma ẹbọrọ ke iyatesịt ẹte: “Nte mbufo n̄ko ẹmewaha ẹkpọn̄ usụn̄? Nte baba owo kiet ke otu mbiowo m̀mê ke otu mme Pharisee ọkọbuọt idem ye Enye?” (John 7:46-48; 15:20) Ediwak mbon oro ẹdọhọde fi okûkpep n̄kpọ ye Mme Ntiense ẹdi mbon unana ifiọk m̀mê mbon asari. Kpep n̄kpọ ye Mme Ntiense nyụn̄ se ke idemfo m̀mê ifiọk Bible fo ọkọri m̀mê ikọrike.—Matthew 7:17-20.

Ke ndinam emi mmọ ẹtiene uwụtn̄kpọ Jesus. Enye ama aka ebịne mme Jew. Mme Jew ẹma ẹnyene ido ukpono mmọ, edi ke ediwak usụn̄ ido ukpono mme Jew ama ọwọn̄ọde ọkpọn̄ Ikọ Abasi. (Matthew 15:1-9) Kpukpru idụt ẹnyene ndusụk orụk ido ukpono, edide inua-okot Christian m̀mê enye emi mîdịghe eke mme Christian. Edi ata akpan n̄kpọ mme owo ndimụm edinịm ke akpanikọ oro odude ke n̄kemuyo ye Ikọ Abasi n̄kama, ndien ukeme oro Mme Ntiense ẹsịnde ndin̄wam mmọ ndinam emi esịne ediwụt ima mbọhọidụn̄.

Owo ekededi oro adade ido ukpono esie ke akpan n̄kpọ ekpenyene ndikere nte ke enye edi nnennen. Mîdịghe ntre, ntak emi enye akpabuanade? Ẹteme mme Christian ẹte: “Ẹdomo kpukpru n̄kpọ ẹse; ẹmụm se ifọnde ẹkama.” (1 Thessalonica 5:21) Owo ekpenyene nditịm n̄kụt nte ke mme edinịm ke akpanikọ imọ ẹnyene nsọn̄ọ N̄wed Abasi, koro mbuọtidem akpanikọ kiet kpọt odu. Ephesus 4:5 ọsọn̄ọ emi, ọdọhọde ke “Ọbọn̄ kiet onyụn̄ odu, ye mbuọtidem kiet, ye baptism kiet.” Jesus ikenyịmeke ye in̄wan̄în̄wan̄ ekikere eyomfịn nte ke ediwak usụn̄ ẹdu, ediwak ido ukpono, kpukpru ẹdade ẹsịm edinyan̄a. Utu ke oro, enye ọkọdọhọ ete: “Inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.” Mme Ntiense Jehovah ẹnịm ke akpanikọ ẹte ke imokụt enye. Mîdịghe ntre mmọ ẹkpeyom ido ukpono efen.—Matthew 7:14.

Baba. Ediwak miliọn owo oro ẹkedude uwem ke mme isua ikie emi ẹkebede oro mîkedịghe Mme Ntiense Jehovah ẹyefiak ẹdi ke ediset ke n̄kpa ẹnyụn̄ ẹdinyene ifet ndidu uwem. Ediwak mbon oro ẹdude uwem ke emi ẹsụk ẹkekeme ndida nnọ akpanikọ ye edinen ido mbemiso “akwa ukụt,” ndien mmọ ẹyenyene edinyan̄a. Akan oro, Jesus ọkọdọhọ ete ke nnyịn ikpenyeneke ndibiere ikpe nnọ kiet eken. Nnyịn ise nte owo etiede ke enyọn̄ enyọn̄; Abasi ese esịt. Enye okụt n̄kpọ nnennen onyụn̄ ebiere ikpe ye mbọm. Enye akayak ubiereikpe esịn Jesus ke ubọk, idịghe ke ubọk nnyịn.—Matthew 7:1-5; 24:21; 25:31.

