UTỊT NSUNSU
IDO UKPONO
EMEKPERE!

Nso idi nsunsu ido ukpono? Ndi emesifụhọ ke ntak ubiatibet oro ẹnamde ke enyịn̄ ido ukpono? Ndi esịt esiyat fi aban̄a ekọn̄, edinam oyomonsia, ye n̄wo oro mbon oro ẹdọhọde ke inam n̄kpọ Abasi ẹdiade? Ntak etiede nte ke ido ukpono edi ntak ata ediwak mfịna?

Owo ikpakam iduọhọke kpukpru ido ukpono, edi ẹkpeduọhọ nsunsu ido ukpono. Jesus Christ, kpa ata ọwọrọiso owo ido ukpono oro ẹnen̄erede ẹkpono ọkọdọhọ ke nsunsu ido ukpono osion̄o ndiọi mfri ukem nte ‘mbumbu eto esin̄wụmde mbukpo mfri.’ (Matthew 7:15-17) Nso mfri ke nsunsu ido ukpono osion̄o?

Nsunsu Ido Ukpono . . .

ESỊN IDEM KE EKỌN̄ YE MME MBRE UKARA: N̄wedmbụk n̄kpọntịbe oro Asiaweek ọdọhọ ete: “Ke Asia ye ke mme itie en̄wen, mme adaiso oro ẹyomde ukara ke odudu ẹsida ekikere ido ukpono mme owo ẹnam n̄kpọ ke ibụk ibụk usụn̄.” Ntem, n̄wedmbụk n̄kpọntịbe oro ọdọhọ ete: “Etie nte ererimbot ọmọn̄ adama idat.” Ọwọrọiso owo ido ukpono kiet ke United States ọkọdọhọ ete: “Ana ẹwot mbon edinam oyomonsia man uwotowo etre.” Didie ke enye oyom ẹtre mfịna emi? “Mbufo ẹwot kpukpru mmọ ke enyịn̄ Ọbọn̄.” Ke edide isio, Bible ọdọhọ ete: “Edieke owo ekededi ọdọhọde ete: ‘Mmama Abasi,’ edi enye asua eyenete esie, enye edi osu nsu.” (1 John 4:20) Jesus akakam ọdọhọ ete: “Ẹka iso ẹma mme asua mbufo.” (Matthew 5:44) Ido ukpono ifan̄ ke afo ọdiọn̄ọ emi ẹsin̄wanade ekọn̄?

EKPEP NSUNSU UKPEPN̄KPỌ: Ata ediwak ido ukpono ẹkpep ke ukpọn̄ m̀mê spirit edi ubak idemowo oro enyịn mîkwe emi esikade iso odu uwem ke owo ama akakpa. Ke ntak emi, ediwak ido ukpono ẹsida ikọt mmọ ẹn̄wana okụk, ẹbiere okụk oro mmọ ẹdibọde mbemiso ẹbọn̄de akam ẹnọ ukpọn̄ mme akpan̄kpa. Nte ededi, se Bible ekpepde okpụhọde ye emi. “Ukpọn̄ eke anamde idiọk ayakpa n̄kpa.” (Ezekiel 18:4) ‘Mme odu-uwem ẹfiọk ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet.’ (Ecclesiastes 9:5) Jesus ekekpep ke ẹyenam mme akpan̄kpa ẹset—ndien ediset ke n̄kpa ikpenyeneke ufọn edieke mme owo ẹnyenede ukpọn̄ oro mîkemeke ndikpa. (John 11:11-25) Nte ido ukpono mbufo ekpep ke ukpọn̄ isikpaha?