Kaban̄a mme etịbe okụk, apostle Paul ọkọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Akanam owo itan̄ke mme etịbe ke mme Ufọkmbono Obio Ubọn̄ ye ke mme efe mbono Mme Ntiense Jehovah. Ẹnịm mme ekebe man efere owo ekededi oro aduakde nditịp n̄kpọ nsịn ndinam ntre. Owo baba kiet idiọn̄ọke m̀mê mbon efen ẹnọ ye se mmọ ẹnọde. Ndusụk owo ẹkeme ndinọ awak akan mbon efen; ndusụk ikemeke ndinọ n̄kpọ ndomokiet. Jesus ama owụt nnennen ekikere ke ini enye eketịn̄de n̄kpọ aban̄a usịn etịbe ke temple Jerusalem ye mbon oro ẹketịpde n̄kpọ ẹsịn: Ẹnọ nte ukeme owo edide, ndien edu oro ẹnọde edi akpan n̄kpọ, idịghe ibat okụk oro ẹnọde.—Luke 21:1-4.

Ke ini owo ọyọhọde ye ifiọk aban̄ade Paradise isọn̄ oro ẹn̄wọn̄ọde ke idak Obio Ubọn̄ Christ, enye oyom ndibuana enye ye mbon efen. Afo n̄ko ayanam. Enye edi eti mbụk!—Utom 5:41, 42.

Ndinam emi edi akpan usụn̄ kiet ndiwụt nte ke afo edi mbet Jesus Christ. Ke Bible, ẹkot Jesus “ata ntiense akpanikọ.” Ke ini okodude ke isọn̄ enye ọkọkwọrọ ete: “Ubọn̄ Heaven ke ekpere,” ndien enye okosio mbet esie ọdọn̄ ndinam ukem oro. (Ediyarade 3:14; Matthew 4:17; 10:7) Ke ukperedem, Jesus ama owụk mme anditiene enye ete: “Ẹka ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ.” Enye n̄ko ama ebem iso etịn̄ ete ke mbemiso utịt edide, “ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.”—Matthew 24:14; 28:19, 20.

Ediwak usụn̄ ẹdu nditan̄a eti mbụk emi. Nneme ye mme ufan ye ọdiọn̄ọ esiwak ndiberede usụn̄ nnọ ndinam ntre. Ndusụk owo ẹnam enye ebe ke ndiwet mme leta mîdịghe ebe ke ndikama urụk ukopikọ. Mbon efen ẹnọ n̄wed esịnede ibuotikọ oro mmọ ẹkerede ke ọdiọn̄ọ eyenen̄ede enyene udọn̄ aban̄a. Ye udọn̄ ediyom ndikụt kpukpru owo, Mme Ntiense ẹsimen etop emi ẹsan̄a to ke enyịnusụn̄ sịm enyịnusụn̄.

Bible esịne ufiop ufiop ikot emi: “Spirit ye n̄wan-ndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak enye edi edibọ mmọn̄ uwem ke ikpikpu.” (Ediyarade 22:17) Nditịn̄ nnọ mbon efen mban̄a Paradise isọn̄ ye mme edidiọn̄ esie edi se ẹnyenede ndinam ke unyịmesịt, otode esịt oro ọyọhọde ye udọn̄ ndibuana eti mbụk emi.

Nnyịn imenịm ite ke afo emenyene mbụme efen efen ndibụp mban̄a Mme Ntiense Jehovah ye mme edinịm ke akpanikọ mmọ. Ekeme ndidi ndusụk n̄kpọ ẹtie eneni eneni. Nnyịn ikpama ndibọrọ mme mbụme fo. Ufan̄ ikponke ikem ke ediye uduot ekpri n̄wed emi, ntre nnyịn idọhọ fi obụp Mme Ntiense ke n̄kann̄kụk mbufo. Afo emekeme ndinam ntre ke mme mbono esop mmọ ke Ufọkmbono Obio Ubọn̄ m̀mê ke ini mmọ ẹwahade ẹdise fi ke ufọk. Mîdịghe afo emekeme ndinọ mme mbụme fo ẹsọk Watch Tower, adade nnennen adres.