ENYỊME OBUROBỤT IDO IDAN̄: Ke ndusụk idụt, ediwak ufọkabasi ẹsimek mme ọkwọrọ ederi oro ẹdide mme adan̄ ukemuduot ẹnyụn̄ ẹdọhọ ukara enyịme ndọ ukemuduot. Idem mme ufọkabasi oro mîmaha oburobụt ido ẹsiyak mme ọkwọrọ ederi oro ẹsabarede nditọwọn̄ ẹka iso ẹdi mme ọkwọrọ ederi. Edi nso ke Bible ekpep? Enye etịn̄ in̄wan̄-in̄wan̄ ete: “Ẹkûyak ẹtụn mbufo usụn̄. Mbon use, mme okpono ndem, mme esịn efịbe, iren oro ẹnịmde ndida nyụhọ oburobụt udọn̄ idan̄, irenowo emi ẹdan̄de ye irenowo . . . ididaha obio ubọn̄ Abasi inyene.” (1 Corinth 6:9, 10) Ndi ọmọdiọn̄ọ mme ido ukpono oro ẹnyịmede oburobụt ido idan̄?

Nso iditịbe inọ mme ido ukpono oro ẹsion̄ode ndiọi mfri? Jesus ọkọtọt ete: “Ẹkpi eto ekededi eke mîn̄wụmke eti mfri ẹduọk ẹnyụn̄ ẹtop ẹsịn ke ikan̄.” (Matthew 7:19) Ke akpanikọ, ẹyekpi nsunsu ido ukpono ẹduọk, ẹnyụn̄ ẹsobo enye! Edi didie, ndien ini ewe ke emi editịbe? Ntịn̄nnịm n̄kukụt oro ẹwetde ke n̄wed Ediyarade ibuot 17 ye 18 ọbọrọ mbụme emi.

Didie ke nsunsu ido ukpono edisịm utịt?

Kamse se itịbede! Akpara kiet etie ke edem enyene-ndịk unam. Unam oro enyene ibuot itiaba ye nnụk duop. (Ediyarade 17:1-4) Anie ke akpara oro ada aban̄a? Enye akara “ndidem isọn̄.” Enye esịne ọfọn̄ oro enyenede uduot mmọn̄ibọn̄, akama incense, onyụn̄ enen̄ede oforo. Ke adianade do, enye ada edinam ubụpekpo esie ‘otụn kpukpru mme idụt usụn̄.’ (Ediyarade 17:18; 18:12, 13, 23) Bible anam nnyịn idiọn̄ọ ke akpara oro edi otu ido ukpono ofụri ererimbot. Enye idaha iban̄a akpan ido ukpono kiet, edi ada aban̄a kpukpru ido ukpono oro ẹsion̄ode ndiọi mfri.

Unam oro akpara emi odorode ke edem ada aban̄a mme odudu ukara ererimbot.* (Ediyarade 17:10-13) Nsunsu ido ukpono odoro ke edem unam emi, onyụn̄ odomo ndibiere n̄kpọ nnọ enye nnyụn̄ nda enye usụn̄.

Nte ededi, ke mîbịghike, ndyọ ndyọ n̄kpọ ọmọn̄ etịbe. “Ndien nnụk duop oro afo okokụtde, ye idiọk unam oro, mmọ emi ẹyesua akpara oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụk esie ẹnyụn̄ ẹfọp enye ke ikan̄ ofụri ofụri.” (Ediyarade 17:16) Ke mbuari ye ke unana idotenyịn, mme ukara ererimbot ẹyen̄wana ye nsunsu ido ukpono ẹnyụn̄ ẹsobo enye ofụri ofụri! Nso idinam mmọ ẹn̄wana? N̄wed Ediyarade ọbọrọ ete: “Abasi ekesịn emi ke esịt mmọ ete ẹnam ekikere imọ.” (Ediyarade 17:17) Ke akpanikọ, Abasi oyokot nsunsu ido ukpono ẹdinam ibat ẹban̄a kpukpru mbubiam n̄kpọ oro mmọ ẹnamde ke enyịn̄ esie. Ke ntak mfọnmma unenikpe esie, Abasi ayada mbon ukaraidem—kpa mbon oro ẹdide ufan nsunsu ido ukpono—osobo mmọ.

Nso ke ana afo anam edieke mûyomke ẹsobo fi ye nsunsu ido ukpono? Isụn̄utom Abasi akpak ete: “Ikọt mi ẹwọn̄ọ ke esịt esie.” (Ediyarade 18:4) Ke akpanikọ, ini edi emi ndiwọrọ n̄kpọn̄ nsunsu ido ukpono! Edi nte oro ọwọrọ nditre ndinịm ke Abasi odu? Ihih, koro nditre ndinịm ke Abasi odu idinamke owo ọbọhọ. (2 Thessalonica 1:6-9) Ido ukpono akpanikọ edi n̄kukụre ebiet ubọhọ. Didie ke afo ekeme ndidiọn̄ọ ido ukpono akpanikọ?

Nte ekemede ndidiọn̄ọ ido ukpono akpanikọ

Nti mfri ewe ke ido ukpono akpanikọ okposion̄o?—Matthew 7:17.

Ido Ukpono Akpanikọ . . .

ENYENE IMA: Ata mme andituak ibuot “idịghe ubak ererimbot,” iyakke orụk m̀mê ido obio abahade mmọ, ẹnyene ‘ima ke otu idemmọ.’ (John 13:35; 17:16; Utom 10:34, 35) Utu ke ndiwot kiet eken, mmọ ẹben̄e idem ndikpa nnọ kiet eken.—1 John 3:16.

ENỊM IKỌ ABASI KE AKPANIKỌ: Utu ke ndikpep “ido eset” ye “mme ewụhọ owo ke mme ukpepn̄kpọ mmọ,” ido ukpono akpanikọ ekpep Ikọ Abasi, kpa Bible. (Matthew 15:6-9) Ntak-a? Koro “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ.”—2 Timothy 3:16.

ỌSỌN̄Ọ MME UBON IDEM ONYỤN̄ ESỊN UDỌN̄ ỌNỌ N̄KOKON̄ IDAHA IDO UWEM: Ido ukpono akpanikọ ekpep mme ebe ‘ndima iban mmọ nte idem mmọ,’ an̄wam iban ndinyene ‘ntotụn̄ọ ukpono nnọ mme ebe mmọ,’ onyụn̄ ekpep nditọ ‘ndikop uyo nnọ mme ete ye eka mmọ.’ (Ephesus 5:28, 33; 6:1) Ke adianade do, ana mbon oro ẹkamade ifetutom ẹnịm nti uwụtn̄kpọ ke uwem mmọ.—1 Timothy 3:1-10.

Ndi odu ido ukpono ekededi oro anamde mme n̄kpọ emi? N̄wed oro Holocaust Politics, emi ẹkesiode ke 2001, ọdọhọ ete: “Edieke ediwak owo ẹkpenamde mme n̄kpọ oro Mme Ntiense Jehovah ẹsikwọrọde ẹnyụn̄ ẹnamde, ẹkpekekpan akpakịp uwotowo eke ọyọhọ ekọn̄ ererimbot iba ndien ererimbot ikpenyeneke mfịna uwot ofụri orụk aba.”

Ke akpanikọ, ke idụt 235, Mme Ntiense Jehovah isikwọrọke-kwọrọ nti ido uwem emi ẹdude ke Bible kpọt, edi ẹsida mmọ ẹsịn ke edinam. Nnyịn imesịn udọn̄ inọ fi ite ọdọhọ Mme Ntiense Jehovah ẹn̄wam fi ọdiọn̄ọ mme n̄kpọ oro Abasi oyomde oto fi man afo ekeme ndituak ibuot nnọ enye ke usụn̄ oro enye enyịmede. Nam oro idahaemi. Kûnam ubịghi. Utịt nsunsu ido ukpono emekpere!—Zephaniah 2:2, 3.

*  Ke oyomde ọyọhọ ntọt ke n̄kpọ emi, se n̄wed Ediyarade—Ubọn̄ Ubọn̄ Ata-Utịt Esie Emekpere! emi Mme Ntiense Jehovah ẹsiode.